MI vs SRH: ವಾಂಖೆಡೆಯಲ್ಲಿ ಮಕಾಡೆ ಮಲಗಿದ ಹೈದರಾಬಾದ್! ಸತತ 2ನೇ ಜಯ ಸಾಧಿಸಿದ ಮುಂಬೈ ಇಂಡಿಯನ್ಸ್ | Wankhede Witnesses MI s Dominance Mumbai Indians Beat SRH by 5 Wickets

6ನೇ ವೈಫಲ್ಯ ಕಂಡ ರೋಹಿತ್ ಶರ್ಮಾ

163 ರನ್​ಗಳ ಸುಲಭ ಚೇಸಿಂಗ್ ಆರಂಭಿಸಿದ ಮುಂಬೈ ಇಂಡಿಯನ್ಸ್ ಸ್ಫೋಟಕ ಆರಂಭ ಪಡೆಯಿತಾದರೂ ದೊಡ್ಡದಾಗಿ ಪರಿವರ್ತಿಸಿಕೊಳ್ಳುವಲ್ಲಿ ಎಡವಿತು. 16 ಎಸೆತಗಳಲ್ಲಿ 3 ಸಿಕ್ಸರ್​ಗಳ ಸಹಿತ 26 ರನ್​ಗಳಿಸಿದ್ದ ರೋಹಿತ್ ಶರ್ಮಾ 4ನೇ ಓವರ್​​ನಲ್ಲೆ ವಿಕೆಟ್ ಕಳೆದುಕೊಂಡರು. ಇದು ಅವರ ಸತತ 6ನೇ ವೈಫಲ್ಯವಾಗಿದೆ. 6 ಪಂದ್ಯಗಳಲ್ಲಿ ಮುಂಬೈ ಇಂಡಿಯನ್ಸ್ ಒಂದು ಪಂದ್ಯದಲ್ಲೂ ಕೂಡ 50ರ ಜೊತೆಯಾಟ ಪಡೆಯಲಿಲ್ಲ. ಆದರೆ ರೋಹಿತ್ ವೈಫಲ್ಯ ಇಂದು ತಂಡಕ್ಕೆ ದೊಡ್ಡ ಹೊಡೆತ ನೀಡಲಿಲ್ಲ.

ಇದನ್ನೂ ಓದಿ: IPL 2025: ಒಂದೇ ಓವರ್​​ನಲ್ಲಿ ಹೆಚ್ಚು ಎಸೆತ ಬೌಲ್! ಐಪಿಎಲ್​​ನಲ್ಲಿ ಸಂದೀಪ್ ಶರ್ಮಾ ಕೆಟ್ಟ ದಾಖಲೆ

ಮಧ್ಯಮ ಕ್ರಮಾಂಕದಿಂದ ಉತ್ತಮ ಆಟ

2ನೇ ವಿಕೆಟ್​ಗೆ ಒಂದಾದ ರಯಾನ್ ರಿಕಲ್ಟನ್ ಹಾಗೂ ವಿಲ್ ಜಾಕ್ಸ್ 37 ರನ್ ಸೇರಿಸಿದರು. ರಿಕಲ್ಟನ್ 23 ಎಸೆತಗಳಲ್ಲಿ 5 ಬೌಂಡರಿ ಸಹಿತ 31 ರನ್​ಗಳಿಸಿ ಹರ್ಷಲ್ ಪಟೇಲ್​ಗೆ ವಿಕೆಟ್ ಒಪ್ಪಿಸಿದರು. ಅನ್ಸಾರಿ ಓವರ್​ನಲ್ಲಿ ಔಟ್ ಆಗಿದ್ದ ಅವರು, ಕ್ಲಾಸೆನ್​ ಸ್ಟಂಪ್ ಮುಂದೆ ಕೈಹಾಕಿದ್ದರಿಂದ ನೋಬಾಲ್​ ಆಗಿ ಜೀವದಾನ ಪಡೆದಿದ್ದರು. ಆದರೆ ಆ ಜೀವದಾನವನ್ನ ದೊಡ್ಡದಾಗಿ ಬಳಸಿಕೊಳ್ಳುವಲ್ಲಿ ವಿಫಲರಾದರು.

ಗೆಲುವಿನ ಗಡಿ ದಾಟಿಸಿದ ತಿಲಕ್ -ಪಾಂಡ್ಯ

ಬೌಲಿಂಗ್​​ನಲ್ಲಿ 2 ವಿಕೆಟ್ ಪಡೆದು ಮಿಂಚಿದ್ದ ವಿಲ್ ಜಾಕ್ಸ್ ಬ್ಯಾಟಿಂಗ್​​ನಲ್ಲೂ ಮಿಂಚಿದರು. 26 ಎಸೆತಗಳಲ್ಲಿ 3 ಬೌಂಡರಿ, 2 ಸಿಕ್ಸರ್​ಗಳ ಸಹಿತ 36 ರನ್​ಗಳಿಸಿದರು. ಔಟ್ ಆಗುವ ಮುನ್ನ ಜಾಕ್ಸ್​- ಸೂರ್ಯಕುಮಾರ್ ಯಾದವ್ 29 ಎಸೆತಗಳಲ್ಲಿ 52 ರನ್​ ಜೊತೆಯಾಟ ಕಲೆಯಾಕಿದ್ದರು. ಸೂರ್ಯಕುಮಾರ್ ಯಾದವ್ 15 ಎಸೆತಗಳಲ್ಲಿ ತಲಾ 2 ಬೌಂಡರಿ, 2 ಸಿಕ್ಸರ್​ಗಳ ಸಹಿತ 26 ರನ್​ಗಳಿಸಿದರು. ನಾಯಕ ಹಾರ್ದಿಕ್ ಪಾಂಡ್ಯ  9 ಎಸೆತಗಳಲ್ಲಿ 3 ಬೌಂಡರಿ, 1 ಸಿಕ್ಸರ್ ಸೇರಿ 21 ರನ್​ಗಳಿಸಿ ಗೆಲುವಿಗೆ 1ರನ್​ ಬೇಕಿದ್ದಾಗ ಔಟ್ ಆದರು.   ತಿಲಕ್ ವರ್ಮಾ 17 ಎಸೆತಗಳಲ್ಲಿ ಅಜೇಯ 21 ರನ್​ಗಳಿಸಿ ತಂಡವನ್ನು ಗೆಲುವಿನ ಗಡಿ ದಾಟಿಸಿದರು.

