CSK vs PBKS: ಪಂಜಾಬ್​​​ಗೆ ಗೆಲುವು ತಂದುಕೊಟ್ಟ ಅಯ್ಯರ್, ಪ್ರಭಸಿಮ್ರನ್! ಟೂರ್ನಿಯಿಂದ ಮೊದಲ ತಂಡವಾಗಿ ಹೊರಬಿದ್ದ ಸಿಎಸ್​​ಕೆ | Shreyas Iyer Prabhsimran half century helps Punjab Kings thrilling win over Chennai super kings

191 ರನ್​ಗಳ ಗುರಿ ಬೆನ್ನಟ್ಟಿದ ಪಂಜಾಬ್ ಕಿಂಗ್ಸ್ ತಂಡ ಉತ್ತಮ ಆರಂಭ ಪಡೆದುಕೊಂಡಿತು. 4.4 ಓವರ್​ ಬ್ಯಾಟಿಂಗ್ ಮಾಡಿದ ಆರಂಭಿಕರಾದ ಪ್ರಭಸಿಮ್ರನ್ ಸಿಂಗ್ ಹಾಗೂ ಪ್ರಿಯಾಂಶ್ ಆರ್ಯ 44 ರನ್ ಸೇರಿಸಿದರು. ಆರ್ಯ 15 ಎಸೆತಗಳಲ್ಲಿ 5 ಬೌಂಡರಿ ಸಹಿತ 23 ರನ್​ಗಳಿಸಿ ಖಲೀಲ್ ಅಹ್ಮದ್ ಬೌಲಿಂಗ್​​ನಲ್ಲಿ ಧೋನಿಗೆ ಕ್ಯಾಚ್ ನೀಡಿ ಔಟ್ ಆದರು. 2ನೇ ವಿಕೆಟ್​​ಗೆ ಪ್ರಭಸಿಮ್ರನ್ ಜೊತೆ ಸೇರಿದ 72 ರನ್​ಗಳ ಮ್ಯಾಚ್​ ಟರ್ನಿಂಗ್ ಜೊತೆಯಾಟ ನಡೆಸಿದರು. ಪ್ರಭಸಿಮ್ರನ್ ಸಿಂಗ್ 36 ಎಸೆತಗಳಲ್ಲಿ 5 ಬೌಂಡರಿ, 3 ಸಿಕ್ಸರ್​ಗಳ ಸಹಿತ 54 ರನ್​ಗಳಿಸಿದರು.

ಪ್ರಭಸಿಮ್ರನ್​ ನೂರ್ ಅಹ್ಮದ್ ಬೌಲಿಂಗ್​​ನಲ್ಲಿ ಡಿವಾಲ್ಡ್ ಬ್ರೆವಿಸ್​ಗೆ ಕ್ಯಾಚ್​ ನೀಡಿ ಔಟ್ ಆದರು. ನೆಹಾಲ್ ವಧೇರಾ 5 ರನ್​ಗಳಿಸಿ ಪತೀರಣಗೆ ವಿಕೆಟ್ ನೀಡಿದರು. ನಂತರ 4ನೇ ವಿಕೆಟ್​ಗೆ ಶ್ರೇಯಸ್ ಅಯ್ಯರ್ ಮತ್ತು ಶಶಾಂಕ್ ಸಿಂಗ್ 18 ಎಸೆತಗಳಲ್ಲಿ 44 ರನ್​​ ಸಿಡಿಸಿದರು. ಗೆಲುವಿಗೆ 11 ರನ್​ ಬೇಕಿದ್ದಾಗ ಜಡೇಜಾ ಬೌಲಿಂಗ್​​​ನಲ್ಲಿ ಡೆವಾಲ್ಡ್ ಬ್ರೆವಿಸ್ ಹಿಡಿದ ಅದ್ಭುತ ಕ್ಯಾಚ್ಗೆ ಶಶಾಂಕ್ ಸಿಂಗ್ ಔಟ್ ಆದರು. ಶಶಾಂಕ್ ಸಿಂಗ್ 12 ಎಸೆತಗಳಲ್ಲಿ 1 ಬೌಂಡರಿ, 2 ಸಿಕ್ಸರ್ ಸಿಡಿಸಿದ್ದರು.

3ನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್​ಗೆ ಆಗಮಿಸಿದ್ದ ನಾಯಕ ಶ್ರೇಯಸ್ ಅಯ್ಯರ್ 41 ಎಸೆತಗಳಲ್ಲಿ 5 ಬೌಂಡರಿ, 4 ಸಿಕ್ಸರ್​ಗಳ ಸಹಿತ 72 ರನ್​ಗಳಿಸಿ ಗೆಲುವಿಗೆ 3 ರನ್​ಗಳ ಅಗತ್ಯವಿದ್ದಾಗ ಪತೀರಣ ಬೌಲಿಂಗ್​​​ನಲ್ಲಿ ಕ್ಲೀನ್ ಬೌಲ್ಡ್ ಆದರು. ಜೋಸ್ ಇಂಗ್ಲಿಸ್  ಅಜೇಯ 10 ರನ್​ಗಳಿಸಿದರು.

