ನೆಪೋಟಿಸಂ ಬಗ್ಗೆ ಚರ್ಚೆ ಮುಂದುವರಿದಿದ್ದು, ಹಿರಿಯ ನಟ ಅಮಿತಾಭ್​​​ ಬಚ್ಚನ್ ಎಕ್ಸ್​​ನಲ್ಲಿ ಪ್ರತಿಕ್ರಿಯಿಸಿದ್ದಾರೆ.

ಚಿತ್ರರಂಗದಲ್ಲಿ ನೆಪೋಟಿಸಂ ಬಗ್ಗೆ ಚರ್ಚೆ ಮುಂದುವರಿದಿದ್ದು, ಬಾಲಿವುಡ್‌ ಹಿರಿಯ ನಟ ಅಮಿತಾಭ್ ಬಚ್ಚನ್ ಮತ್ತೊಮ್ಮೆ ಪುತ್ರ ಅಭಿಷೇಕ್ ಬಚ್ಚನ್‌ಗೆ ತಮ್ಮ ಅಗಾಧ ಬೆಂಬಲ ವ್ಯಕ್ತಪಡಿಸಿದ್ದಾರೆ. ನಟ ಅಭಿಷೇಕ್ ಬಚ್ಚನ್​​ ಅವರ ವೃತ್ತಿಜೀವನದ ಮೇಲೆ ನೆಪೋಟಿಸಂ ಬೀರಿರುವ ಪರಿಣಾಮದ ಬಗ್ಗೆ ಕಳವಳ ವ್ಯಕ್ತಪಡಿಸಿರುವ ಅಭಿಮಾನಿಗಳು ಮತ್ತು ವಿಮರ್ಶಕರಿಗೆ ಹಿರಿಯ ನಟ ಅಮಿತಾಭ್​​​ ಬಚ್ಚನ್ ಎಕ್ಸ್ (ಟ್ವಿಟರ್)ನಲ್ಲಿ ಪ್ರತಿಕ್ರಿಯಿಸಿದ್ದಾರೆ. ಬಿಗ್​ ಬಿ ಎಕ್ಸ್​ ಪೋಸ್ಟ್​ ಸೋಷಿಯಲ್​ ಮೀಡಿಯಾ ಬಳಕೆದಾರರನ್ನು ವ್ಯಾಪಕವಾಗಿ ಸೆಳೆದಿದೆ.

ಬಿಗ್​ ಬಿ ರಿಯಾಕ್ಷನ್​: ಹಲವು ಯಶಸ್ವಿ ಚಿತ್ರಗಳನ್ನು ಹೊಂದಿರುವ ನಟ ಅಭಿಷೇಕ್ ಬಚ್ಚನ್ ಅವರು ತಮ್ಮ ಉತ್ತಮ, ವೈವಿಧ್ಯಮಯ ಸಿನಿಮಾಗಳ ಹೊರತಾಗಿಯೂ, “ಅನಗತ್ಯವಾಗಿ ಸ್ವಜನಪಕ್ಷಪಾತದ ನಕಾರಾತ್ಮಕತೆಗೆ ಬಲಿಯಾಗಿದ್ದಾರೆ” ಎಂದು ಬರೆಯಲಾಗಿರುವ ಎಕ್ಸ್ ಪೋಸ್ಟ್‌ ನೆಟ್ಟಿಗರ ಗಮನ ಸೆಳೆದಿದೆ. ಈ ಪೋಸ್ಟ್​ ಹಲವು ಪ್ರತಿಕ್ರಿಯೆಗಳನ್ನು ಸ್ವೀಕರಿಸಿದೆ. ಬಿಗ್​ ಬಿ ಕೂಡಾ ರಿಯಾಕ್ಟ್​ ಮಾಡಿದ್ದಾರೆ.

credits ; twitter ( x )

ಯಶಸ್ವಿ ಸಿನಿಮಾಗಳಲ್ಲಿ ಅಭಿನಯಿಸಿರುವ ಅಭಿಷೇಕ್: 2 ದಶಕಗಳಿಗೂ ಹೆಚ್ಚು ಕಾಲದಿಂದ ಬಾಲಿವುಡ್​​​ನಲ್ಲಿ ಗುರುತಿಸಿಕೊಂಡಿರುವ ಅಭಿಷೇಕ್ ಬಚ್ಚನ್, ಗುರು, ಯುವ, ಸರ್ಕಾರ್, ಪಾ, ಧೂಮ್ ಮತ್ತು ಹೌಸ್‌ಫುಲ್‌ನಂತಹ ಚಿತ್ರಗಳಲ್ಲಿ ತಮ್ಮ ನಟನಾ ಪ್ರತಿಭೆ ಸಾಬೀತುಪಡಿಸಿದ್ದಾರೆ. ಇತ್ತೀಚಿನ ವರ್ಷಗಳಲ್ಲಿ, ‘ಬ್ರೀತ್: ಇನ್‌ಟು ದಿ ಶಾಡೋಸ್’ ಮತ್ತು ‘ಐ ವಾಂಟ್ ಟು ಟಾಕ್‌’ನಂತಹ ವಿಮರ್ಶಾತ್ಮಕವಾಗಿ ಮೆಚ್ಚುಗೆ ಪಡೆದ ಸಿನಿಮಾಗಳಲ್ಲಿ ಕಾಣಿಸಿಕೊಂಡಿದ್ದಾರೆ. ಈ ಯಶಸ್ಸಿನ ಹೊರತಾಗಿಯೂ, ಅವರ ತಂದೆಯ ಯಶಸ್ವಿ ವೃತ್ತಿಜೀವನ, ಸಿನಿಮಾಗಳೊಂದಿಗೆ ನಟನ ಕೆಲಸಗಳನ್ನು ನಿರಂತರವಾಗಿ ಹೋಲಿಕೆ ಮಾಡುತ್ತಿರೋದು ಅವರ ವೃತ್ತಿಜೀವನದ ಮೇಲೆ ಪರಿಣಾಮ ಬೀರಿದೆ. ಹೋಲಿಕೆ ನಿರಂತರವಾಗಿ ಸಾಗಿದ್ದು, ಅಭಿಷೇಕ್​ ಪ್ರತಿಭೆ ಮತ್ತು ಯಶಸ್ಸು ಸೈಡ್​​ಲೈನ್​​ ಆಗಿದೆ ಅನ್ನೋದು ಅಪಾರ ಸಂಖ್ಯೆಯ ಅಭಿಮಾನಿಗಳ ಅಭಿಪ್ರಾಯ.