Nema: ಅನ್ಯಾಯಕ್ಕೊಳಗಾದವರಿಗೆ ಈ ನೇಮೋತ್ಸವವೇ ಪರಿಹಾರ; ತುಳುನಾಡಿನ ನ್ಯಾಯದ ಮೂರ್ತಿಗಳು ಈ ಅಣ್ಣ-ತಂಗಿ! | Kalkuda Kallurti Nema Utsava in Puttur attracted lakhs of devotees | ಜ್ಯೋತಿಷ್ಯ

ದಕ್ಷಿಣಕನ್ನಡ ಜಿಲ್ಲೆಯ ಅತೀ ದೊಡ್ಡ ಜಾತ್ರೆ ಎಂದು ಗುರುತಿಸಿಕೊಂಡಿರುವ ಪುತ್ತೂರಿನ ಮಹತೋಭಾರ ಮಹಾಲಿಂಗೇಶ್ವರ ದೇವಸ್ಥಾನದ ಜಾತ್ರೆಯ ಬಳಿಕದ ಪುತ್ತೂರಿನ ಎರಡನೇ ಅತೀ ದೊಡ್ಡ ಜಾತ್ರೆಯಾಗಿ ಗುರುತಿಸಿಕೊಂಡಿರೋದು ಕಲ್ಲೇಗದ ಕಲ್ಕುಡ-ಕಲ್ಲುರ್ಟಿ ದೈವಸ್ಥಾನದಲ್ಲಿ ನಡೆಯುವ ನೇಮೋತ್ಸವವಾಗಿದೆ. ಮಾಣಿ-ಮೈಸೂರು ರಸ್ತೆಯ ಕಲ್ಲೇಗ ಎನ್ನುವ ಪ್ರದೇಶದ ರಸ್ತೆ ಪಕ್ಕದಲ್ಲೇ ಇರುವ ಈ ದೈವಸ್ಥಾನಕ್ಕೆ ಐತಿಹಾಸಿಕ ಹಿನ್ನಲೆಯೂ ಇದೆ.

ಈ ಕಾರಣಕ್ಕಾಗಿಯೇ ಇಲ್ಲಿ ನಡೆಯುವ ನೇಮೋತ್ಸವಕ್ಕೆ ಸಾವಿರಾರು ಸಂಖ್ಯೆಯ ಭಕ್ತಾಧಿಗಳು ಆಗಮಿಸಿ ದೈವಗಳ ಕೃಪೆಗೆ ಪಾತ್ರರಾಗುತ್ತಾರೆ. ಒಂದು ದಿನಗಳ ಕಾಲ ನಡೆಯುವ ಈ ನೇಮೋತ್ಸವದಲ್ಲಿ ಕಲ್ಕುಡ-ಕಲ್ಲುರ್ಟಿ ದೈವಗಳು ಪ್ರಧಾನವಾಗಿದ್ದು, ಇವುಗಳ ಜೊತೆಗೆ ಮಹಾಮ್ಮಾಯಿ ದೇವಿಗೆ ಗೋಂದೋಲು ಪೂಜೆ ನಡೆಯುತ್ತದೆ.

ಪ್ರತೀವರ್ಷವೂ ಜನವರಿ 31 ರಂದೇ ನಡೆಯುವ ಈ ಕಲ್ಕುಡ-ಕಲ್ಲುರ್ಟಿ ದೈವಗಳ ನೇಮೋತ್ಸವ ರಾತ್ರಿ 11 ಗಂಟೆಯ ಬಳಿಕ ಆರಂಭಗೊಳ್ಳುತ್ತದೆ. ನೇಮೋತ್ಸವದ ಮಧ್ಯಾಹ್ನ‌ ಸಾರ್ವಜನಿಕ ಅನ್ನಸಂತರ್ಪಣೆ ಕೂಡಾ ನಡೆಯುತ್ತದೆ. ಸಾವಿರಾರು ಸಂಖ್ಯೆಯ ಜನ ಈ ಅನ್ನಸಂತರ್ಪಣೆ ಕಾರ್ಯಕ್ರಮದಲ್ಲೂ ಪಾಲ್ಗೊಳ್ಳುವ ಮೂಲಕ ದೈವಗಳ ಪ್ರಸಾದವನ್ನು ಸ್ವೀಕರಿಸುತ್ತಾರೆ.

ಕಲ್ಲೇಗದ ಕಲ್ಕುಡ-ಕಲ್ಲುರ್ಟಿ ದೇವಸ್ಥಾನದಲ್ಲಿ ಪ್ರಾರ್ಥಿಸಿದಲ್ಲಿ ಎಲ್ಲಾ ಇಷ್ಟಾರ್ಥಗಳು ಸಿದ್ಧಿಸುತ್ತದೆ ಎನ್ನುವ ನಂಬಿಕೆ ಇರುವ ಹಿನ್ನಲೆಯಲ್ಲಿ ದೈವಗಳ ನೇಮೋತ್ಸವ ನೋಡಲು ದೇಶ-ವಿದೇಶಗಳಲ್ಲಿ ಇರುವ ದೈವದ ಭಕ್ತರು ಆಗಮಿಸಿ ದೈವಗಳ ಮೇಲಿನ ತಮ್ಮ ಭಯ-ಭಕ್ತಿಯನ್ನ ತೋರ್ಪಡಿಸುತ್ತಾರೆ. ಅನ್ಯಾಯದ ವಿರುದ್ಧ ಧ್ವನಿ ಎತ್ತಿ ದೈವತ್ವವನ್ನು ಪಡೆದ ಅಣ್ಣ-ತಂಗಿಯನ್ನು ಕಲ್ಕುಡ-ಕಲ್ಲುರ್ಟಿ ಹೆಸರಿನಲ್ಲಿ ಆರಾಧಿಸಿಕೊಂಡು ಬರಲಾಗುತ್ತಿದೆ. ಕಲ್ಲೇಗ ದೈವಸ್ಥಾನದಲ್ಲಿ ದೈವಗಳ ನೇಮೋತ್ಸವ ನಡೆಯುವ ಮೊದಲು ಇದೇ ದೈವಗಳಿಗೆ ಸಖಬಂಧಪಟ್ಟ ಕಾರ್ಜಾಲು ಗುತ್ತಿನಿಂದ ದೈವಗಳ ಭಂಡಾರವನ್ನು ಮೆರವಣಿಗೆಯ ಮೂಲಕ ತರುವ ಜೊತೆಗೆ ನೇಮೋತ್ಸವದ ಪ್ರಕ್ರಿಯೆಗಳು ಇಲ್ಲಿ ಪ್ರಾರಂಭವಾಗುತ್ತದೆ.