Last Updated:
Shubman Gill: ಗಿಲ್ ಬಾರಿಸಿದ ಆ ಒಂದು ಶತಕ ಇದೆಯಲ್ಲಾ, ಅದು ಬರೀ ದಾಖಲೆ ಬರೆದಿದ್ದಲ್ಲ, ಲಕ್ಷಾಂತರ ಹೃದಯಗಳಿಗೂ ಲಗ್ಗೆ ಇಟ್ಟಿದೆ. ಒಂದ್ಕಡೆ ಬ್ಯಾಟ್‌ನಿಂದ ರನ್ ಹೊಳೆ ಹರಿಸುತ್ತಿದ್ದರೆ, ಇನ್ನೊಂದ್ಕಡೆ ಅವರ ನಗುವಿಗೆ, ಆಟಕ್ಕೆ ಮನಸೋತ ಹುಡುಗಿಯರ ಬಳಗವೇ ಇದೆ.
ಅಬ್ಬಾ! ಏನ್ ಆಟ, ಏನ್ ಸ್ಟೈಲು! ಟೀಂ ಇಂಡಿಯಾದ (Team India) ಯುವ ನಾಯಕ ಶುಭಮನ್ ಗಿಲ್ (Shubman Gill) ಸದ್ಯಕ್ಕೆ ಕ್ರಿಕೆಟ್ ಜಗತ್ತಿನ ಹಾಟ್ ಟಾಪಿಕ್. ದೆಹಲಿಯಲ್ಲಿ ವೆಸ್ಟ್ ಇಂಡೀಸ್ (West Indies) ವಿರುದ್ಧ ನಡೆಯುತ್ತಿರುವ ಟೆಸ್ಟ್‌ನಲ್ಲಿ ಬಾರಿಸಿದ ಆ ಒಂದು ಶತಕ ಇದೆಯಲ್ಲಾ, ಅದು ಬರೀ ದಾಖಲೆ ಬರೆದಿದ್ದಲ್ಲ, ಲಕ್ಷಾಂತರ ಹೃದಯಗಳಿಗೂ ಲಗ್ಗೆ ಇಟ್ಟಿದೆ. ಒಂದ್ಕಡೆ ಬ್ಯಾಟ್‌ನಿಂದ ರನ್ ಹೊಳೆ ಹರಿಸುತ್ತಿದ್ದರೆ, ಇನ್ನೊಂದ್ಕಡೆ ಅವರ ನಗುವಿಗೆ, ಆಟಕ್ಕೆ ಮನಸೋತ ಹುಡುಗಿಯರ ಬಳಗವೇ ಇದೆ.
ದೆಹಲಿ ಟೆಸ್ಟ್ ಪಂದ್ಯ ನಡೆಯುತ್ತಿತ್ತು. ಗಿಲ್ ಗಂಭೀರವಾಗಿ ಬ್ಯಾಟಿಂಗ್ ಮಾಡುತ್ತಿದ್ದರು. ಆಗಲೇ ಕ್ಯಾಮೆರಾ ಕಣ್ಣು ಗ್ಯಾಲರಿಯಲ್ಲಿದ್ದ ಒಬ್ಬ ಸುಂದರ ಹುಡುಗಿಯ ಕಡೆ ತಿರುಗಿದ್ದು. ಆ ಹುಡುಗಿ ಕೈಯಲ್ಲಿ ಒಂದು ಪೋಸ್ಟರ್ ಹಿಡಿದುಕೊಂಡಿದ್ದಳು, ಅದರಲ್ಲಿ ದೊಡ್ಡ ಅಕ್ಷರಗಳಲ್ಲಿ “ನಾನು ಶುಭಮನ್ ಅವರನ್ನು ಪ್ರೀತಿಸುತ್ತೇನೆ” ಅಂತ ಬರೆದಿತ್ತು. ಅಷ್ಟೇ! ಆ ಒಂದು ಫೋಟೋ ಸೋಶಿಯಲ್ ಮೀಡಿಯಾದಲ್ಲಿ ಬಿರುಗಾಳಿಯನ್ನೇ ಎಬ್ಬಿಸಿತು. “ಯಾರೀ ನಿಗೂಢ ಹುಡುಗಿ?” ಅಂತ ಪತ್ತೆ ಹಚ್ಚಲು ಶುರುಮಾಡಿದರು. ಈ ಘಟನೆ ಗಿಲ್ ಅವರ ಕ್ರೇಜ್ ಎಷ್ಟಿದೆ ಅನ್ನೋದಕ್ಕೆ ಒಂದು ಸಣ್ಣ ಉದಾಹರಣೆ ಅಷ್ಟೇ.