ಚೆನ್ನೈ ಸೂಪರ್ ಕಿಂಗ್ಸ್ ಪರ ಮತೀಶ್ ಪತೀರಣ ನೂರ್ ಅಹ್ಮದ್, ಖಲೀಲ್ ಅಹ್ಮದ್ ಹಾಗೂ ರವೀಂದ್ರ ಜಡೇಜಾ ತಲಾ ಒಂದು ವಿಕೆಟ್ ಪಡೆದರು.

ಚೆನ್ನೈ ಸೂಪರ್ ಕಿಂಗ್ಸ್ ಇನ್ನಿಂಗ್ಸ್

ಇದಕ್ಕೂ ಮುನ್ನ ಟಾಸ್ ಸೋತು ಬ್ಯಾಟಿಂಗ್ ಮಾಡಿದ್ದ ಅತಿಥೇಯ ಚೆನ್ನೈ ಸೂಪರ್ ಕಿಂಗ್ಸ್ ತಂಡ 19.2 ಓವರ್​ಗಳಲ್ಲಿ 190ಕ್ಕೆ ಆಲೌಟ್ ಆಗಿತ್ತು. ಸ್ಯಾಮ್ ಕರನ್​ 47 ಎಸೆತಗಳಲ್ಲಿ 9 ಬೌಂಡರಿ, 4 ಸಿಕ್ಸರ್​ಗಳ ಸಹಿತ 88ರನ್​ಗಳಿಸಿ ತಂಡದ ಗರಿಷ್ಠ ಸ್ಕೋರರ್ ಆಗಿದ್ದರು. ಡಿವಾಲ್ಡ್ ಬ್ರೆವಿಸ್ 26 ಎಸೆತಗಳಲ್ಲಿ 2 ಬೌಂಡರಿ, 1 ಸಿಕ್ಸರ್ ಸಹಿತ 32 ರನ್​ಗಳಿಸಿದ್ದರು. ಆದರೆ ಉಳಿದ ಬ್ಯಾಟರ್​ಗಳು ನಿರೀಕ್ಷಿತ ಪ್ರದರ್ಶನ ತೋರದ ಕಾರಣ ತಂಡ ಸೋಲುಕಂಡಿತು.

ಶೇಖ್ ರಶೀದ್ 11, ಆಯುಷ್ ಮ್ಹಾತ್ರೆ 7, ರವೀಂದ್ರ ಜಡೇಜಾ 17,  ಶಿವಂ ದುಬೆ 6, ಎಂಎಸ್ ಧೋನಿ 11, ದೀಪಕ್ ಹೂಡಾ 2, ನೂರ್ ಅಹ್ಮದ್ ಹಾಗೂ ಅನ್ಶುಲ್ ಕಾಂಬೋಜ್ ಡಕ್ ಔಟ್ ಆಗಿದ್ದರು.

ಪಂಜಾಬ್ ಕಿಂಗ್ಸ್ ಪರ ಯುಜ್ವೇಂದ್ರ ಚಹಲ್ 32 ರನ್​ ನೀಡಿ ಹ್ಯಾಟ್ರಿಕ್ ಸಹಿತ 4 ವಿಕೆಟ್ ಪಡೆದು ಸಿಎಸ್​ಕೆ 200 ರ ಗಢಿದಾಟದಂತೆ ತಡೆದರು. ಇದು ಸಿಎಸ್​ಕೆ ಕಡೆ ಇದ್ದ ಪಂದ್ಯವನ್ನ ಪಂಜಾಬ್ ಕಡೆಗೆ ತಿರುಗಿಸಿದ ಓವರ್​ ಆಗಿತ್ತು. ಮಾರ್ಕೊ ಜಾನ್ಸನ್ 30ಕ್ಕೆ2, ಅರ್ಷದೀಪ್ ಸಿಂಗ್ 25ಕ್ಕೆ 2 ವಿಕೆಟ್ ಪಡೆದು ಮಿಂಚಿದರು.

2ನೇ ಸ್ಥಾನಕ್ಕೇರಿದ ಪಂಜಾಬ್ ಕಿಂಗ್ಸ್

6ನೇ ಗೆಲುವು ಸಾಧಿಸಿದ ಪಂಜಾಬ್ ಕಿಂಗ್ಸ್ 10 ಪಂದ್ಯಗಳಲ್ಲಿ 6 ಗೆಲುವಿನೊಂದಿಗೆ 13 ಅಂಕ ಪಡೆದು 2ನೇ ಸ್ಥಾನಕ್ಕೆ ಲಗ್ಗೆಯಿಟ್ಟಿತು. ಆರ್​ಸಿಬಿ 14 ಅಂಕಗಳೊಂದಿಗೆ ಮೊದಲ ಸ್ಥಾನದಲ್ಲಿದೆ. ಇನ್ನು 8ನೇ ಸೋಲು ಕಂಡ ಚೆನ್ನೈ ಸೂಪರ್ ಕಿಂಗ್ಸ್ ಮೊದಲ ತಂಡವಾಗಿ 18ನೇ ಆವೃತ್ತಿಯ ಐಪಿಎಲ್​​ನಿಂದ  ಹೊರಬಿದ್ದಿತು.