May Flower: ದಕ್ಷಿಣ ಕನ್ನಡದಲ್ಲಿ ಮಳೆಗಾಲದ ಸೌಂದರ್ಯ- ಕಂಗೊಳಿಸುತ್ತಿದೆ ಪ್ರಕೃತಿ! | May Flower: The beauty of the rainy season in Dakshina Kannada – Nature is shining!

ಮಳೆಗಾಲ ಆಗಮಿಸುವುದಕ್ಕೆ ಮೊದಲೇ ಎಲ್ಲೆಂದರಲ್ಲಿ ಕಂಡು ಬರುವ ಹೂಗಳಲ್ಲಿ ಮೇ ಫ್ಲವರ್ ಕೂಡಾ ಒಂದು. ಬೃಹತ್ ಗಾತ್ರದ ಮರದ ತುಂಬೆಲ್ಲಾ ಕಿತ್ತಾಳೆ-ಕೆಂಪು ಬಣ್ಣದಿಂದ ಶೃಂಗಾರಗೊಳ್ಳುವ ಈ ಹೂಗಳು ನೋಡುಗರ ಆಕರ್ಷಣೆಯ ಕೇಂದ್ರಬಿಂದು ಕೂಡಾ ಆಗಿದೆ. ಯಾವ ಕಡೆಗಳಲ್ಲಿ ಈ ಮೇ ಫ್ಲವರ್ ಮರವಿದೆಯೋ, ಆ ಮರವಿರುವ ಪ್ರದೇಶವೆಲ್ಲಾ ಕೆಂಪು ಹಾಸಿದ ನೆಲದಂತೆ ಕಂಗೊಳಿಸುತ್ತದೆ. ನೀಲಿ ಆಗಸದ ಎತ್ತರಕ್ಕೆ ಬೆಳೆದು ನಿಲ್ಲುವ ಈ ಹೂವಿನ ಮರ ಎಲ್ಲರ ಮನವನ್ನು ಮುದಗೊಳಿಸುತ್ತದೆ.

ಫ್ಯಾಬೇಸಿಯೇ (Fabeceae) ಮರದ ವಂಶಕ್ಕೆ ಸೇರಿದ ಈ ಮರ ಮೇ ತಿಂಗಳಿನಲ್ಲಿ ತುಂಬಾ ಹೂವುಗಳನ್ನು ಹೊದ್ದುಕೊಂಡು ಜನಾಕರ್ಷಣೆಯಾಗಿ ಬದಲಾಗುತ್ತದೆ. ಮೇ ತಿಂಗಳಿನಲ್ಲೇ ಹೆಚ್ಚು ಕಂಡು ಬರುವ ಈ ಹೂವಿನಿಂದಾಗಿಯೇ ಈ ಹೂವಿಗೆ ಮೇ ಫ್ಲವರ್ ಎಂದೇ ಹೆಸರಿಸಲಾಗಿದ್ದರೂ, ಏಪ್ರಿಲ್ ತಿಂಗಳಿನಿಂದಲೇ ಈ ಮರಗಳು ಹೂ ಬಿಡಲು ಆರಂಭಿಸುತ್ತದೆ.

ಹೆಚ್ಚಾಗಿ ಅರಣ್ಯ ಇಲಾಖೆ ಈ ಮರಗಳನ್ನು ರಸ್ತೆಯ ಇಕ್ಕೆಲಗಳಲ್ಲಿ ನೆಟ್ಟು ಪೋಷಿಸುತ್ತಿದ್ದು, ಈ ಮರಗಳಿರುವ ಕಡೆ ಮೇ ತಿಂಗಳಿನಲ್ಲಿ ಹೂವುಗಳ ರಾಶಿಯೇ ಕಂಡು ಬರುತ್ತದೆ. ಈ ಮರಗಳು ಯಾವುದೇ ಇತರ ಬಳಕೆಗೆ ಅಗತ್ಯವಿಲ್ಲದಿದ್ದರೂ, ತನ್ನ ಆಕರ್ಷಕ ಹೂವಿನಿಂದಾಗಿ ಅರಣ್ಯ ಇಲಾಖೆ ಈ ಗಿಡಗಳು ಹೆಚ್ಚು ಹೆಚ್ಚಾಗಿ ರಸ್ತೆ ಪಕ್ಕದಲ್ಲಿ ನೆಡುತ್ತಿದ್ದು, ಆಕರ್ಷಣೆಯ ಜೊತೆಗೆ ಈ ಮರಗಳು ಹೆಚ್ಚಿನ ನೆರಳನ್ನೂ ಕೊಡುತ್ತದೆ.