Last Updated:
ಅಫ್ಘಾನಿಸ್ತಾನ ನೀಡಿದ್ದ 170 ರನ್ಗಳ ಗುರಿಯನ್ನ ಬೆನ್ನಟ್ಟಿದ ಶ್ರೀಲಂಕಾ ತಂಡ 18.4 ಓವರ್ಗಳಲ್ಲಿ 4 ವಿಕೆಟ್ ಕಳೆದುಕೊಂಡು ಇನ್ನು 8 ಎಸೆತಗಳಿರುವಂತೆ ಗುರಿ ತಲುಪಿತು. ಈ ಮೂಲಕ ಅಗ್ರ ತಂಡವಾಗಿ ಸೂಪರ್ 4 ಹಂತಕ್ಕೆ ತೇರ್ಗಡೆಯಾಯಿತು.
ಕುಸಾಲ್ ಮೆಂಡಿಸ್ (Kusal Mendis) ಸಿಡಿಸಿದ ಅರ್ಧಶತಕದ ನೆರವಿನಿಂದ ಶ್ರೀಲಂಕಾ (Sri Lanka) ತಂಡ 2025ರ ಏಷ್ಯಾಕಪ್ನಲ್ಲಿ ಗರಿಷ್ಠ ಮೊತ್ತವನ್ನ ಯಶಸ್ವಿಯಾಗಿ ಚೇಸ್ ಮಾಡಿ ಸೂಪರ್ 4ಗೆ ಅಜೇಯವಾಗಿ ಅರ್ಹತೆ ಪಡೆದುಕೊಂಡಿದೆ. ಅಫ್ಘಾನಿಸ್ತಾನ ನೀಡಿದ್ದ 170 ರನ್ಗಳ ಗುರಿಯನ್ನ ಬೆನ್ನಟ್ಟಿದ ಶ್ರೀಲಂಕಾ ತಂಡ 18.4 ಓವರ್ಗಳಲ್ಲಿ 4 ವಿಕೆಟ್ ಕಳೆದುಕೊಂಡು ಇನ್ನು 8 ಎಸೆತಗಳಿರುವಂತೆ ಗುರಿ ತಲುಪಿತು.
ಅಫ್ಘಾನಿಸ್ತಾನ ನೀಡಿದ್ದ 170ರನ್ಗಳ ಗುರಿಯನ್ನ ಬೆನ್ನಟ್ಟಿದ ಶ್ರೀಲಂಕಾ ತಂಡ 22 ರನ್ಗಳಾಗುವಷ್ಟರಲ್ಲಿ ಇನ್ಫಾರ್ಮ್ ಬ್ಯಾಟರ್ ಪಾತುಮ್ ನಿಸ್ಸಾಂಕ(6) ವಿಕೆಟ್ ಕಳೆದುಕೊಂಡಿತು. ನಂತರ ಬಂದ ಕಮಿಲ್ ಮಿಶಾರ 10 ಎಸೆತಗಳಲ್ಲಿ ಕೇವಲ 4 ರನ್ಗಳಿಸಿ ವಿಕೆಟ್ ಒಪ್ಪಿಸಿದರು. ಆದರೆ 3ನೇ ವಿಕೆಟ್ಗೆ ಜೊತೆಯಾದ ಕುಸಾಲ್ ಮೆಂಡಿಸ್ ಹಾಗೂ ಕುಸಾಲ್ ಪೆರೆರಾ 46 ರನ್ಗಳ ಜೊತೆಯಾಟ ನಡೆಸಿ ಶ್ರೀಲಂಕಾ ತಂಡ ಪಂದ್ಯಕ್ಕೆ ಕಮ್ಬ್ಯಾಕ್ ಮಾಡುವಂತೆ ಮಾಡಿದರು. ಕುಸಾಲ್ ಪರೆರಾ 20 ಎಸೆತಗಳಲ್ಲಿ 3 ಬೌಂಡರಿ ಸಹಿತ 28 ರನ್ಗಳಿಸಿ ಮುಜೀಬ್ ಉರ್ ರೆಹಮಾನ್ ಬೌಲಿಂಗ್ನಲ್ಲಿ ಔಟ್ ಆದರು.
