ದಕ್ಷಿಣ ಕನ್ನಡ ಜಿಲ್ಲೆಗೆ ಆಗಮಿಸಿದ NDRF ತಂಡ, ಪ್ರವಾಹ ನಿರ್ವಹಣೆ ಪ್ರಾರಂಭ | Monsoon Rains: ದಕ್ಷಿಣ ಕನ್ನಡ ಜಿಲ್ಲೆಗೆ ಆಗಮಿಸಿದ NDRF ತಂಡ- ಪ್ರವಾಹ ನಿರ್ವಹಣೆ ಪ್ರಾರಂಭ | Monsoon Rains: NDRF team arrives in Dakshina Kannada district – flood management begins

ಸುಮಾರು 25 ಸದಸ್ಯರನ್ನೊಳಗೊಂಡ ಈ ತಂಡ ಜಿಲ್ಲೆಯಲ್ಲಿ ನಡೆಯುವ ಎಲ್ಲಾ ಅನಾಹುತಗಳ ನಿರ್ವಹಣೆಯನ್ನು ಮಾಡಲಿದೆ. ದಕ್ಷಿಣ ಕನ್ನಡ ಮತ್ತು ಕೊಡಗು ಜಿಲ್ಲೆಗೆ ಈಗಾಗಲೇ ಆಗಮಿಸಿರುವ ಎರಡು ಪ್ರತ್ಯೇಕ ತಂಡಗಳು ತಮ್ಮ ಜೊತೆಗೆ ಪ್ರತಿಕೂಲ ಪರಿಸ್ಥಿತಿಯನ್ನು ಎದುರಿಸಲು ಬೇಕಾದ ಎಲ್ಲಾ ಸಾಮಾಗ್ರಿಗಳನ್ನೂ ತಂದಿವೆ. ಪುತ್ತೂರನ್ನು ಕೇಂದ್ರವಾಗಿರಿಸಿಕೊಂಡು ಕಾರ್ಯಾಚರಣೆ ನಡೆಸಲಿರುವ ಈ ತಂಡಕ್ಕೆ ಪುತ್ತೂರು ಎಪಿಎಂಸಿ ಸಭಾಂಗಣದಲ್ಲಿ ತಂಗಲು ವ್ಯವಸ್ಥೆಯನ್ನು ಜಿಲ್ಲಾಡಳಿತದ ಮೂಲಕ ಮಾಡಲಾಗಿದೆ.

25 ಸದಸ್ಯರ ಜೊತೆಗೆ ಈ ತಂಡದಲ್ಲಿ ಒಂದು ನಾಯಿ ಕೂಡಾ ಇದ್ದು, ಈ ನಾಯಿಯ ಜವಾಬ್ದಾರಿಯೂ ವಿಶೇಷವಾದುದ್ದಾಗಿದೆ‌. ಜರ್ಮನ್ ಶೆಫರ್ಡ್ ಜಾತಿಗೆ ಸೇರಿದ ಈ ನಾಯಿ ವಿಪತ್ತು ತಂಡ ಕಾರ್ಯಾಚರಣೆಗೆ ತೆರಳುವ ಸಂದರ್ಭದಲ್ಲಿ ತಂಡದ ಜೊತೆಗೆ ತೆರಳಲಿದೆ. ಕೆಲವು ಅನಿವಾರ್ಯ ಸಂದರ್ಭದಲ್ಲಿ ಮಾತ್ರವೇ ಈ ನಾಯಿಯನ್ನು ಬಳಕೆ ಮಾಡಲಾಗುತ್ತಿದ್ದು, ಭೂಕುಸಿತ ಅಥವಾ ಜನರ ಪ್ರಾಣಹಾನಿ ಸಂಭವಿಸುವಂತಹ ಘಟನೆಗಳು ನಡೆದಾಗ ಈ ನಾಯಿಯನ್ನು ಹೆಚ್ಚಾಗಿ ಕಾರ್ಯಾಚರಣೆಯಲ್ಲಿ ಬಳಸಲಾಗುತ್ತದೆ. ಮಣ್ಣಿನಡಿಗೆ ಸಿಲುಕಿಕೊಂಡವರನ್ನು ಪತ್ತೆಹಚ್ಚುವ ಕೆಲಸವನ್ನು ಈ ನಾಯಿ ಮಾಡುವುದಲ್ಲದೆ, ಅವರ ರಕ್ಷಣೆಯಲ್ಲೂ ಇದರ ಪಾತ್ರ ಪ್ರಮುಖವಾಗಿದೆ.

ಅದಲ್ಲದೆ ಈ ತಂಡದಲ್ಲಿ ಪ್ರವಾಹ ಭೀತಿ ಎದುರಾದ ಪ್ರದೇಶಗಳಲ್ಲಿ ಬಳಸಲು ಬೋಟ್ ವ್ಯವಸ್ಥೆ, ಮರ- ಮುಟ್ಟುಗಳನ್ನು ಕಡಿಯಲು ಬೇಕಾದ ವಿಶೇಷ ಕಟ್ಟಿಂಗ್ ಮಿಷಿನ್‌ಗಳು, ಸೇಫ್ ಗಾರ್ಡ್ ಗಳು ಸೇರಿದಂತೆ ಎಲ್ಲಾ ವ್ಯವಸ್ಥೆಗಳೂ ಇವೆ. ರಾಜ್ಯಕ್ಕೆ ಬಂದ ಈ ಎರಡು ತಂಡ ಆಂಧ್ರ ಪ್ರದೇಶದ ರಾಯಗಢದಿಂದ ಬಂದಿದ್ದು, ಈ ತಂಡದಲ್ಲಿ ಕೇಂದ್ರೀಯ ಅರೆಸೇನಾ ಪಡೆಗಳಾದ ಸಿ.ಆರ್.ಪಿ.ಎಫ್, ಬಿ.ಎಸ್.ಎಫ್, ಸಿ.ಐ.ಎಸ್.ಎಫ್ ನಿಂದ ಆಯ್ಕೆ ಮಾಡಿದ ಯೋಧರೇ ಇದ್ದು, ಎಂತಹ ಕಠಿಣ ಸಂದರ್ಭದಲ್ಲಿ ಕಾರ್ಯಾಚರಣೆ ನಡೆಸುವ ಸಾಮರ್ಥ್ಯವನ್ನು ಈ ದಳ ಹೊಂದಿದೆ.