Train News: ಕರಾವಳಿ ರೈಲು ಹಳಿ ಇತಿಹಾಸದಲ್ಲಿ ಹೊಸ ಮೈಲಿಗಲ್ಲು, 46 ವರ್ಷಗಳ ಬಳಿಕ ಈ ಸೇವೆ! | Mangaluru-Bengaluru train | ದಕ್ಷಿಣ ಕನ್ನಡ

ಸುಬ್ರಹ್ಮಣ್ಯ ರೋಡ್ ನಿಲ್ದಾಣದಿಂದ ಸಕಲೇಶಪುರ ನಿಲ್ದಾಣವರೆಗಿನ ವಿಭಾಗದಲ್ಲಿ ಶೇ.25 ಹಳಿ ವಿದ್ಯುದೀಕರಣ ಕಾರ್ಯ ಮುಗಿದಿದೆ. ಸುಬ್ರಹ್ಮಣ್ಯ ರೋಡ್-ಶಿರಿಬಾಗಿಲು ನಡುವಿನ 14 ಕಿ.ಮೀ. ಮತ್ತು ದೋಣಿಗಲ್- ಸಕಲೇಶಪುರ ನಡುವಿನ 9 ಕಿ.ಮೀ. ವಿದ್ಯುದೀಕರಣ ಕಾಮಗಾರಿ ಕಳೆದ ಏಪ್ರಿಲ್‍ನಲ್ಲಿ ಮುಗಿದಿದೆ. ಶಿರಿಬಾಗಿಲು- ದೋಣಿಗಲ್ ನಡುವಿನ 32 ಕಿ.ಮೀ. ವಿದ್ಯುದೀಕರಣ ಕಾರ್ಯ ಪ್ರಸ್ತುತ ನಡೆಯುತ್ತಿದೆ.

ಮಂಗಳೂರು ಸೆಂಟ್ರಲ್ ನಿಲ್ದಾಣದಿಂದ ಸುಬ್ರಹ್ಮಣ್ಯ ರೋಡ್ ವರೆಗಿನ ಹಳಿ ವಿದ್ಯುದೀಕರಣ ಪೂರ್ಣಗೊಂಡು ಯಶಸ್ವಿಯಾಗಿ ಪರೀಕ್ಷೆ ಮಾಡಲಾಗಿದೆ. ಸೆ.15 ರಿಂದ 3 ಪ್ಯಾಸೆಂಜರ್ ರೈಲುಗಳು ವಿದ್ಯುತ್ ಮೂಲಕ ಚಲಿಸಲಿವೆ. ಹಳಿಯ ಮೇಲ್ಬಾಗದಲ್ಲಿ ವಿದ್ಯುತ್ ತಂತಿ ಎಳೆಯಲಾಗಿದ್ದು, ಇದನ್ನು ರೈಲು ಎಂಜಿನ್‍ಗೆ ಮತ್ತೊಂದು ತಂತಿಯ ಮೂಲಕ ಜೋಡಿಸಲಾಗುತ್ತದೆ. ರೈಲು ಚಲಿಸುತ್ತಿದ್ದಂತೆ ಈ ಸಂಪರ್ಕಿತ ತಂತಿಯೂ ವಿದ್ಯುತ್ ಸ್ವೀಕರಿಸುತ್ತಲೇ ಚಲಿಸುತ್ತದೆ.

1979 ರಲ್ಲಿ ಮೊದಲ ಬಾರಿಗೆ ಮಂಗಳೂರು ಪುತ್ತೂರು- ಸುಬ್ರಹ್ಮಣ್ಯ ಮೀಟರ್‍ಗೇಜ್ ರೈಲು ಸೇವೆ ಆರಂಭವಾಗಿತ್ತು. ಬಳಿಕ 1995 ರಲ್ಲಿ ಈ ಹಳಿಯನ್ನು ಬ್ರಾಡ್‍ಗೇಜ್ ಹಳಿಯಾಗಿ ಪರಿವರ್ತನೆಗಾಗಿತ್ತು. ಇದರಿಂದಾಗಿ ಮಂಗಳೂರು-ಪುತ್ತೂರು- ಸುಬ್ರಹ್ಮಣ್ಯ ಮೀಟರ್ ಗೇಜ್ ಸೇವೆಯೂ ಸ್ಥಗಿತಗೊಂಡಿದೆ. 2003: ಪುತ್ತೂರು- ಸುಬ್ರಹ್ಮಣ್ಯ ರೋಡ್ ಬ್ರಾಡ್ ಗೇಜ್ ಹಳಿ ಪರಿವರ್ತನೆ ಕಾಮಗಾರಿ ಪೂರ್ಣಗೊಂಡಿದೆ. 2006 ರಲ್ಲಿ ಸುಬ್ರಹ್ಮಣ್ಯ ರೋಡ್-ಸಕಲೇಶಪುರ ಘಾಟಿ ವಿಭಾಗದ ಬ್ರಾಡ್‍ಗೇಜ್ ಪೂರ್ಣಗೊಂಡು ಈ ಹಳಿಯಲ್ಲಿ ಗೂಡ್ಸ್ ರೈಲು ಸಂಚಾರ ಆರಂಭಗೊಂಡಿತ್ತು.

ಹಳಿ ವಿದ್ಯುದೀಕರಣದ ಕಾಮಗಾರಿಯನ್ನು ಶಿರಾಡಿಘಾಟ್ ನಲ್ಲಿ ಮಳೆಗಾಲದ ಸಮಯದಲ್ಲಿ ಆರಂಭಿಸಲಾಗಿದೆ. ದುರ್ಗಮ ಘಾಟಿ ಪ್ರದೇಶವಾಗಿರುವ ಕಾರಣ ಸಲಕರಣೆಗಗಳ ಸಾಗಾಟ ಮತ್ತು ಕಾಮಗಾರಿ ನಿರ್ವಹಣೆ ಕಷ್ಟಕರವಾಗಿದೆ. ಹೀಗಾಗಿ ಜೂನ್ 1ರಿಂದ ಮಂಗಳೂರು-ಬೆಂಗಳೂರು ಹಗಲು ರೈಲುಗಳ ಸಂಚಾರ ಸ್ಥಗಿತಗೊಳಿಸಿ ಹಗಲು ಹೊತ್ತು ಕೆಲಸ ಮಾಡಲಾಗುತ್ತಿದೆ. ರಾತ್ರಿ ರೈಲು ಮಾತ್ರ ಸಂಚರಿಸುತ್ತಿದೆ. 154 ದಿನಗಳ ನಿಬರ್ಂಧ ವಿಧಿಸಲಾಗಿದ್ದು, ಅಕ್ಟೋಬರ್ ಕೊನೆಯ ವೇಳೆಗೆ ವಿದ್ಯುದೀಕರಣ ಕಾಮಗಾರಿ ಮುಗಿಯುವ ಸಾಧ್ಯತೆಯಿದೆ.