ಶುಭಮನ್ ಗಿಲ್‌ಗೆ ಈಗಿನ್ನೂ 26 ವರ್ಷ. ಆಟ, ನೋಟ ಎರಡರಲ್ಲೂ ಇವರು ಸೈ ಎನಿಸಿಕೊಂಡಿದ್ದಾರೆ. ಇವರ ಹೆಸರು ಆಗಾಗ ಕ್ರಿಕೆಟ್ ದೇವರು ಸಚಿನ್ ತೆಂಡೂಲ್ಕರ್ ಮಗಳು ಸಾರಾ ತೆಂಡೂಲ್ಕರ್ ಮತ್ತು ಬಾಲಿವುಡ್ ನಟಿ ಸಾರಾ ಅಲಿ ಖಾನ್ ಜೊತೆ ಕೇಳಿಬರುತ್ತಲೇ ಇರುತ್ತದೆ. ಆದರೆ ಗಿಲ್ ಮಾತ್ರ ಯಾವುದಕ್ಕೂ ತಲೆಕೆಡಿಸಿಕೊಳ್ಳದೆ, ತಮ್ಮ ಆಟದತ್ತ ಗಮನ ಹರಿಸಿದ್ದಾರೆ. ಅವರ ಆ ಮುದ್ದಾದ ನಗುವಿಗೆ ಮರುಳಾಗದವರೇ ಇಲ್ಲ. “ಗಿಲ್ ಯಾವಾಗ, ಯಾರನ್ನು ಮದುವೆಯಾಗುತ್ತಾರೆ?” ಅನ್ನೋದು ಮಿಲಿಯನ್ ಡಾಲರ್ ಪ್ರಶ್ನೆಯಾಗಿಯೇ ಉಳಿದಿದೆ.
ಈ ರೀತಿ ಹುಡುಗಿಯರು ಗಿಲ್‌ಗೆ ಪ್ರಪೋಸ್ ಮಾಡ್ತಿರೋದು ಇದೇ ಮೊದಲೇನಲ್ಲ. ಇದಕ್ಕೂ ಮುಂಚೆ ಭಾರತ-ಆಸ್ಟ್ರೇಲಿಯಾ ಸರಣಿ ನಡೆಯುತ್ತಿದ್ದಾಗ, ನಾಗ್ಪುರ ಟೆಸ್ಟ್‌ನಲ್ಲಿ ಒಬ್ಬ ಯುವತಿ “ಟಿಂಡರ್‌ನಲ್ಲಿ ಶುಭಮನ್ ಜೊತೆ ಮ್ಯಾಚ್ ಆಗಬಹುದೇ?” ಅಂತ ಬರೆದ ಪೋಸ್ಟರ್ ಹಿಡಿದು ವೈರಲ್ ಆಗಿದ್ದಳು. ಅಚ್ಚರಿ ಅಂದರೆ, ಅಭಿಮಾನಿಯ ಆಸೆಯನ್ನು ತಮಾಷೆಯಾಗಿಯೇ ತೆಗೆದುಕೊಂಡ ಗಿಲ್, ನಂತರ ಟಿಂಡರ್ ಡೇಟಿಂಗ್ ಆ್ಯಪ್‌ಗೆ ಸೇರಿಕೊಂಡಿದ್ದರು ಎಂದು ಹೇಳಲಾಗುತ್ತದೆ. ಅಭಿಮಾನಿಗಳಿಗಾಗಿ ಏನು ಬೇಕಾದರೂ ಮಾಡುವ ಈ ಗುಣವೇ ಅವರನ್ನು ಎಲ್ಲರಿಗೂ ಇಷ್ಟವಾಗುವಂತೆ ಮಾಡಿದೆ.
