‘ಗ್ಯಾರಂಟಿ’ ಸರ್ಕಾರಕ್ಕೆ ಕೇಳ್ತಿಲ್ವಾ ಜನ್ರ ಕೂಗು? ಗೋಡೆ ಬಿರುಕು, ₹110 ಕೋಟಿ ವ್ಯರ್ಥನಾ? | Puttur Veterinary College building cracks expose weakness Locals are outraged threatened to protest against government | ದಕ್ಷಿಣ ಕನ್ನಡ

ಬೆಂಗಳೂರು ಸ್ಟಾರ್ ಬಿಲ್ಡರ್ಸ್ ಅಂಡ್ ಡೆವಲಪರ್ ಸಂಸ್ಥೆ ಕಾಮಗಾರಿ ನಿರ್ವಹಣೆ ಮಾಡಿದೆ. ಆದರೆ ಕಟ್ಟಡ ನಿರ್ಮಾಣವಾಗಿ 3 ವರ್ಷಗಳಾದ್ರು ಕಟ್ಟಡದ ಅಡಿಯಿಂದ ಮುಡಿಯವರೆಗೂ ಗೋಡೆಗಳಲ್ಲಿ ಬಿರುಕು ಬಿಟ್ಟಿರುವುದು ಗೋಚರಿಸುತ್ತಿದೆ. ಕಟ್ಟಡದ ಒಳಗಡೆ ಮಳೆ ನೀರು ಸೋರಿಕೆಯಾಗ್ತಿದ್ದು, ಒಳಗಡೆ ಅಲ್ಲಲ್ಲಿ ಪಾಚಿಯಾಗಿದೆ. ನೀರು ಸೋರಿಕೆ ಆಗದಂತೆ ಕಟ್ಟಡದ ಮೇಲೆ ಫೈಬರ್ ಶೀಟು ಅಳವಡಿಸಲಾಗಿದೆ. ಆದರೂ ಕಟ್ಟಡ ಸೋರುತ್ತಿದೆ.

2002ರಲ್ಲಿ ಅಂದಿನ ಸಿಎಂ ಡಿವಿ ಸದಾನಂದ ಗೌಡ ಪುತ್ತೂರು ಪಶು ವೈದ್ಯಕೀಯ ಕಾಲೇಜು ಮಂಜೂರು ಮಾಡಿದ್ದರು. 2016 ಅಕ್ಟೋಬರ್ 9ಕ್ಕೆ ಅಂದಿನ ಸಿಎಂ ಸಿದ್ದರಾಮಯ್ಯ ಶಿಲಾನ್ಯಾಸ ನೆರವೇರಿಸಿದ್ದರು. ಇಲ್ಲಿಯ ಬೇಡಿಕೆಗೆ ಅನುಗುಣವಾಗಿ ಮೊದಲ ಹಂತದಲ್ಲಿ 142 ಕೋಟಿ ಅನುದಾನ ಮಂಜೂರು ಮಾಡಲಾಗಿದ್ದು, 110 ಕೋಟಿಯಲ್ಲಿ 5 ಹಂತದ ಕಟ್ಟಡ ಕಾಮಗಾರಿ ನಿರ್ಮಾಣಕ್ಕೆ ಚಾಲನೆ ನೀಡಲಾಗಿತ್ತು. 2023 ಮಾರ್ಚ್ 25 ರಂದು ಬಿಜೆಪಿ ಸರ್ಕಾರದ ಅವಧಿ ಮುಗಿಯುವ ಸನಿಹದಲ್ಲಿದ್ದ ಸಮಯದಲ್ಲಿದ್ದ ಅಂದಿನ ಮುಖ್ಯಮಂತ್ರಿ ಬಸವರಾಜ್ ಬೊಮ್ಮಾಯಿ ಉದ್ಘಾಟನೆ ಮಾಡಿದ್ದರು. ಆ ಬಳಿಕವೂ ಇಲ್ಲಿ ಕೋರ್ಸ್ ಆರಂಭಿಸುವ ಯಾವ ಪ್ರಕ್ರಿಯೆಯೂ ಆರಂಭಗೊಂಡಿಲ್ಲ. ಕಾಲೇಜು ಕಟ್ಟಡಗಳು ಇಂದು ಭೂತ ಬಂಗಲೆಯಾಗಿದೆ. ಕಟ್ಟಡದ ಈ ದುಸ್ತಿತಿಗೆ ಸ್ಥಳೀಯರು ರೋಸಿ ಹೋಗಿದ್ದು, ಪ್ರತಿಭಟನೆ ಮಾಡುವ ಎಚ್ಚರಿಕೆಯನ್ನೂ ನೀಡಿದ್ದಾರೆ.

ಕೊಯಿಲದ ನಿರ್ಮಾಣವಾಗುತ್ತಿರುವ ಪಶುವೈದ್ಯಕೀಯ ಕಾಲೇಜು ನೆನೆಗುದಿಗೆ ಬಿದ್ದಿದೆ. ವಾಸ್ತವದಲ್ಲಿ ನೋಡಿದರೆ ಅದು ದೊಡ್ಡ ಭೂತ ಬಂಗಲೆಯಾಗಿದೆ. ಕಟ್ಟಡ ಉದ್ಘಾಟನೆ ಆಗಿ ಎರಡು ವರ್ಷ ಆಗಿದೆ, ಆ ಬಳಿಕ ಒಂದು ಹೆಜ್ಜೆ ಮುಂದಕ್ಕೆ ಹೋಗಿಲ್ಲ. ಪೌಂಡೇಷನ್ ನಿಂದ ಹಿಡಿದು, ಇಡೀ ಬಂಗಲೆಯ ಗೋಡೆಗಳು ಬಿರುಕು ಬಿಡುತ್ತಿದ್ದು, ಕಟ್ಟಡದ ಗುಣಮಟ್ಟವನ್ನು ನಾವು ಹೇಗಿದೆ ಅಂತ ನೋಡಲು ಇರುವ ಜೀವಂತ ಸಾಕ್ಷಿಯಾಗಿದೆ ಎಂದು ಸ್ಥಳೀಯ ನಿವಾಸಿ ಸಿದ್ಧೀಕ್ ನೀರಾಜೆ ಬೇಸರ ವ್ಯಕ್ತಪಡಿಸಿದ್ದಾರೆ.