ಹೈದರಾಬಾದ್ ಪರ ನಾಯಕ ಪ್ಯಾಟ್ ಕಮಿನ್ಸ್ 26ಕ್ಕೆ3, ಇಶಾನ್ ಮಾಲಿಂಗ್ 36ಕ್ಕೆ2, ಹರ್ಷಲ್ ಪಟೇಲ್ 31ಕ್ಕೆ1 ವಿಕೆಟ್ ಪಡೆದರು.

ಇದನ್ನೂ ಓದಿ: ರಾಜಸ್ಥಾನ್ ವಿರುದ್ಧ ಡಕ್​ಔಟ್ ಆದ್ರೂ ವಿಶೇಷ ಸಾಧನೆ ಮಾಡಿದ ಕರುಣ್​ ನಾಯರ್! ಐಪಿಎಲ್​​ನಲ್ಲಿ ಇವರೇ ಮೊದಲು

ಪರದಾಡಿದ ಹೈದರಾಬಾದ್ ಬ್ಯಾಟರ್ಸ್

ಟಾಸ್​ ಸೋತು ಬ್ಯಾಟಿಂಗ್ ಮಾಡಿದ ಹೈದರಾಬಾದ್ ತಂಡ ಪವರ್​ ಪ್ಲೇನಲ್ಲಿ ವಿಕೆಟ್ ಕಳೆದುಕೊಳ್ಳಲಿಲ್ಲವಾದರೂ, ಕೇವಲ 46 ರನ್​ಗಳಿಸಿದರು. ಅಭಿಷೇಕ್ ಶರ್ಮಾ 28 ಎಸೆತಗಳಲ್ಲಿ 7 ಬೌಂಡರಿಗಳ ಸಹಿತ 40 ರನ್​ಗಳಿಸಿದರು. ಇದೇ ಇಡೀ ಇನ್ನಿಂಗ್ಸ್​​ನಲ್ಲಿ ಗರಿಷ್ಠ ಸ್ಕೋರ್ ಆಯಿತು. ಇನ್ನು ಟ್ರಾವಿಸ್ ಹೆಡ್​ 29 ಎಸೆತಗಳಲ್ಲಿ ಕೇವಲ 28, ನಿತೀಶ್ ಕುಮಾರ್ ರೆಡ್ಡಿ 21 ಎಸೆತಗಳಲ್ಲಿ 19 ರನ್​ಗಳಿಸಿ ದಯನೀಯ ವೈಫಲ್ಯ ಅನುಭವಿಸಿದರು.

ಹೆನ್ರಿಚ್ ಕ್ಲಾಸೆನ್ 28 ಎಸೆತಗಳನ್ನ ಎದುರಿಸಿ 3 ಬೌಂಡರಿ, 2 ಸಿಕ್ಸರ್​ಗಳ ಸಹಿತ 37 ರನ್​ ಸಿಡಿಸಿ 19ನೇ ಓವರ್​​ನಲ್ಲಿ ಬುಮ್ರಾ ಬೌಲಿಂಗ್​​ನಲ್ಲಿ ಕ್ಲೀನ್ ಬೌಲ್ಡ್ ಆದರು. ಆದರೆ ಹಾರ್ದಿಕ್ ಪಾಂಡ್ಯ ಎಸೆದ ಕೊನೆಯ ಓವರ್​​ನಲ್ಲಿ ಅನಿಕೇತ್ ವರ್ಮಾ ಹಾಗೂ ಪ್ಯಾಟ್ ಕಮಿನ್ಸ್ 22 ರನ್​ ಸೂರೆಗೈದು ತಂಡದ ಮೊತ್ತವನ್ನ 162ಕ್ಕೆ ಕೊಂಡೊಯ್ದರು. ಅನಿಕೇತ್ 8 ಎಸೆತಗಳಲ್ಲಿ ಅಜೇಯ 18 ರನ್​ಗಳಿಸಿದರೆ, ಪ್ಯಾಟ್ ಕಮಿನ್ಸ್ ಅಜೇಯ 8 ರನ್​ಗಳಿಸಿದರು.

ಮುಂಬೈ ಬೌಲರ್​ಗಳ ಪೈಕಿ ವಿಲ್​ ಜಾಕ್ಸ್  14ಕ್ಕೆ2,  ಹಾರ್ದಿಕ್ ಪಾಂಡ್ಯ 42ಕ್ಕೆ1, ಜಸ್ಪ್ರೀತ್ ಬುಮ್ರಾ 21ಕ್ಕೆ1,  ಟ್ರೆಂಟ್ ಬೌಲ್ಟ್ 29ಕ್ಕೆ 1 ವಿಕೆಟ್ ಪಡೆದು ಮಿಂಚಿದರು.