Daiva: ತುಳುನಾಡಿನ ಮಂತ್ರದೇವತೆ ದೈವದ ಬಗ್ಗೆ ನಿಮಗೆ ಗೊತ್ತಾ? ಇಲ್ಲಿದೆ ನೋಡಿ ಮಾಹಿತಿ! | Mantra Devate | ದಕ್ಷಿಣ ಕನ್ನಡ

ಮಂತ್ರಗಳ ಮೂಲಕ ಈ ಶಕ್ತಿಯನ್ನು ಕೇರಳ ಭಾಗದಿಂದ ತುಳುನಾಡಿಗೆ ತರಲಾಯಿತು ಎನ್ನುವುದು ದೈವದ ಪಾರ್ದನದ ಮೂಲಕ ಕಂಡುಬಂದ ವಿಚಾರವಾಗಿದೆ. ಕೇರಳ ಭಾಗಕ್ಕೆ ಸೇರಿದ ಕುಂಟಾರು ತಂತ್ರಿಗಳ ಬಳಿಗೆ ತುಳುನಾಡಿನಿಂದ ಹಲವು ವಿಚಾರಕ್ಕಾಗಿ ತೆರಳುತ್ತಿದ್ದ ಆ ಸಮಯದಲ್ಲಿ ತುಳುನಾಡಿನ ಇರುವೈಲಿನ ಒಂದು ಕುಟುಂಬವೂ ಕುಂಟಾರು ತಂತ್ರಿಗಳ ಬಳಿ ಹೋಗಿತ್ತು. ಆ ಸಂದರ್ಭದಲ್ಲಿ ತಮ್ಮ ಮಂತ್ರಶಕ್ತಿಯಿಂದ ಹಲವಾರು ಶಕ್ತಿಗಳನ್ನು ತಮ್ಮ ಬಳಿ ಇರಿಸಿಕೊಂಡಿದ್ದ ಕುಂಟಾರಿನ ಅಂದಿನ ತಂತ್ರಿಗಳ ಬಳಿ ಇರುವೈಲು ಮನೆತನದ ಹಿರಿಯರು ಒಂದು ಶಕ್ತಿಯನ್ನು ತಮ್ಮ ಜೊತೆಗೆ ಕಳುಹಿಸಿಕೊಡುವಂತೆ ಕೋರಿದ್ದರಂತೆ.

ಮಂತ್ರಶಕ್ತಿಯ ಮೂಲಕ ಬಂದಿರುವಂತಹ ಈ ದೈವವು ಮಂತ್ರತಂತ್ರಗಳ ದುಷ್ಪರಿಣಾಮಗಳಿಂದ ಭಕ್ತರನ್ನು ತಡೆಯುತ್ತದೆ ಎನ್ನುವ ನಂಬಿಕೆಯಿದೆ. ಅಲ್ಲದೆ ಈ ದೈವದ ಕೋಲ ನಡೆದ ಬಳಿಕ ಸಿಗುವ ಈ ದೈವದ ಪ್ರಸಾದವನ್ನು ಅಲ್ಲೇ ಬಿಟ್ಟು ಬರಬೇಕು ಎನ್ನುವ ಸಂಪ್ರದಾಯವೂ ತುಳುನಾಡಿನಲ್ಲಿದೆ. ಈ ದೈವದ ಪ್ರಸಾದದ ಜೊತೆಗೆ ಈ ದೈವವೂ ಮನೆಗೆ ಬರುತ್ತೆ ಎನ್ನುವ ಕಾರಣಕ್ಕಾಗಿ ಪ್ರಸಾದವನ್ನು ಅಲ್ಲೇ ಬಿಟ್ಟು ಬರುತ್ತಾರೆ ಅನ್ನೋದು ದೈವಾರಾಧನೆಯಲ್ಲಿ ಸಂಶೋಧನೆ ನಡೆಸಿರುವ ಮತ್ತು ಸ್ವತಹ ದೈವ ನರ್ತಕರಾದ ಡಾ. ರವೀಶ್ ಪಡುಮಲೆ ಅಭಿಮತ.