Abhimanyu Mishra: ಮತ್ತೊಂದು ಇತಿಹಾಸ ಬರೆದ ಗ್ರ್ಯಾಂಡ್‌ಮಾಸ್ಟರ್ ಅಭಿಮನ್ಯು ಮಿಶ್ರಾ! ಹಾಲಿ ಚಾಂಪಿಯನ್‌ ಡಿ. ಗುಕೇಶ್ ವಿರುದ್ಧ ಭರ್ಜರಿ ಗೆಲುವು‌ | Abhimanyu Mishra defeats D Gukesh at age 16 | ಕ್ರೀಡೆ

ಉಜ್ಬೇಕಿಸ್ತಾನ್‌ನ ಸಮರ್ಕಂಡ್‌ನಲ್ಲಿ ನಡೆದ FIDE ಗ್ರ್ಯಾಂಡ್ ಸ್ವಿಸ್ ಪಂದ್ಯಾವಳಿಯ 5ನೇ ಸುತ್ತಿನಲ್ಲಿ 16 ವರ್ಷದ ಅಮೇರಿಕನ್ ಆಟಗಾರ ಪ್ರಸ್ತುತ ವಿಶ್ವ ಚಾಂಪಿಯನ್ ಡಿ ಗುಕೇಶ್ ಅವರನ್ನು ಸೋಲಿಸಿ ಚದುರಂಗದ ಅಂತರಂಗ ಭೇದಿಸಿದ್ದಾರೆ. ವಿಶ್ವದ ಅತ್ಯಂತ ಕಿರಿಯ ಗ್ರ್ಯಾಂಡ್‌ಮಾಸ್ಟರ್ ಆಗಿರುವ 16 ವರ್ಷದ ಅಭಿಮನ್ಯು ಮಿಶ್ರಾ, 61-ನಡೆಗಳ ಹೋರಾಟದ ನಂತರ ಹಾಲಿ ವಿಶ್ವ ಚಾಂಪಿಯನ್ ಡೊಮ್ಮರಾಜು ಗುಕೇಶ್ ಅವರನ್ನು ಸೋಲಿಸಿದರು.

ಗೆಲುವಿನ ನಂತರ FIDE ಜೊತೆ ಮಾತನಾಡಿದ ಮಿಶ್ರಾ, “ಟೂರ್ನಮೆಂಟ್ ನಾನು ಊಹಿಸಿದ್ದಕ್ಕಿಂತ ಉತ್ತಮವಾಗಿ ನಡೆಯುತ್ತಿದೆ. ನಾನು ಈ ಫಾರ್ಮ್ ಅನ್ನು ಮುಂದುವರಿಸಿದರೆ ಟೂರ್ನಮೆಂಟ್ ಗೆಲ್ಲುವ ಅವಕಾಶವಿದೆ. ನಿನ್ನೆ ಕೂಡ, ನಾನು ಪ್ರಾಗ್ ವಿರುದ್ಧ ಕೆಲವು ತಪ್ಪುಗಳನ್ನು ಮಾಡಿದೆ. ನಾನು ಈ ಆಟಗಾರರಿಗಿಂತ ಕೀಳು ಎಂದು ನನಗೆ ಎಂದಿಗೂ ಅನಿಸಲಿಲ್ಲ. ನಾನು ಅವರೊಂದಿಗೆ ಸರಿಸಮಾನನಾಗಿದ್ದೇನೆ ಎಂದು ನಾನು ಭಾವಿಸುತ್ತೇನೆ” ಎಂದು ಗೆಲುವನ್ನು ಸಂಭ್ರಮಿಸಿದರು.

ಫೆಬ್ರವರಿ 5, 2009ರಲ್ಲಿ ಜನಿಸಿದ ಅಭಿಮನ್ಯು ಮಿಶ್ರಾ ನ್ಯೂಜೆರ್ಸಿಯಲ್ಲಿ ನೆಲೆಸಿದ್ದಾರೆ. ಚೆಸ್‌ ಲೋಕದಲ್ಲಿ ಈ ಹೆಸರು ತುಂಬಾ ಪ್ರಚಲಿತವಾಗಿದ್ದು,  ಜೂನ್ 2021 ರಲ್ಲಿ ಚೆಸ್ ಇತಿಹಾಸದಲ್ಲಿ ಅತ್ಯಂತ ಕಿರಿಯ ಗ್ರ್ಯಾಂಡ್‌ಮಾಸ್ಟರ್ ಆಗುವ ಮೂಲಕ ಸುದ್ದಿಯಾಗಿದ್ದರು. ಅಭಿಮನ್ಯು ಮಿಶ್ರಾ 12 ವರ್ಷ, 4 ತಿಂಗಳು, 25 ದಿನಗಳಲ್ಲಿ ಗ್ರ್ಯಾಂಡ್ ಮಾಸ್ಟರ್ ಸಾಧನೆ ಮಾಡಿದ್ದರು.

ಜರ್ಮನಿಯ ಮಥಿಯಾಸ್ ಬ್ಲೂಬಾಮ್ ವಿರುದ್ಧ ಪ್ರಜ್ಞಾನಂದ ಕೂಡ ಸೋಲನ್ನು ಅನುಭವಿಸಿದರು. ಈ ಪಂದ್ಯಾವಳಿಯಲ್ಲಿ ಇಬ್ಬರು ಮಲಯಾಳಿ ಗ್ರ್ಯಾಂಡ್‌ಮಾಸ್ಟರ್‌ಗಳಾದ ನಿಹಾಲ್ ಸರಿನ್ ಮತ್ತು ಎಸ್ ಎಲ್ ನಾರಾಯಣನ್ ಅಜೇಯರಾಗಿ ಉಳಿದಿದ್ದಾರೆ.