Kola:ಇಲ್ಲಿ ಕೋಲ ಕೊಡಬೇಕೆಂದರೆ 35 ವರ್ಷ ಕಾಯಬೇಕು! ಕಲ್ಲುರ್ಟಿಯೆಂಬ ಬೆಂಕಿಯಂತ ದೈವದ ಕಾರ್ಣಿಕ ಕ್ಷೇತ್ರ | Panolibailu Kallurti Daivasthana Nema Kola services booked for 35 years | ದಕ್ಷಿಣ ಕನ್ನಡ

ದಕ್ಷಿಣ ಕನ್ನಡ ಜಿಲ್ಲೆಯ ಹೆಸರಾಂತ ದೈವ ಕ್ಷೇತ್ರ ಪಣೋಲಿಬೈಲು ಕಲ್ಲುರ್ಟಿ ದೈವಸ್ಥಾನದಲ್ಲಿ ವಾರ್ಷಿಕ ನೇಮೋತ್ಸವ ಅದ್ಧೂರಿಯಾಗಿ ನಡೆದಿದೆ. ಸಜೀಪ ಮಾಗಣೆಯ ತಂತ್ರಿ ಎಂ. ಸುಬ್ರಹ್ಮಣ್ಯ ಭಟ್ ಅವರ ನೇತೃತ್ವದಲ್ಲಿ ವಿವಿಧ ಧಾರ್ಮಿಕ ವಿಧಿ ವಿಧಾನಗಳು ನೆರವೇರಿದೆ. ರಾತ್ರಿ ಭಂಡಾರದ ಮನೆಯಿಂದ ದೈವಗಳ ಭಂಡಾರ ಆಗಮಿಸಿ ತಡರಾತ್ರಿ ವರ್ಷಾವಧಿ ಕೋಲ ನೆರವೇರಿದೆ. ಕೋಲದ ಹಿನ್ನೆಲೆಯಲ್ಲಿ ಕ್ಷೇತ್ರವನ್ನು ವಿದ್ಯುತ್ ದೀಪಗಳಿಂದ ಅಲಂಕರಿಸಲಾಗಿದ್ದು, ಮಾರ್ನಬೈಲು ಜಂಕ್ಷನ್‌ನಿಂದಲೂ ವಿದ್ಯುತ್ ದೀಪಗಳ ಮಾಡಲಾಗಿದೆ.

ಪಣೋಲಿಬೈಲ್ ತುಳುನಾಡಿನ ಕಾರಣಿಕ ಕ್ಷೇತ್ರವಾಗಿದ್ದು, ಪಣೋಲಿಬೈಲ್ ಕ್ಷೇತ್ರದಲ್ಲಿ 23 ಸಾವಿರಕ್ಕೂ ಅಧಿಕ ಕೋಲ ಸೇವೆಗಳ ಬುಕ್ಕಿಂಗ್ ಇದೆ. ಪಣೋಲಿಬೈಲು ಕ್ಷೇತ್ರದಲ್ಲಿ ಅಗೇಲು ಹಾಗೂ ಕೋಲ ಸೇವೆಗಳು ವಿಶೇಷವಾಗಿದ್ದು, ವಾರದ 3 ದಿನ ಅಗೇಲು ಹಾಗೂ ವಾರದ 5 ದಿನ ಕೋಲ ಸೇವೆ ಸಂದಾಯವಾಗುತ್ತದೆ. ಆದರೆ ಕೋಲ ಸೇವೆಗಳ ಬುಕ್ಕಿಂಗ್ ಹೆಚ್ಚಿದ್ದು, ಲೆಕ್ಕಾಚಾರ ಹಾಕಿದರೆ ಅದು ಪೂರ್ಣಗೊಳುವುದಕ್ಕೆ ಕನಿಷ್ಠ 35 ವರ್ಷ ಬೇಕಾಗುತ್ತದೆ ಎಂದು ಅಂದಾಜಿಸಲಾಗಿದೆ.

ಸೋಮವಾರ ಹಾಗೂ ಶನಿವಾರ ಹೊರತುಪಡಿಸಿ ವಾರದಲ್ಲಿ 5 ದಿನ ಕೋಲ ಸೇವೆಗೆ ಅವಕಾಶವಿದ್ದರೂ ತುಳುವಿನ ಆಟಿ ತಿಂಗಳು, ಅಮಾವಾಸ್ಯೆ, ಷಷ್ಠಿ, ಸಜೀಪ ಮಾಗಣೆಯ ಜಾತ್ರೆ, ಉತ್ಸವ ಮೊದಲಾದ ಸಂದರ್ಭ ಕೋಲ ಸೇವೆ ನಡೆಯುವುದಿಲ್ಲ. ಹೀಗಾಗಿ ವರ್ಷಕ್ಕೆ 600-700 ಮಂದಿಗೆ ಮಾತ್ರ ಕೋಲ ಸೇವೆಗೆ ಅವಕಾಶ ಸಿಗುತ್ತಿತ್ತು. ಕೋಲದ ದಿನ ಎಂಟು ಮಂದಿಗೆ ಹರಕೆ ಕೋಲ ಒಪ್ಪಿಸಲು ಅವಕಾಶವಿದೆ.

ಕಲ್ಕುಡ-ಕಲ್ಲುರ್ಟಿ ದೈವಕ್ಕೆ ಪಣೋಲಿಬೈಲು ಕ್ಷೇತ್ರದಲ್ಲಿ ಸಾಂಪ್ರದಾಯಿಕವಾಗಿ ಕೋಲ ಆಗೋದು ವಿಶೇಷ. ಸರಳ ಬಣ್ಣತೊಟ್ಟು ದೈವದ ಕೋಲಸೇವೆ ಆಗುತ್ತದೆ.‌ ಪಣೋಲಿಬೈಲ್‌ನಲ್ಲಿ ಅಗೇಲು ಸೇವೆಗೂ ಮಹತ್ವವಿದ್ದು, ನೂರಾರು ಜನ ಅಗೇಲು ಸೇವೆಯನ್ನು ಒಪ್ಪಿಸುತ್ತಾರೆ. ಅನಾರೋಗ್ಯ ಸೇರಿದಂತೆ ಹಲವು ಸಮಸ್ಯೆಗಳಿಗೆ ಜನ ಇಂದಿಗೂ ಕಲ್ಲುರ್ಟಿ ದೈವಕ್ಕೆ ಹರಕೆ ಹೇಳುವ ಸಂಪ್ರದಾಯವಿದ್ದು, ಆಶ್ಚರ್ಯವೆಂಬಂತೆ ಸಮಸ್ಯೆಗಳು ನಿವಾರಣೆಯಾಗುವ ಉದಾಹರಣೆಯಿದೆ.