Last Updated:
ಭಾರತ-ಇಂಗ್ಲೆಂಡ್ 3ನೇ ಟೆಸ್ಟ್ ಪಂದ್ಯದಲ್ಲಿ ಎರಡೂ ತಂಡಗಳು 387 ರನ್ಗಳಿಗೆ ಆಲೌಟ್. ಭಾರತದ ಪರ ರಾಹುಲ್ 100, ಪಂತ್ 74, ಜಡೇಜಾ 72 ರನ್ಗಳಿಸಿದರು. ಇಂಗ್ಲೆಂಡ್ ಪರ ಜೋ ರೂಟ್ 104 ರನ್ಗಳಿಸಿದರು.
ಭಾರತ ಹಾಗೂ ಇಂಗ್ಲೆಂಡ್ ನಡುವಿನ 3ನೇ ಟೆಸ್ಟ್ ಪಂದ್ಯ ರೋಚಕ ಹಂತ ತಲುಪಿದೆ. ಮೊದಲ ಮೂರು ದಿನಗಳಲ್ಲಿ ಎರಡೂ ತಂಡಗಳು ಬ್ಯಾಟಿಂಗ್ ಮಾಡಿದ್ದು, ಯಾವುದೇ ತಂಡಕ್ಕೆ ಮುನ್ನಡೆ ದೊರೆತಿಲ್ಲ. ಅಂದರೆ ಎರಡೂ ತಂಡಗಳು ಒಂದೇ ಸ್ಕೋರ್ಗೆ ಆಲೌಟ್ ಆಗಿವೆ. 2ನೇ ದಿನ 145/3 ರನ್ಗಳಿಸಿದ್ದ ಟೀಮ್ ಇಂಡಿಯಾ, 3ನೇ ದಿನ ತನ್ನೆಲ್ಲಾ ವಿಕೆಟ್ ಕಳೆದುಕೊಂಡು 387 ರನ್ಗಳಿಸಿತು. ವಿಶೇಷವೆಂದರೆ ಮೊದಲ ಇನ್ನಿಂಗ್ಸ್ನಲ್ಲಿ ಇಂಗ್ಲೆಂಡ್ ಕೂಡ 387ಕ್ಕೆ ಆಲೌಟ್ ಆಗಿತ್ತು. ಭಾರತದ ಪರ ಕನ್ನಡಿಗ ರಾಹುಲ್ 100 ರನ್ಗಳಿಸಿ ಗರಿಷ್ಠ ಸ್ಕೋರರ್ ಆದರೆ, ರಿಷಭ್ ಪಂತ್ (74) ಹಾಗೂ ರವೀಂದ್ರ ಜಡೇಜಾ(72) ಅರ್ಧಶತಕ ಸಿಡಿಸಿದರು.
ಮೊದಲು ಬ್ಯಾಟಿಂಗ್ ಮಾಡಿದ್ದ ಇಂಗ್ಲೆಂಡ್ ತಂಡ ಮೊದಲ ಇನ್ನಿಂಗ್ಸ್ನಲ್ಲಿ ಜೋ ರೂಟ್ (104) ಶತಕದ ನೆರವಿನಿಂದ 387 ರನ್ಗಳಿಸಿತ್ತು. ಇದಕ್ಕೆ ಉತ್ತರವಾಗಿ 2ನೇ ದಿನ ಭಾರತ 3 ವಿಕೆಟ್ ಕಳೆದುಕೊಂಡು 145 ರನ್ಗಳಿಸಿತ್ತು. ಕನ್ನಡಿಗ ಕೆಎಲ್ ರಾಹುಲ್ ಅಜೇಯ 53 ರನ್ಗಳಿಸಿದರೆ, ರಿಷಭ್ ಪಂತ್ ಅಜೇಯ 19 ರನ್ಗಳಿಸಿ 3 ನೇದಿನಕ್ಕೆ ಬ್ಯಾಟಿಂಗ್ ಕಾಯ್ದಿರಿಸಿದ್ದರು.
3ನೇ ದಿನ ಭಾರತ ತಂಡಕ್ಕೆ ಪಂತ್ ಹಾಗೂ ರಾಹುಲ್ ಉತ್ತಮ ಜೊತೆಯಾಟ ನೀಡಿದರು. ಈ ಜೋಡಿ 198 ಎಸೆತಗಳಲ್ಲಿ 141 ರನ್ ಸೇರಿಸಿ ತಂಡದ ಮೊತ್ತವನ್ನ 250ರ ಸನಿಹ ತಂದು ಬೇರ್ಪಟ್ಟಿತ್ತು. ಇಂಗ್ಲೆಂಡ್ ಬೌಲರ್ಗಳನ್ನ 33 ಓವರ್ಗಳ ಕಾಲ ಕಾಡಿದ್ದ ಈ ಜೋಡಿ ಪಂತ್ ರನ್ಔಟ್ ಮೂಲಕ ಅಂತ್ಯಗೊಂಡಿತು. ಭೋಜನ ವಿರಾಮಕ್ಕೆ ಕೆಲವೇ ನಿಮಿಷಗಳಿರುವಾಗ ಇಲ್ಲದ ರನ್ ಕದಿಯುವ ಯತ್ನದಲ್ಲಿ 112 ಎಸೆತಗಳಲ್ಲಿ 8 ಬೌಂಡರಿಮ 2 ಸಿಕ್ಸರ್ ಸಹಿತ 74 ರನ್ಗಳಿಸಿ ಅದ್ಭುತವಾಗಿ ಆಡುತ್ತಿದ್ದ ಪಂತ್ ರನ್ಔಟ್ ಆಗಿ ಪೆವಲಿಯನ್ ಸೇರಿಕೊಂಡರು.
ಇದಾ 6 ರನ್ ಅಂತರದಲ್ಲಿ ಶತಕ ಪೂರ್ಣಗೊಳಿಸಿದ ಅದೇ ಓವರ್ನಲ್ಲಿ ಕೆ ಎಲ್ ರಾಹುಲ್ ಶೋಯಭ್ ಬಶೀರ್ ಬೌಲಿಂಗ್ನಲ್ಲಿ ಹ್ಯಾರಿ ಬ್ರೂಕ್ಗೆ ಕ್ಯಾಚ್ ನೀಡಿ ಔಟ್ ಆದರು. ಅವರು 177 ಎಸೆತಗಳಲ್ಲಿ 13 ಬೌಂಡರಿಗಳ ಸಹಿತ 100 ರನ್ಗಳಿಸಿದರು.
July 12, 2025 11:01 PM IST