Attention Please: ನೇತ್ರಾವತಿ ನದಿಯಲ್ಲಿ ಸ್ನಾನಕ್ಕಿಳಿಯುವ ಮುನ್ನ ಎಚ್ಚರ, ಎಚ್ಚರ! ಯಾಮಾರಿದ್ರೆ ಕಾದಿದೆ ಅಪಾಯ | Crocodile found in Netravati river Forest Department warns tourists | ದಕ್ಷಿಣ ಕನ್ನಡ

ಇಲ್ಲೆಲ್ಲಾ ಸ್ನಾನ ಮಾಡುವುದು ಪುಣ್ಯಕರ ಎಂಬುದೇ ಪ್ರತೀತಿ. ಅತಿಯಾದ ಜನರ ಓಡಾಟದಿಂದ ಇಲ್ಲಿ ಪ್ರಾಣಿ ಸಂಕುಲ ವಿರಳ. ಆದರೆ ಇದಕ್ಕೆ ಅಪವಾದವೆಂಬಂತೆ ಭಯ ಮೂಡಿಸುವಂತೆ ಒಂದು ಘಟನೆ ನಡೆದಿದೆ. ಬೆಳ್ತಂಗಡಿ ತಾಲೂಕಿನ ಕಲ್ಮಂಜ ಗ್ರಾಮದ ಸಂಗಮ ಕ್ಷೇತ್ರ ಶ್ರೀ ಪಜಿರಡ್ಕ ಸದಾಶಿವೇಶ್ವರ ದೇವಸ್ಥಾನದ ಮುಂಭಾಗದ ನೇತ್ರಾವತಿ ನದಿಯಲ್ಲಿ ಮೊಸಳೆಯೊಂದು ಪ್ರತ್ಯಕ್ಷವಾಗಿದೆ.

ದೇವಸ್ಥಾನದ ಸಮೀಪ ಮೃತ್ಯುಂಜಯ ನದಿ ಹಾಗೂ ನೇತ್ರಾವತಿ ನದಿ ಸಂಗಮ ಸ್ಥಳದಲ್ಲಿ ಈ ಮೊಸಳೆ ಪತ್ತೆಯಾಗಿದೆ. ನದಿ ದಡದ ಮರಳಿನ ಮೇಲೆ ವಿಶ್ರಮಿಸುತ್ತಿದ್ದ ವೇಳೆ ಮೊಸಳೆ ಜನರ ಕಣ್ಣಿಗೆ ಬಿದ್ದಿದೆ.  ಸ್ಥಳಕ್ಕೆ ಅರಣ್ಯ ಇಲಾಖೆಯ ಸಿಬ್ಬಂದಿ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ.‌ ರಾತ್ರಿ ವೇಳೆಯೂ ಮೊಸಳೆಯ ಓಡಾಟ ಕಂಡುಬಂದಿದ್ದು, ಗ್ರಾಮಸ್ಥರೊಬ್ಬರ ಮೊಬೈಲ್ ಕ್ಯಾಮೆರಾದಲ್ಲಿ ಸೆರೆಯಾಗಿದೆ.

ಇತ್ತೀಚೆಗೆ ನೇತ್ರಾವತಿ ಹಾಗೂ ಮೃತ್ಯುಂಜಯ ನದಿಗಳಲ್ಲಿ ಅಲ್ಲಲ್ಲಿ ಮೊಸಳೆ ಕಾಣಸಿಗುತ್ತಿರುವುದು ಸ್ಥಳೀಯರಲ್ಲಿ ಆತಂಕ ಮೂಡಿಸಿದೆ. ನದಿತಟದ ಕೃಷಿ ಭೂಮಿ ಹಾಗೂ ನದಿ ಪಾತ್ರದಲ್ಲಿ ವಾಸಿಸುವ ಜನರು ಎಚ್ಚರಿಕೆಯಿಂದ ಇರುವಂತೆ ಅರಣ್ಯ ಇಲಾಖೆ ಸೂಚನೆ ನೀಡಿದೆ. ಅಲ್ಲದೇ ಸ್ನಾನಘಟ್ಟಗಳು ಈ ಎಲ್ಲಾ ದೇಗುಲಗಳಲ್ಲಿ ಕೂಡ ಇದ್ದು ಅತೀ ಬೇಗ ಈ ಮೊಸಳೆಯನ್ನು ಸೆರೆ ಹಿಡಿದಿದ್ದರೆ ಯಾವುದಾದರೂ ಅವಘಡ ಶ್ರೀ ಕ್ಷೇತ್ರಗಳಲ್ಲಿ ಸಂಭವಿಸಬಹುದು ಎಂದು ಎಣಿಸಲಾಗಿದೆ. ಅದರಲ್ಲೂ ನೇತ್ರಾವತಿ ಸ್ನಾನಘಟ್ಟಕ್ಕೆ ಮೊಸಳೆ ಬಂದರೆ ಏನು ಗತಿ? ಎಂಬ ಚಿಂತೆ ಜನರಲ್ಲಿ ಮನೆ ಮಾಡಿದ್ದು ಈ ಮೊಸಳೆಗೆ ಶೀಘ್ರ ಬಂದೋಬಸ್ತ್ ಮಾಡಬೇಕೆಂದು ಜನ ವಿನಂತಿಸಿದ್ದಾರೆ.