ನಂತರ ಬಂದ ನಾಯಕ ಅಸಲಂಕಾ ಕುಸಾಲ್ ಮೆಂಡಿಸ್ ಜೊತೆಗೂಡಿ 4ನೇ ವಿಕೆಟ್ ಜೊತೆಯಾಟದಲ್ಲಿ 27 ರನ್ ಸೇರಿಸಿದರು. ಅಸಲಂಕಾ 12 ಎಸೆತಗಳಲ್ಲಿ 17 ರನ್ಗಳಿಸಿ ವಿಕೆಟ್ ಒಪ್ಪಿಸಿದರು. 5ನೇ ವಿಕೆಟ್ಗೆ ಕುಸಾಲ್ ಮೆಂಡಿಸ್ ಜೊತೆಯಾದ ಕಮಿಂದು ಮೆಂಡಿಸ್ ಕೇವಲ 23 ಎಸೆತಗಳಲ್ಲಿ 52 ರನ್ಗಳ ಜೊತೆಯಾಟ ನೀಡಿ ತಂಡವನ್ನ ಗೆಲುವಿನ ಗಡಿ ದಾಟಿಸಿದರು. ಕುಸಾಲ್ 52 ಎಸೆತಗಳಲ್ಲಿ 10 ಬೌಂಡರಿಗಳ ಸಹಿತ ಅಜೇಯ 74 ರನ್ಗಳಿಸಿದರೆ, ಕಮಿಂದು ಮೆಂಡಿಸ್ 13 ಎಸೆತಗಳಲ್ಲಿ 2 ಸಿಕ್ಸರ್ ಸಹಿತ 26 ರನ್ಗಳಿಸಿ ಗೆಲುವಿನ ರೂವಾರಿಯಾದರು.
ಈ ಗೆಲುವಿನೊಂದಿಗೆ ಶ್ರೀಲಂಕಾ ಗುಂಪು ಹಂತದಲ್ಲಿ ಎಲ್ಲಾ 3 ಪಂದ್ಯಗಳನ್ನ ಗೆದ್ದು ಸೂಪರ್ 4 ಹಂತಕ್ಕೆ ಪ್ರವೇಶಿಸಿದರೆ, ಅಫ್ಘಾನಿಸ್ತಾನ 3ರಲ್ಲಿ ಕೇವಲ 1 ಗೆಲುವಿನೊಂದಿಗೆ ಟೂರ್ನಿಯಿಂದ ಹೊರಬಿದ್ದಿತು.
ಅಫ್ಘಾನಿಸ್ತಾನದ ಪರ ನೂರ್ ಅಹ್ಮದ್ 37ಕ್ಕೆ1, ಮುಜೀಬ್ 42ಕ್ಕೆ1, ಮೊಹಮ್ಮದ್ ನಬಿ 20ಕ್ಕೆ1 ವಿಕೆಟ್ ಪಡೆದರು. ನಿರ್ಣಾಯಕ ಪಂದ್ಯದಲ್ಲಿ ಅಫ್ಘಾನ್ ಬೌಲರ್ಗಳು ಉತ್ತಮ ಬೌಲಿಂಗ್ ಪ್ರದರ್ಶನ ತೋರಲಿಲ್ಲ. ರಶೀದ್ 4 ಓವರ್ಗಳಲ್ಲಿ ಕೇವಲ 23 ರನ್ ನೀಡಿದರಾದರೂ ವಿಕೆಟ್ ಪಡೆಯುವಲ್ಲಿ ವಿಫಲರಾದರು.
