ಪ್ಲೇ ಆಫ್ನಿಂದ ದಕ್ಷಿಣ ಆಫ್ರಿಕಾದ ಆಟಗಾರರು ದೂರ
ಐಪಿಎಲ್ 2025 ರ ಒಂದು ವಾರದ ಸ್ಥಗಿತದಿಂದಾಗಿ, ಅನೇಕ ವಿದೇಶಿ ಆಟಗಾರರು ತಮ್ಮ ದೇಶಗಳಿಗೆ ಮರಳಿದ್ದಾರೆ. ಕೆಲವರು ರಾಷ್ಟ್ರೀಯ ಕರ್ತವ್ಯಗಳಿಗಾಗಿ (ಉದಾಹರಣೆಗೆ, ದಕ್ಷಿಣ ಆಫ್ರಿಕಾದ ಆಟಗಾರರಿಗೆ ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್ ಫೈನಲ್), ಮತ್ತು ಇತರರು ವೈಯಕ್ತಿಕ ಕಾರಣಗಳಿಂದ ಭಾರತಕ್ಕೆ ಮರಳಲು ನಿರಾಕರಿಸಿದ್ದಾರೆ. ಅದರಲ್ಲಿ ಆಸ್ಟ್ರೇಲಿಯಾದ ವೇಗದ ಬೌಲರ್ ಮಿಚೆಲ್ ಸ್ಟಾರ್ಕ್ ಡೆಲ್ಲಿ ಕ್ಯಾಪಿಟಲ್ಸ್‌ಗೆ ಮರಳದಿರಲು ನಿರ್ಧರಿಸಿದ್ದಾರೆ. ಇದರ ಜೊತೆಗೆ, ದಕ್ಷಿಣ ಆಫ್ರಿಕಾದ ಆಟಗಾರರಾದ ಕಗಿಸೊ ರಬಾಡ, ಐಡೆನ್ ಮಾರ್ಕ್ರಾಮ್, ಮತ್ತು ಟ್ರಿಸ್ಟಾನ್ ಸ್ಟಬ್ಸ್ ಸೇರಿದಂತೆ ಎಂಟು ಆಟಗಾರರು ಪ್ಲೇಆಫ್ ಆರಂಭಕ್ಕೂ ಮುನ್ನ ತಮ್ಮ ಟೆಸ್ಟ್ ತಂಡಕ್ಕಾಗಿ ಐಪಿಎಲ್ ತೊರೆಯಲಿದ್ದಾರೆ. ಈ ಗೈರುಗಳು ಗುಜರಾತ್ ಟೈಟಾನ್ಸ್, ರಾಯಲ್ ಚಾಲೆಂಜರ್ಸ್ ಬೆಂಗಳೂರು, ಮತ್ತು ಮುಂಬೈ ಇಂಡಿಯನ್ಸ್‌ನಂತಹ ತಂಡಗಳ ಆಟದ ಸಂಯೋಜನೆಯನ್ನು ಗಮನಾರ್ಹವಾಗಿ ಬದಲಾಯಿಸಲಿವೆ.
ಇದು ಇಂಡಿಯನ್ ಪ್ರೀಮಿಯರ್ ಲೀಗ್
ಈ ಸಂದರ್ಭದಲ್ಲಿ, ಪಂಜಾಬ್ ಕಿಂಗ್ಸ್ (PBKS) ಹಂಚಿಕೊಂಡಿರುವ ಒಂದು ವಿಡಿಯೋ ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆಗಿದೆ. ಈ ವಿಡಿಯೋದಲ್ಲಿ, ಆಸ್ಟ್ರೇಲಿಯಾದ ಆಟಗಾರರಾದ ಜೋಶ್ ಇಂಗ್ಲಿಸ್, ಮಾರ್ಕಸ್ ಸ್ಟೊಯಿನಿಸ್, ಜೋಶ್ ಹ್ಯಾಜಲ್‌ವುಡ್, ಮತ್ತು ದಕ್ಷಿಣ ಆಫ್ರಿಕಾದ ಮಾರ್ಕೊ ಜಾನ್ಸೆನ್ ಐಪಿಎಲ್ 2025 ರ ಎರಡನೇ ಲೆಗ್‌ಗೆ ಮರಳುವ ಬಗ್ಗೆ ಇಬ್ಬರು ವ್ಯಕ್ತಿಗಳು ಗಂಭೀರವಾಗಿ ಚರ್ಚಿಸುತ್ತಿದ್ದಾರೆ. ಈ ಸಂದರ್ಭದಲ್ಲಿ, ಪಂಜಾಬ್ ಕಿಂಗ್ಸ್‌ನ ನಾಯಕ ಶ್ರೇಯಸ್ ಅಯ್ಯರ್ ಮಧ್ಯಪ್ರವೇಶಿಸಿ, “ನೀವು ಮಾತನಾಡುತ್ತಿರುವ ಎಲ್ಲಾ ಆಟಗಾರರು ನಿಜವಾಗಿಯೂ ಪ್ರತಿಭಾನ್ವಿತ ಕ್ರಿಕೆಟಿಗರು. ಆದರೆ ನೆನಪಿಡಿ, ಇದು ಇಂಡಿಯನ್ ಪ್ರೀಮಿಯರ್ ಲೀಗ್,” ಎಂದು ಹೇಳಿ ನಕ್ಕು ಹೊರನಡೆಯುತ್ತಾರೆ.
