Women’s World Cup 2025: ಮೊದಲ ಪಂದ್ಯದಲ್ಲೇ ಪಾಕಿಸ್ತಾನಕ್ಕೆ ಆಘಾತ; ಬಾಂಗ್ಲಾ ವನಿತೆಯರಿಗೆ ಸುಲಭ ಗೆಲುವು / Women’s ODI World Cup 2025 Pakistan vs Bangladesh match result | ಕ್ರೀಡೆ

ಮಹಿಳಾ ಏಕದಿನ ವಿಶ್ವಕಪ್ 2025 ರ ಮೂರನೇ ಪಂದ್ಯದಲ್ಲಿ ಟಾಸ್ ಗೆದ್ದ ಪಾಕಿಸ್ತಾನ ನಾಯಕಿ ಫಾತಿಮಾ ಸನಾ ಮೊದಲು ಬ್ಯಾಟಿಂಗ್ ಮಾಡಲು ನಿರ್ಧರಿಸಿದರು. ಆದರೆ ನಾಯಕಿ ಫಾತಿಮಾ ಸನಾ ನಿರೀಕ್ಷೆಗೆ ತಕ್ಕ ಪ್ರತಿಫಲ ಸಿಗಲಿಲ್ಲ. ಬಾಂಗ್ಲಾದೇಶ ಸಂಘಟಿತ ಬೌಲಿಂಗ್ ದಾಳಿಗೆ ಪಾಕಿಸ್ತಾನ ಕೇವಲ 38.3 ಓವರ್​ಗಳಲ್ಲಿ 129 ರನ್​ಗಳಿಗೆ ಆಲೌಟಾಯಿತು. ಈ ಸುಲಭ ಗುರಿ ಬೆನ್ನಟ್ಟಿದ ಬಾಂಗ್ಲಾದೇಶ ರುಬಿಯಾ ಹೈದರ್ ಅರ್ಧಶತಕದ ನೆರವಿನಿಂದ 31.1 ಓವರ್​ಗಳಲ್ಲಿ ಮೂರು ವಿಕೆಟ್ ಕಳೆದುಕೊಂಡು ಗೆಲುವಿನ ನಗೆ ಬೀರಿತು.

ಪಾಕಿಸ್ತಾನ ನೀಡಿದ 130 ರನ್​ಗಳ ಗುರಿ ಬೆನ್ನಟ್ಟಿದ ಬಾಂಗ್ಲಾದೇಶ ತಂಡವು 113 ಎಸೆತಗಳು ಬಾಕಿ ಇರುವಾಗ 7 ವಿಕೆಟ್‌ಗಳ ಭರ್ಜರಿ ಜಯಗಳಿಸುವಲ್ಲಿ ಯಶಸ್ವಿಯಾಯಿತು. ಬಾಂಗ್ಲಾದೇಶದ ಆರಂಭಿಕ ಬ್ಯಾಟರ್ ರುಬಿಯಾ ಹೈದರ್ ಅದ್ಭುತ ಬ್ಯಾಟಿಂಗ್ ಪ್ರದರ್ಶನ ನೀಡಿದರು. ಅವರು 77 ಎಸೆತಗಳಲ್ಲಿ 70.12 ಸ್ಟ್ರೈಕ್ ರೇಟ್‌ನಲ್ಲಿ 8 ಬೌಂಡರಿಗಳ ನೆರವಿನಿಂದ ಅಜೇಯ 54 ರನ್‌ಗಳನ್ನು ಗಳಿಸಿದರು. ರುಬಿಯಾ ಹೊರತುಪಡಿಸಿ, ನಾಯಕಿ ನಿಗರ್ ಸುಲ್ತಾನಾ 44 ಎಸೆತಗಳಲ್ಲಿ 23 ರನ್ ಗಳಿಸಿದರೆ, ಐದನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್ ಮಾಡಿದ ಶೋಭನಾ ಮೊಸ್ತಾರಿ ಅಜೇಯ 24 ರನ್‌ಗಳ ಕೊಡುಗೆ ನೀಡಿದರು. ಫರ್ಗಾನಾ ಹೋಕ್ 2, ಶರ್ಮಿನ್ ಅಖ್ತರ್ 10 ಮತ್ತು ನಿಗರ್ ಸುಲ್ತಾನ 23 ರನ್ ಗಳಿಸಿ ವಿಕೆಟ್ ಕಳೆದುಕೊಂಡರು.

ಇದಕ್ಕೂ ಮುನ್ನ ಮೊದಲ ಬ್ಯಾಟಿಂಗ್ ಮಾಡಿದ ಪಾಕಿಸ್ತಾನ ಉತ್ತಮ ಪ್ರದರ್ಶನ ನೀಡುವಲ್ಲಿ ವಿಫಲವಾಯಿತು. ಆರಂಭದಲ್ಲೇ ಬಾಂಗ್ಲಾದೇಶದ ವೇಗಿ ಮರುಫಾ ಅಕ್ತರ್ 2 ವಿಕೆಟ್ ಕಬಳಿಸುವ ಮೂಲಕ ಪಾಕಿಸ್ತಾನ ತಂಡಕ್ಕೆ ಶಾಕ್ ನೀಡಿದರು. ಒಮೈಮಾ ಸೊಹೈಲ್ ಮತ್ತು ಸಿದ್ರಾ ಅಮೀನ್ ಬಂದ ದಾರಿಗೆ ಸುಂಕವಿಲ್ಲದಂತೆ ಶೂನ್ಯಕ್ಕೆ ವಿಕೆಟ್ ಕಳೆದುಕೊಂಡು ನಿರಾಸೆ ಮೂಡಿಸಿದರು. ಬಳಿಕ ಒಂದಾದ ಮುನೀಬಾ ಅಲಿ ಮತ್ತು ರಮೀನ್ ಶಮೀಮ್ ಎಚ್ಚರಿಕೆ ಆಟವಾಡಿದರು. ಉತ್ತಮವಾಗಿ ಆಡುತ್ತಿದ್ದ ಮುನೀಬಾ ಅಲಿ 17 ರನ್ ಗಳಿಸಿ ಔಟಾದರು.

ಬಾಂಗ್ಲಾದೇಶ ತಂಡದ ಪರ ಶೋರ್ನಾ ಅಖ್ತರ್ ಮೂರು ವಿಕೆಟ್ ಪಡೆದು ಮಿಂಚಿದರು. ನಹಿದಾ ಅಖ್ತರ್ ಮತ್ತು ಮರುಫಾ ಅಖ್ತರ್ ತಲಾ ಎರಡು ವಿಕೆಟ್ ಪಡೆದರೆ, ನಿಶಿತಾ ಅಖ್ತರ್ ನಿಶಿ, ಫಹಿಮಾ ಖಾತುನ್ ಮತ್ತು ರಬೇಯಾ ಖಾನ್ ತಲಾ ಒಂದು ವಿಕೆಟ್ ಕಬಳಿಸಿದರು.