ಈ ಪ್ರೀತಿ, ಪ್ರೇಮ, ಪ್ರಪೋಸಲ್ ಎಲ್ಲ ಒಂದು ಕಡೆಯಾದರೆ, ಮೈದಾನದಲ್ಲಿ ಗಿಲ್ ನಿಜವಾದ ‘ರಾಜ’. ನಾಯಕನಾಗಿ ಒಂದು ಕ್ಯಾಲೆಂಡರ್ ವರ್ಷದಲ್ಲಿ ಅತಿ ಹೆಚ್ಚು ಟೆಸ್ಟ್ ಶತಕ ಬಾರಿಸಿದ ದಾಖಲೆ ವಿರಾಟ್ ಕೊಹ್ಲಿ ಹೆಸರಲ್ಲಿತ್ತು. ಕೊಹ್ಲಿ ಒಂದೇ ವರ್ಷದಲ್ಲಿ ನಾಯಕನಾಗಿ 5 ಶತಕಗಳನ್ನು ಬಾರಿಸಿದ್ದರು.
ಈಗ, ನಮ್ಮ ಶುಭಮನ್ ಗಿಲ್ ಕೂಡ ದೆಹಲಿ ಟೆಸ್ಟ್‌ನಲ್ಲಿ ಶತಕ ಬಾರಿಸುವ ಮೂಲಕ ಆ ದಾಖಲೆಯನ್ನು ಸರಿಗಟ್ಟಿದ್ದಾರೆ. ಒಂದೇ ವರ್ಷದಲ್ಲಿ ಕ್ಯಾಪ್ಟನ್ ಆಗಿ 5ನೇ ಶತಕ ಸಿಡಿಸಿ, ತಾನು ಕೊಹ್ಲಿಗೆ ಸರಿಸಾಟಿ ಎಂಬುದನ್ನು ಸಾಬೀತುಪಡಿಸಿದ್ದಾರೆ. ಅಂದಹಾಗೆ, ಕೊಹ್ಲಿ ಈ ಸಾಧನೆಯನ್ನು ಒಂದು ಸಲ ಅಲ್ಲ, ಎರಡು ಬಾರಿ (2017 ಮತ್ತು 2018) ಮಾಡಿದ್ದಾರೆ. ಆ ದಾಖಲೆ ಮುರಿಯಲು ಗಿಲ್‌ಗೆ ಇನ್ನೂ ಸಮಯವಿದೆ.
ಶುಭಮನ್ ಗಿಲ್ ಕೇವಲ ಒಬ್ಬ ಆಟಗಾರನಾಗಿ ಉಳಿದಿಲ್ಲ. ಅವರು ಯುವಜನತೆಯ ಹೊಸ ಐಕಾನ್ ಆಗಿ, ಹುಡುಗಿಯರ ಕನಸಿನ ರಾಜಕುಮಾರನಾಗಿ ಬೆಳೆದು ನಿಂತಿದ್ದಾರೆ. ಮೈದಾನದಲ್ಲಿ ದಾಖಲೆಗಳನ್ನು ಮುರಿಯುತ್ತಾ, ಮೈದಾನದ ಹೊರಗೆ ಹೃದಯಗಳನ್ನು ಗೆಲ್ಲುತ್ತಾ, ಗಿಲ್ ಅವರ ಪಯಣ ಹೀಗೆಯೇ ಮುಂದುವರಿಯಲಿ!
October 12, 2025 2:17 PM IST