ಇದಕ್ಕೂ ಮುನ್ನ ಟಾಸ್ ಗೆದ್ದು ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡ ಅಫ್ಘಾನ್ ನಿರ್ಧಾರಕ್ಕೆ ತಕ್ಕಂತೆ ಬ್ಯಾಟ್ ಮಾಡಲು ವಿಫಲವಾಯಿತು. ಮೊದಲ 2 ಓವರ್ಗೆ 26 ರನ್ ಸಿಡಿಸಿದ ಅಫ್ಘಾನ್ ಆ ನಂತರ ಲಂಕಾ ಬೌಲರ್ಗಳ ದಾಳಿಗೆ ಸಿಲುಕಿ ಪವರ್ ಪ್ಲೇ ಒಳಗೆ 3 ವಿಕೆಟ್ ಕಳೆದುಕೊಂಡಿತು. ರಹ್ಮಾನುಲ್ಲಾ ಗುರ್ಬಜ್ (14) ಕರಿಮ್ ಜನತ್ (1), ಸೆದಿಕುಲ್ಲಾ ಅಟಲ್ (18) ವಿಕೆಟ್ ಕಳೆದುಕೊಂಡಿತು. ಆ
ನಂತರ ಜೊತೆಯಾದ ಇಬ್ರಾಹಿಂ ಜದ್ರಾನ್ ಹಾಗೂ ದರ್ವೀಸ್ ರಸೂಲಿ ರನ್ಗಳಿಸಲು ಎಣಗಾಡಿದರು. ಇವರಿಬ್ಬರು 34 ಎಸೆತಗಳಲ್ಲಿ ಕೇವಲ24 ರನ್ಗಳಿಸಿದರು. ರಸೂಲಿ 16 ಎಸೆತಗಳಲ್ಲಿ 9 ರನ್ಗಳಿಸಿ ಚಮೀರಾ ಬೌಲಿಂಗ್ನಲ್ಲಿ ಕುಸಾಲ್ ಪೆರೆರಾ ಹಿಡಿದ ಅದ್ಭುತ ಕ್ಯಾಚ್ಗೆ ಬಲಿಯಾದರೆ, ಇಬ್ರಾಹಿಂ ಜದ್ರಾನ್ ವೆಲ್ಲಲಗೆ ಬೌಲಿಂಗ್ನಲ್ಲಿ ದೊಡ್ಡ ಹೊಡೆತಕ್ಕೆ ಕೈ ಹಾಕಿ ಚಮೀರಾಗೆ ಕ್ಯಾಚ್ ನೀಡಿ ಔಟ್ ಆದರು. ಜದ್ರಾನ್ 27 ಎಸೆತಗಳನ್ನಾಡಿ ಕೇವಲ 1 ಸಿಕ್ಸರ್ ಸಹಿತ 24 ರನ್ಗಳಿಸಿದರು. ಆ ನಂತರ 6ನೇ ಕ್ರಮಾಂಕದಲ್ಲಿ ಬಂದ ಒಮರ್ಝಾಯ್ 4 ಎಸೆತಗಳಲ್ಲಿ 6 ರನ್ ಸಿಡಿಸಿ ಔಟ್ ಆದರು.
ಅಫ್ಘಾನ್ ಒಂದು ಹಂತದಲ್ಲಿ 79ಕ್ಕೆ 6 ವಿಕೆಟ್ ಕಳೆದುಕೊಂಡು ನಿರೀಕ್ಷೆಗೂ ಮೀರಿ ಅಲ್ಪಮೊತ್ತಕ್ಕೆ ಆಲೌಟ್ ಆಗಬಹುದು ಎಂದು ನಿರೀಕ್ಷಿಸಲಾಗಿತ್ತು. ಆದರೆ ಕ್ಯಾಪ್ಟನ್ ರಶೀದ್ ಖಾನ್ 23 ಎಸೆತಗಳಲ್ಲಿ 2 ಬೌಂಡರಿ, 1 ಸಿಕ್ಸರ್ ಸಹಿತ 24, ಹಾಗೂ ಮೊಹಮ್ಮದ್ ನಬಿ 22 ಎಸೆತಗಳಲ್ಲಿ 6 ಸಿಕ್ಸರ್ ಹಾಗೂ 3 ಬೌಂಡರಿಗಳ ನೆರವಿನಿಂದ ಅಜೇಯ 60 ರನ್ಗಳಿಸಿ ತಂಡದ ಮೊತ್ತವನ್ನ 169ಕ್ಕೆ ಏರಿಸಿದರು. ಕೊನೆಯ ಓವರ್ನಲ್ಲಿ ವೆಲ್ಲಲಗೆ ಬೌಲಿಂಗ್ನಲ್ಲಿ ನಬಿ 5 ಸಿಕ್ಸರ್ಗಳ ಸಹಿತ 32 ರನ್ ಸೂರೆಗೈದರು.
ಶ್ರೀಲಂಕಾ ಪರ ನುವಾನ್ ತುಷಾರ 18ಕ್ಕೆ 4, ದುಷ್ಮಂತ ಚಮೀರಾ 50ಕ್ಕೆ1, ವೆಲ್ಲಲಗೆ 49ಕ್ಕೆ1, ದಾಸುನ್ ಶನಕ 29ಕ್ಕೆ1 ವಿಕೆಟ ಪಡೆದರು.
September 18, 2025 11:57 PM IST