ಈ ಹೇಳಿಕೆಯ ಮೂಲಕ ಅಯ್ಯರ್, ಐಪಿಎಲ್‌ನ ಯಶಸ್ಸು ಭಾರತೀಯ ಆಟಗಾರರ ಮೇಲೆ ಅವಲಂಬಿತವಾಗಿದೆ ಎಂಬ ಸಂದೇಶವನ್ನು ಸ್ಪಷ್ಟವಾಗಿ ಸಾರಿದ್ದಾರೆ. ವಿದೇಶಿ ಆಟಗಾರರ ಗೈರು ಒಂದು ಸವಾಲಾದರೂ, ಭಾರತೀಯ ಪ್ರತಿಭೆಗಳು ಲೀಗ್‌ನ ರೋಮಾಂಚಕತೆಯನ್ನು ಕಾಯ್ದುಕೊಳ್ಳಲು ಸಾಕು ಎಂಬ ವಿಶ್ವಾಸವನ್ನು ಅವರು ವ್ಯಕ್ತಪಡಿಸಿದ್ದಾರೆ.
ಪರ-ವಿರುದ್ಧ ಟೀಕೆ
ಈ ವಿಡಿಯೋ ಐಪಿಎಲ್ ಅಭಿಮಾನಿಗಳಲ್ಲಿ ವ್ಯಾಪಕ ಚರ್ಚೆಗೆ ಕಾರಣವಾಗಿದೆ. ಕೆಲವರು ಶ್ರೇಯಸ್ ಅಯ್ಯರ್‌ರ ಈ ಹೇಳಿಕೆಯನ್ನು ಭಾರತೀಯ ಕ್ರಿಕೆಟಿಗರ ಪ್ರತಿಭೆಯ ಮೇಲಿನ ನಂಬಿಕೆಯ ಸಂಕೇತವೆಂದು ಪ್ರಶಂಸಿಸಿದರೆ, ಇತರರು ವಿದೇಶಿ ಆಟಗಾರರ ಕೊಡುಗೆಯನ್ನು ಕಡಿಮೆ ಮಾಡಬಾರದೆಂದು ತಿಳಿಸಿದ್ದಾರೆ.
ಐಪಿಎಲ್ 2025 ರ ಉಳಿದ ಭಾಗದಲ್ಲಿ ತಂಡಗಳು ತಮ್ಮ ಆಟದ ತಂತ್ರಗಳನ್ನು ಭಾರತೀಯ ಆಟಗಾರರ ಸಾಮರ್ಥ್ಯದ ಮೇಲೆ ಹೆಚ್ಚು ಕೇಂದ್ರೀಕರಿಸಬೇಕಾಗಿದೆ. ಉದಾಹರಣೆಗೆ, ಡೆಲ್ಲಿ ಕ್ಯಾಪಿಟಲ್ಸ್ ಸ್ಟಾರ್ಕ್‌ರ ಬದಲಿಗೆ ಮುಸ್ತಾಫಿಜುರ್ ರೆಹಮಾನ್‌ರನ್ನು ತಾತ್ಕಾಲಿಕವಾಗಿ ಸೇರಿಸಿಕೊಂಡಿದೆ, ಆದರೆ ಅವರೂ ಮೇ 24 ರ ನಂತರ ಲಭ್ಯರಿರುವುದಿಲ್ಲ. RCB ಲುಂಗಿ ಎನ್‌ಗಿಡಿಯ ಗೈರಿನಿಂದ ಬೌಲಿಂಗ್‌ನಲ್ಲಿ ಸ್ಥಳೀಯ ಆಟಗಾರರಾದ ಯಶ್ ದಯಾಳ್ ಹಾಗೂ ಭುವನೇಶ್ವರ್ ಕುಮಾರ್ ಅವರನ್ನ ಅವಲಂಭಿಸುವಂತಾಗಿದೆ.
