Ayush Mhatre: ಟೆಸ್ಟ್​​ನಲ್ಲಿ ಟಿ20ಯಂತೆ ವೀರಾವೇಶದಿಂದ ಬ್ಯಾಟ್ ಬೀಸಿದ ಕ್ಯಾಪ್ಟನ್ ಆಯುಷ್! 64 ಎಸೆತಗಳಲ್ಲಿ ಶತಕ ಸಿಡಿಸಿ ದಾಖಲೆ

ಮೊದಲು ಬ್ಯಾಟಿಂಗ್ ಮಾಡಿದ್ದ ಇಂಗ್ಲೆಂಡ್ 309 ರನ್​ಗಳಿಸಿತ್ತು. ಇದಕ್ಕೆ ಉತ್ತರವಾಗಿ ಭಾರತ ತಂಡ ವಿಹಾನ್ ಮೆಲ್ಹೋತ್ರ (120) ಶತಕದ ನೆರವಿನಿಂದ 58.1 ಓವರ್​ಗಳಲ್ಲಿ 279 ರನ್​ಗಳಿಸಿತ್ತು. ಮೊದಲ ಇನ್ನಿಂಗ್ಸ್​​ನಲ್ಲಿ 30 ರನ್​ಗಳ ಮುನ್ನಡೆಯೊಂದಿಗೆ 2ನೇ ಇನ್ನಿಂಗ್ಸ್ ಆರಂಭಿಸಿ 62 ಓವರ್​ಗಳಲ್ಲಿ 324 ರನ್​ಗಳಿಸಿತ್ತು. ಆರಂಭಿಕ ಬ್ಯಾಟರ್ ಬೆನ್ ಡಾಕಿನ್ಸ್ (136) ಶತಕ ಹಾಗೂ ಆಡಮ್ ಜಾರ್ಜ್​ ಥಾಮಸ್ ​(91) ಅರ್ಶತಕ ನೆರವಿನಿಂದ 62 ಓವರ್​ಗಳಲ್ಲಿ 5 ವಿಕೆಟ್ ಕಳೆದುಕೊಂಡು 324 ರನ್​ಗಳಿಸಿ ಡಿಕ್ಲೇರ್ ಘೋಷಿಸಿಕೊಂಡಿತು. ಒಟ್ಟಾರೆ ಭಾರತಕ್ಕೆ ಗೆಲ್ಲಲು 355 ರನ್​ಗಳ ಗುರಿ ನೀಡಿತು.

355 ರನ್​ಗಳ ಗುರಿ ಬೆನ್ನಟ್ಟಿದ ಟೀಮ್ ಇಂಡಿಯಾ ಖಾತೆ ತೆರೆಯುವ ಮುನ್ನವೇ ಸ್ಫೋಟಕ ಆಟಗಾರ ವೈಭವ್ ಸೂರ್ಯವಂಶಿ ಗೋಲ್ಡನ್ ಡಕ್ ಆದರು. ಆದರೆ 2ನೇ ವಿಕೆಟ್​ಗೆ ಒಂದಾದ 82 ಎಸೆತಗಳಲ್ಲಿ 100 ರನ್​ಗಳ ಜೊತೆಯಾಟ ನಡೆಸಿ ಭರ್ಜರಿ ಜೊತೆಯಾಟ ಕಮ್​ಬ್ಯಾಕ್ ದೊರಕಿಸಿಕೊಟ್ಟರು. ಮ್ಹಾತ್ರೆ ಕೇವಲ 25 ಎಸೆತಗಳಲ್ಲಿ ಅರ್ಧಶತಕ ಪೂರೈಸಿದರು. ನಂತರ ಅದೇ ಆಟವನ್ನು ಮುಂದುವಿರಿಸಿ 64 ಎಸೆತಗಳಲ್ಲಿ ಶತಕ ಪೂರೈಸಿದರು. ಇದು ಅಂಡರ್ 19 ಕ್ರಿಕೆಟ್​ ಇತಿಹಾಸದಲ್ಲೇ 3ನೇ ವೇಗದ ಟೆಸ್ಟ್ ಶತಕವಾಗಿದೆ.

ಭಾರತದವರೇ ಆದ ವೈಭವ್ ಸೂರ್ಯವಂಶಿ ಕಳೆದ ವರ್ಷ ಆಸ್ಟ್ರೇಲಿಯಾ ವಿರುದ್ಧ 52 ಎಸೆತಗಳಲ್ಲಿ ಶತಕ ಸಿಡಿಸಿರುವುದು ವಿಶ್ವದಾಖಲೆಯಾಗಿದೆ. 2ನೇ ಸ್ಥಾನದಲ್ಲಿ ಪಾಕಿಸ್ತಾನದ ಕಮ್ರನ್ ಗುಲಾಮ್ 53 ಎಸೆತಗಳಲ್ಲಿ ಸಿಡಿಸಿರುವ ಶತಕ 2ನೇ ಸ್ಥಾನದಲ್ಲಿದೆ. ಇದೀಗ ಮ್ಹಾತ್ರೆ 64 ಎಸೆತಗಳಲ್ಲಿ ಶತಕ ಸಿಡಿಸಿ 3ನೇ ವೇಗದ ಶತಕ ಸಿಡಿಸಿದ್ದಾರೆ. ಬಾಂಗ್ಲಾದೇಶದ ತಮೀಮ್ ಇಕ್ಬಾಲ್ 68, ಭಾರತದ ರಾಜ್ ಅಂಗದ ಬಾವಾ 69, ಆಸ್ಟ್ರೇಲಿಯಾದ ಶಾನ್ ಮಾರ್ಷ್ 70 ಎಸೆತಗಳಲ್ಲಿ ಈ ಸಾಧನೆ ಮಾಡಿದ್ದಾರೆ.

ಒಟ್ಟಾರೆ ಇಂಡಿಯನ್ ಕ್ಯಾಪ್ಟನ್ 80 ಎಸೆತಗಳಲ್ಲಿ 13 ಬೌಂಡರಿ, 6 ಸಿಕ್ಸರ್ ಸಹಿತ 120 ರನ್​ಗಳಿಸಿ ರಾಲ್ಫಿ ಆಲ್ಬರ್ಟ್​ ಬೌಲಿಂಗ್​​ನಲ್ಲಿ ಮೇಯ್ಸ್​ಗೆ ಕ್ಯಾಚ್ ನೀಡಿ ಔಟ್ ಆದರು. ಏಕದಿನ ಸರಣಿಯಲ್ಲಿ ವೈಫಲ್ಯ ಅನುಭವಿಸಿದ್ದ ಮ್ಹಾತ್ರೆ ಟೆಸ್ಟ್​ ಸರಣಿಯಲ್ಲಿ ಏಕದಿನಕ್ಕೂ ವೇಗವಾಗಿ ಬ್ಯಾಟಿಂಗ್ ಮಾಡಿ ಫಾರ್ಮ್​ಗೆ ಮರಳಿದ್ದಾರೆ. ಮೊದಲ ಟೆಸ್ಟ್​ ನಲ್ಲಿ ಮೊದಲ ಇನ್ನಿಂಗ್ಸ್​​ನಲ್ಲಿ 102(115) ಹಾಗೂ 32 ರನ್​ಗಳಿಸಿದ್ದರು. 2ನೇ ಟೆಸ್ಟ್​ನ ಇನ್ನಿಂಗ್ಸ್​​ನಲ್ಲಿ 80 ರನ್​ಗಳಿಸಿದ್ದರು.