Emotional Story: ನಗರಾಯುಕ್ತರ ವರ್ಗಾವಣೆಗೆ ಕಣ್ಣೀರಾದ ಪುತ್ತೂರು ನಗರ ಪಾಲಿಕೆ! ಒಳ್ಳೆಯ ಅಧಿಕಾರಿಗೆ ಭಾವುಕ ಬೀಳ್ಕೊಡುಗೆ | Puttur City Council Commissioner Madhu S Manohar Emotional Farewell

ಪುತ್ತೂರು ನಗರಸಭೆಯಲ್ಲಿ ಕಳೆದ ನಾಲ್ಕು ವರ್ಷಗಳಿಂದ ನಗರಾಯುಕ್ತರಾಗಿ ಕೆಲಸ ನಿರ್ವಹಿಸುತ್ತಿದ್ದ  ಮಧು.ಎಸ್.ಮನೋಹರ್ ಎನ್ನುವ ಅಧಿಕಾರಿಗೆ ಬೇರೊಂದು ಕಡೆ ವರ್ಗಾವಣೆ ಆದೇಶ ಬಂದಾಗ ಇಡೀ ನಗರಸಭೆಯ ಸಿಬ್ಬಂದಿಗಳು, ಕಾರ್ಪೋರೇಟರ್ ಗಳು ಒಟ್ಟಾಗಿ ಭಾವುಕರಾಗಿ ಕಣ್ಣೀರು ಹಾಕಿದ ಸನ್ನಿವೇಶ ನೋಡುಗರ ಮನ ಮಿಡಿಸಿದೆ.

ಪುತ್ತೂರು ನಗರಸಭೆಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದ ಸಂದರ್ಭದಲ್ಲಿ ಪ್ರಾಮಾಣಿಕವಾಗಿ ಮತ್ತು ನಿಷ್ಪಕ್ಷಪಾತವಾಗಿ ಕೆಲಸ ಮಾಡಿದ ಪರಿಣಾಮ ಸಾಮಾನ್ಯ ಜನರಿಂದ ಹಿಡಿದು ಜನಪ್ರತಿನಿಧಿಗಳ ಮಧ್ಯೆ ಸೇತುವೆಯಾಗಿ ಕೆಲಸ ನಿರ್ವಹಿಸುತ್ತಿದ್ದ ಮಧು ಮನೋಹರ್ ರನ್ನು ಪುತ್ತೂರಿನಿಂದ ಬಿಟ್ಟು ಕೊಡುವ ಸಂದರ್ಭ  ಇಲ್ಲಿನ ಜನ ಕೊಂಚ ವಿಚಲಿತರಾಗಿದ್ದರು. ನಗರದ ಸ್ವಚ್ಛತೆ, ಮಧ್ಯವರ್ತಿಗಳ ನಿಯಂತ್ರಣ ಸೇರಿದಂತೆ ಹಲವು ಜನಪರ‌ ಕೆಲಸಗಳನ್ನು ಮಾಡಿದ್ದ ಪರಿಣಾಮ ಈ‌ ಅಧಿಕಾರಿ ಬೇರೆಡೆಗೆ ವರ್ಗಾವಣೆ ಹೊಂದಿದ‌ ಸಂದರ್ಭದಲ್ಲಿ ಕಾರ್ಪೋರೇಟರ್ ಗಳು, ಕಿರಿಯ ಅಧಿಕಾರಿಗಳು, ಟೆಂಪರರಿ ಸಿಬ್ಬಂದಿಗಳು ಹೀಗೆ ಎಲ್ಲರೂ ಸೇರಿ ಅಧಿಕಾರಿಗೆ ಗೌರವ ವಿದಾಯ ಹೇಳಿದ್ದಾರೆ. ಜನರ, ಸಿಬ್ಬಂದಿಗಳ ಪ್ರೀತಿಗೆ  ಭಾವುಕರಾಗಿಯೇ ಪ್ರತಿಕ್ರಿಯಿಸಿದ ಮಧು.ವಿ.ಮನೋಹರ್ ಪುತ್ತೂರಿನ ಜನರ ಪ್ರೀತಿ, ಸ್ನೇಹಕ್ಕೆ ಕೃತಜ್ಞತೆಯನ್ನು ಸಲ್ಲಿಸಿ ಬೇರೆ ಊರಿಗೆ ಪ್ರಯಾಣ ಬೆಳೆಸಿದರು.