Miracle?!:ರಸ್ತೆಯಲ್ಲಿ ಬೆಳೆಯಿತು ಬಾಳೆಗಿಡ! ಇದು ದಕ್ಷ ಅಧಿಕಾರಿಗಳ ಪವಾಡ, ಗುತ್ತಿಗೆದಾರನ ವರ, ಕುಕ್ಕೆ ರೋಡೀಗ ಯಮಲೋಕದ ದಾರಿ! | Banana plant protest over pothole issue on Mangaluru Subrahmanya road | ದಕ್ಷಿಣ ಕನ್ನಡ

ರಾಜ್ಯದ ಶ್ರೀಮಂತ ದೇಗುಲ ಕುಕ್ಕೆ ಸುಬ್ರಹ್ಮಣ್ಯಕ್ಕೆ ಉಪ್ಪಿನಂಗಡಿಯಿಂದ ಸಂಪರ್ಕ ಕಲ್ಪಿಸುವ ಈ ರಸ್ತೆ ಬಹುತೇಕ ಕೆಟ್ಟು ಹೋಗಿದೆ. ಅದರಲ್ಲೂ ಪೆರಿಯಡ್ಕ ಮತ್ತು ಆಸುಪಾಸಿನ ಭಾಗದಲ್ಲಿ ರಸ್ತೆ ತುಂಬಾ ಹೊಂಡಗಳೇ ತುಂಬಿ ತುಳುಕುತ್ತಿವೆ. ಈ ಹೊಂಡ-ಗುಂಡಿಗಳು ಎಷ್ಟು ಅಪಾಯಕಾರಿಯಾಗಿತ್ತೆಂದರೆ ದಿನಂಪ್ರತಿ ಲೆಕ್ಕವಿಲ್ಲದಷ್ಟು ದ್ವಿಚಕ್ರ ವಾಹನ ಸವಾರರು ಈ ಗುಂಡಿಗಳಿಂದಾಗಿ ಬಿದ್ದು ಗಾಯಗೊಂಡಿದ್ದಾರೆ.

ಕೈ-ಕಾಲು, ಸೊಂಟ ಮುರಿಸಿಕೊಂಡಿದ್ದಾರೆ. ದೂರಕ್ಕೆ ಈ ಹೊಂಡಗಳಿರುವ ಜಾಗ ಅತ್ಯಂತ ಸಮತಟ್ಟಾಗಿ ಕಾಣುತ್ತಿದ್ದರೂ, ಹೊಂಡಕ್ಕೆ ಬಿದ್ದ ಬಳಿಕವೇ ಇಲ್ಲಿ ಹೊಂಡವಿತ್ತು ಎನ್ನುವುದು ವಾಹನ ಸವಾರರ ಗಮನಕ್ಕೆ ಬಂದಿರುವ ಹಲವು ಘಟನೆಗಳ ಉದಾಹರಣೆಗಳು ಇಲ್ಲಿವೆ.  ಹೊಂಡಕ್ಕೆ ಡಾಂಬರು ಹಾಕಿ ಮುಚ್ಚುವ ಬದಲು ಕನಿಷ್ಟ ಪಕ್ಷ ಕಲ್ಲುಗಳನ್ನು ಹಾಕಿಯಾದರೂ ಹೊಂಡಗಳನ್ನು ಮುಚ್ಚಿ ಎಂದು ಅಧಿಕಾರಿಗಳಿಗೆ ಮನವಿ ಮಾಡಿದರೂ ಈವರೆಗೂ ಯಾವುದೇ ಕ್ರಮ ಕೈಗೊಳ್ಳದ ಹಿನ್ನಲೆಯಲ್ಲಿ ಸ್ಥಳೀಯರು ಈ ರೀತಿ ತಮ್ಮ ಆಕ್ರೋಶವನ್ನು ಹೊರಹಾಕಿದ್ದಾರೆ.

ಕೆಲವು ಕಡೆಗಳಲ್ಲಿ ಬಾಳೆಗಿಡ ಮಾತ್ರವಲ್ಲ, ತೆಂಗಿನ ಸಸಿಗಳನ್ನೂ ನೆಡುವಷ್ಟು ಆಳದ ಗುಂಡಿಗಳಿವೆ ಎನ್ನುವ ಸಾರ್ವಜನಿಕರು, ಅಧಿಕಾರಿಗಳು ಮತ್ತು ಸಂಬಂಧಪಟ್ಟವರು ಇನ್ನಾದರೂ ತಮ್ಮ ಸಂಕಷ್ಟಗಳಿಗೆ ಸ್ಪಂದಿಸಬೇಕು ಎಂದು ಒತ್ತಾಯಿಸಿದ್ದಾರೆ‌. ಇಲ್ಲದೇ ಹೋದಲ್ಲಿ ಉಳಿದ ಹೊಂಡಗಳಲ್ಲಿ ತೆಂಗಿನ ಸಸಿಗಳನ್ನೂ ನೆಡುವ ಕಾರ್ಯಕ್ರಮ ನಡೆಯಲಿದೆ ಎಂದೂ ಎಚ್ಚರಿಸಿದ್ದಾರೆ.