IND vs ENG: 5ನೇ ಟೆಸ್ಟ್​​ನ 2ನೇ ದಿನವೇ ಇಂಗ್ಲೆಂಡ್ ತಂಡಕ್ಕೆ ದೊಡ್ಡ ಹಿನ್ನಡೆ! ಸ್ಟಾರ್ ಆಟಗಾರ ಪಂದ್ಯದಿಂದಲೇ ಔಟ್ | england all-rounder chris woakes ruled out of final test vs india due to injury | ಕ್ರೀಡೆ

ಜೇಮೀ ಓವರ್ಟನ್ ಎಸೆದ 57 ನೇ ಓವರ್‌ನಲ್ಲಿ ಈ ಘಟನೆ ಸಂಭವಿಸಿದೆ. ಆ ಓವರ್‌ನಲ್ಲಿ, ಕರುಣ್ ನಾಯರ್ ಐದನೇ ಎಸೆತದಲ್ಲಿ ಮಿಡ್-ಆಫ್ ಕಡೆಗೆ ಶಾಟ್ ಹೊಡೆದರು. ವೋಕ್ಸ್ ಚೆಂಡನ್ನು ನಿಲ್ಲಿಸಲು ಓಡಿದರು. ಆ ಪ್ರಯತ್ನದಲ್ಲಿ, ವೋಕ್ಸ್ ಅವರ ಎಡ ಭುಜವು ನೆಲಕ್ಕೆ ಬಲವಾಗಿ ಬಡಿಯಿತು. ಅವರು ನೋವಿನಿಂದ ನರಳಾಡಿದರು. ಅವರು ತಕ್ಷಣ ಫಿಸಿಯೋ ಸಹಾಯದಿಂದ ಮೈದಾನವನ್ನು ತೊರೆದರು. ಸ್ಕ್ಯಾನ್‌ನಲ್ಲಿ ಅದು ಗಂಭೀರ ಗಾಯ ಎಂದು ತಿಳಿದುಬಂದಿದೆ.

ಇದರೊಂದಿಗೆ, ಅವರು ಐದನೇ ಟೆಸ್ಟ್‌ನಿಂದ ಪಂದ್ಯದ ಮಧ್ಯದಲ್ಲೇ ಹಿಂದೆ ಸರಿಯುವಂತಾಗಿದೆ. ಈ ಪಂದ್ಯದಲ್ಲಿ ವೋಕ್ಸ್ ಅನುಪಸ್ಥಿತಿಯು ಇಂಗ್ಲೆಂಡ್ ತಂಡದ ಗೆಲುವಿನ ಸಾಧ್ಯತೆಗಳ ಮೇಲೆ ಖಂಡಿತವಾಗಿಯೂ ಪರಿಣಾಮ ಬೀರಲಿದೆ. ಇಂಗ್ಲೆಂಡ್ ತಂಡವು ತಮ್ಮ ಸ್ಟಾರ್ ವೇಗಿಗಳಾದ ಬೆನ್ ಸ್ಟೋಕ್ಸ್ ಮತ್ತು ಜೋಫ್ರಾ ಆರ್ಚರ್ ಇಲ್ಲದೆ ಈ ಪಂದ್ಯವನ್ನು ಪ್ರವೇಶಿಸಿತು. ಇದೀಗ ವೋಕ್ಸ್ ಕೂಡ ಗಾಯಗೊಂಡಿರುವುದರಿಂದ ಇಂಗ್ಲೆಂಡ್‌ನ ಬೌಲಿಂಗ್ ವಿಭಾಗ ಸ್ವಲ್ಪ ದುರ್ಬಲವಾಗುವ ಸಾಧ್ಯತೆ ಇದೆ.

ಈ ಸರಣಿಯಲ್ಲಿ ಎಲ್ಲಾ ಪಂದ್ಯಗಳನ್ನು ಆಡಿದ ವೋಕ್ಸ್ 181 ಓವರ್‌ಗಳನ್ನು ಬೌಲಿಂಗ್ ಮಾಡಿ 11 ವಿಕೆಟ್‌ಗಳನ್ನು ಕಬಳಿಸಿದ್ದರು. ವೋಕ್ಸ್ ಗಾಯಗೊಳ್ಳುವ ಮೊದಲು ಒಂದು ವಿಕೆಟ್ ಪಡೆದಿದ್ದರು. ಅವರು ಟೀಮ್ ಇಂಡಿಯಾದ ಪ್ರಬಲ ಅಸ್ತ್ರವಾಗಿದ್ದ ಕೆ.ಎಲ್. ರಾಹುಲ್ ಅವರನ್ನು ಕ್ಲೀನ್ ಬೌಲ್ಡ್ ಮಾಡಿ ದೊಡ್ಡ ಬ್ರೇಕ್ ನೀಡಿದ್ದರು.

ಪಂದ್ಯದ ವಿಷಯಕ್ಕೆ ಬಂದರೆ, ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡ ಭಾರತ ತಂಡವು ಮೊದಲ ದಿನದಾಟದ ಅಂತ್ಯಕ್ಕೆ 6 ವಿಕೆಟ್‌ಗಳ ನಷ್ಟಕ್ಕೆ 204 ರನ್ ಗಳಿಸಿತ್ತು. ಯಶಸ್ವಿ ಜೈಸ್ವಾಲ್ 2, ಕೆ.ಎಲ್. ರಾಹುಲ್ 14, ಸಾಯಿ ಸುದರ್ಶನ್ 38, ಶುಭ್ಮನ್ ಗಿಲ್ 21, ರವೀಂದ್ರ ಜಡೇಜ 9, ಧ್ರುವ್ ಜುರೆಲ್ 19 ರನ್ ಗಳಿಸಿ ಔಟಾಗಿದ್ದರು. ಕರುಣ್ ನಾಯರ್ (52) ಮತ್ತು ವಾಷಿಂಗ್ಟನ್ ಸುಂದರ್ (19) ಕ್ರೀಸ್‌ನಲ್ಲಿದ್ದರು.

ಗಸ್ ಅಟ್ಕಿನ್ಸನ್​ 33ಕ್ಕೆ 5 ವಿಕೆಟ್ ಪಡೆದರೆ, ಜೋಶ್ ಟಂಗ್ 57ಕ್ಕೆ3 ವಿಕೆಟ್ ಪಡೆದು ಮಿಂಚಿದರು. ಕ್ರಿಸ್ ವೋಕ್ಸ್ 46ಕ್ಕೆ1 ವಿಕೆಟ್ ಪಡೆದರು. ದುರಾದೃಷ್ಟವಶಾತ್ ವೋಕ್ಸ್ ಮೊದಲ ದಿನವೇ ಗಾಯಗೊಂಡು ಈ ಪಂದ್ಯದಿಂದ ಹೊರಬಿದ್ದಿದ್ದಾರೆ. ಮುಂದಿನ ಇನ್ನಿಂಗ್ಸ್​​ನಲ್ಲಿ ವೋಕ್ಸ್ ಇಲ್ಲದೆ ಕೇವಲ 3 ವೇಗಿ ಹಾಗೂ ಸ್ಪಿನ್ನರ್ ಜಾಕೋಬ್ ಬೆಥೆಲ್ ಮಾತ್ರ ಬೌಲಿಂಗ್ ಮಾಡಲಿದ್ದಾರೆ.