Coastal Temples: ಯಾಕೆ ಅಮವಾಸ್ಯೆಯಂದು ಶಿವ ಸಾನಿಧ್ಯಕ್ಕೆ ಹೋಗಬೇಕು? ತುಳುನಾಡಲ್ಲಿ ಎಲ್ಲೆಲ್ಲಿ ಪುಣ್ಯಸ್ನಾನ ಮಾಡಬಹುದು? ಇಲ್ಲಿದೆ ವಿಶೇಷ ವರದಿ | Shravana Amavasya Shastra Significance of Punya Snana in Tulunadu | ದಕ್ಷಿಣ ಕನ್ನಡ

ನಾವು ಜೀವಮಾನದಲ್ಲಿ ಸಪ್ತನದಿಗಳಾದ ಗಂಗೆ, ಯಮುನೆ, ಕಾವೇರಿ, ಗೋದಾವರಿ, ಸರಸ್ವತಿ, ನರ್ಮದಾ, ಸಿಂಧು, ಕಾವೇರಿಗೆ ಹೋಗಲು ಸಾಧ್ಯವಾಗುತ್ತದೋ ಇಲ್ಲವೋ, ಆದರೆ ನಮ್ಮ ಊರಿನ ಹತ್ತಿರದ ಪುರಾತನ ಶಿವ ಕ್ಷೇತ್ರಗಳ ನೀರನ್ನು ಯಾವಾಗಲೂ ಆ ನದಿಗಳ ನೀರೆಂದೇ ಭಾವಿಸಬೇಕು. ಶಿವನ ಕ್ಷೇತ್ರದಲ್ಲಿ ಇರುವ ನದಿ, ಕುಂಡ, ಕೊಳ, ಹೊಳೆಯಲ್ಲಿ ಸ್ನಾನ ಮಾಡಿ ನಂತರ ಶಿವನ ದರ್ಶನ ಪಡೆಯಬೇಕು. ನದಿಯಲ್ಲಿ ಸೂರ್ಯನಿಗೆ ಅಭಿಮುಖವಾಗಿ ಅರ್ಘ್ಯ ಬಿಟ್ಟರೆ ಪುಣ್ಯ ಫಲ ಲಭಿಸುತ್ತದೆ. ಅಲ್ಲದೇ ಈ ದಿನದಂದು ಪುಣ್ಯಸ್ನಾನದಿಂದ ನಮ್ಮ ಪಿತೃಗಳು ಸಂತೃಪ್ತಿ ಸಾಗುತ್ತಾರೆ ಎಂಬುದು ಶಾಸ್ತ್ರ ವಿಹಿತ.

ನಾಡಿನೆಲ್ಲೆಡೆ ಶ್ರಾವಣ ಅಮಾವಾಸ್ಯೆಯನ್ನು ಆಚರಿಸಲು ಭಕ್ತರು ಆತುರದಿಂದ ಕಾಯುತ್ತಿದ್ದಾರೆ. ತುಳುನಾಡಿನಲ್ಲಿ ಈ ಶ್ರಾವಣ ಅಮಾವಾಸ್ಯೆಯನ್ನು ಸೋಣ ಅಮಾವಾಸ್ಯೆ ಎಂದು ಕರೆಯಲಾಗುತ್ತದೆ. ಆಷಾಡ ಅಮಾವಾಸ್ಯೆಯಂತೆಯೇ ತುಳುನಾಡಿನ ಜನ ಶ್ರಾವಣ ಅಮಾವಾಸ್ಯೆಯ ದಿನ ಶಿವಕ್ಷೇತ್ರಗಳಿಗೆ ತೆರಳಿ ತೀರ್ಥಸ್ನಾನವನ್ನು ಮಾಡುತ್ತಾರೆ. ಜಿಲ್ಲೆಯ ಬಂಟ್ವಾಳ ತಾಲೂಕಿನ ಕಾರಿಂಜೇಶ್ವರ ಮತ್ತು ನರಹರಿ ಬೆಟ್ಟದ ಮೇಲಿರುವ ನರಹರಿ ಕ್ಷೇತ್ರದಲ್ಲಿ ತೀರ್ಥಸ್ನಾನವನ್ನು ನೆರವೇರಿಸುವ ಜೊತೆಗೆ ಮಂಗಳೂರಿನ ಉಳ್ಳಾಲದ ಸೋಮೇಶ್ವರ ದೇವಸ್ಥಾನದ ಸಮೀಪದ ಸಮುದ್ರದಲ್ಲೂ ತೀರ್ಥಸ್ನಾನ ನೆರವೇರಿಸುತ್ತಾರೆ. ಅಲ್ಲದೆ ಪುತ್ತೂರಿನ ಕೊಡಿಪ್ಪಾಡಿ ಜನಾರ್ಧನ ಕ್ಷೇತ್ರದಲ್ಲಿ ಸ್ವಯಂಭೂ ಕಾವೇರಿ ತೀರ್ಥ, ಇರ್ದೆಯ ಬೆಂದ್ರ ತೀರ್ಥದಲ್ಲೂ ಭಕ್ತರು ತೀರ್ಥಸ್ನಾನವನ್ನು ನೆರವೇರಿಸುತ್ತಾರೆ.