ಅಷ್ಟಮಂಗಲದ ಮೂಲಕ ಸಿಕ್ತು ಪರಿಹಾರ, ಪುತ್ತೂರಿನ ಮಹಾಲಿಂಗೇಶ್ವರ ದೇವಸ್ಥಾನದ ಅಭಿವೃದ್ಧಿಗೆ ಒಪ್ಪಿಗೆ! | Puttur Mahalingeshwara Temple Development Approved by Astamangala

ಪುತ್ತೂರು ಶಾಸಕ ಅಶೋಕ್‍ಕುಮಾರ್ ರೈ ನೇತೃತ್ವದಲ್ಲಿ ಈ ಅಭಿವೃದ್ಧಿ ಕಾಮಗಾರಿ ನಡೆಸಲು ತೀರ್ಮಾನಿಸಲಾಗಿದೆ. ದೇವಸ್ಥಾನದ ಎದುರು ಭಾಗದಲ್ಲಿರುವ ಅಯ್ಯಪ್ಪ ಗುಡಿಯ ಸ್ಥಳಾಂತರ, ನಾಗನ ಕಟ್ಟೆಯನ್ನು ನೆಲ್ಲಿಕಟ್ಟೆ ಬಳಿಯಿರುವ ಮೂಲನಾಗನ ಕಟ್ಟೆಗೆ ಸ್ಥಳಾಂತರ, ವೆಟ್ ವೇಸ್ಟ್ ಗೆ ಪ್ರತ್ಯೇಕ ವ್ಯವಸ್ಥೆ, ದೇಶದ ಬೃಹತ್ ಧ್ವಜ ಅಳವಡಿಕೆ ಸೇರಿದಂತೆ ಹಲವು ವಿಚಾರಗಳನ್ನು ಪ್ರಶ್ನೆಯಲ್ಲಿ ಪರಿಹಾರಕ್ಕಾಗಿ ಇಡಲಾಗಿದೆ.

ಈ ನಡುವೆ ಶಾಸಕ ಅಶೋಕ್ ಕುಮಾರ್ ರೈ ಅಷ್ಟ ಮಂಗಲ ಪ್ರಶ್ನೆ ನಡೆಯುತ್ತಿದ್ದ ಸಂದರ್ಭದಲ್ಲಿ ಪ್ರಶ್ನೆ ಇಡುವ ವೇದಮೂರ್ತಿಗಳಲ್ಲಿ ದೇವಸ್ಥಾನದ ಮುಂಭಾಗದಲ್ಲಿರುವ ಸಭಾಂಗಣದ ಕಟ್ಟಡವನ್ನು ತೆರವುಗೊಳಿಸಲು ದೇವರ ಅನುಮತಿ ಇದೆಯೇ ಎನ್ನುವ ಪ್ರಶ್ನೆಯನ್ನು ಕೇಳಿದರು. ಆ ಸಂದರ್ಭದಲ್ಲಿ ಅಷ್ಟಮಂಗಳದಲ್ಲಿ ಕಟ್ಟಡ ತೆಗೆಯಲು ಯಾವುದೇ ರೀತಿಯ ತೊಂದರೆ ಇಲ್ಲ, ದೇವರ ಅನುಮತಿ ಇದೆ ಎನ್ನುವ ಉತ್ತರ ಬಂದ ಹಿನ್ನಲೆಯಲ್ಲಿ ಅಭಿವೃದ್ಧಿ ಸಮಯದಲ್ಲಿ ಸಭಾಂಗಣ ಕಟ್ಟಡವನ್ನೂ ತೆರವುಗೊಳಿಸಲು ತೀರ್ಮಾನಿಸಲಾಗಿದೆ.

ದೇವಸ್ಥಾನ ಕೆರೆಯ ಕಟ್ಟೆಯನ್ನು ಇನ್ನಷ್ಟು ಎತ್ತರಕ್ಕೇರಿಸಿ ಕೆರೆಯ ನಡುವೆ ಕಾರಂಜಿ ವ್ಯವಸ್ಥೆಯನ್ನೂ ಕೈಗೊಳ್ಳಲು ನಿರ್ಧರಿಸಲಾಗಿದೆ. ಮುಂದಿನ ಕೆಲವೇ ತಿಂಗಳಿನಲ್ಲಿ ದೇವಸ್ಥಾನದ ಅಭಿವೃದ್ಧಿ ಕೆಲಸಗಳು ಪ್ರಾರಂಭಗೊಳ್ಳಲಿದ್ದು, ಸರಕಾರದ ಹಣದ ಬದಲಿಗೆ ಹೆಚ್ಚಾಗಿ ಭಕ್ತರ ಮೂಲಕವೇ ಧನಸಂಗ್ರಹ ನಡೆಸಿ ಜೀರ್ಣೋದ್ಧಾರ ನಡೆಸುವ ಸೂಚನೆಯನ್ನು ಶಾಸಕ ಅಶೋಕ್‍ಕುಮಾರ್ ರೈ ತಿಳಿಸಿದ್ದಾರೆ.