Dakshin Kannada: ದೇವಸ್ಥಾನಗಳಲ್ಲಿ ಅನ್ನಪ್ರಸಾದಕ್ಕೂ ಮೊದಲು ಮಾಡುವ ಪೂಜೆಗಿದೆ ಭಾರೀ ಮಹತ್ವ; ಪಲ್ಲ ಪೂಜೆ ಬಗ್ಗೆ ನೀವೂ ತಿಳಿಯಿರಿ | Palla Puja is performed before offering Annaprasadam in Dakshina Kannada temples

ಅನ್ನವನ್ನು ರಾಶಿ ಹಾಕಿಕೊಂಡು ಏನು ಪೂಜೆ ಮಾಡುತ್ತಿದ್ದಾರೆ ಅಂತಾ ಯೋಚಿಸುತ್ತಿದ್ದೀರಾ? ಇದನ್ನು ಪಲ್ಲ ಪೂಜೆ ಎಂದು ಕರೆಯುತ್ತಾರೆ. ಸಾಮಾನ್ಯವಾಗಿ ದೇವಸ್ಥಾನಗಳಲ್ಲಿ ಜಾತ್ರೋತ್ಸವ, ಬ್ರಹ್ಮಕಲಶೋತ್ಸವದಂತಹ ದೊಡ್ಡ ಕಾರ್ಯಕ್ರಮಗಳಲ್ಲಿ ಈ ಪಲ್ಲ ಪೂಜೆ ಎನ್ನುವ ಧಾರ್ಮಿಕ ಆಚರಣೆಯನ್ನು ಮಾಡಲಾಗುತ್ತದೆ.

ಅನ್ನಪೂರ್ಣೇಶ್ವರಿ ದೇವಿಗೆ ಪೂಜೆ

ಅನ್ನದ ರಾಶಿ ಮಾಡಿ ಅದರಲ್ಲಿ ಅನ್ನಪೂರ್ಣೆಯ ಚಿತ್ರವನ್ನು ಬಿಡಿಸುತ್ತಾರೆ. ಬಳಿಕ ಅನ್ನದಲ್ಲಿ ಮೂಡಿಬಂದ ಅನ್ನಪೂರ್ಣೇಶ್ವರಿ ದೇವಿಗೆ ಪೂಜೆಯನ್ನು ಮಾಡಲಾಗುತ್ತದೆ. ಈ ಪಲ್ಲ ಪೂಜೆಯಲ್ಲಿ ಅನ್ನದ ರಾಶಿ, ಪಾಯಸ ಹಾಗೂ ಸಿಹಿತಿಂಡಿಯನ್ನು ಇಟ್ಟು ಪೂಜಿಸುತ್ತಾರೆ.

ಅನ್ನ ಮಾಡುವ ಸ್ಥಳದಲ್ಲಿ ನಡೆಯುವ ಪೂಜೆ

ಧಾರ್ಮಿಕ ಆಚರಣೆಗಳು ನಡೆಯುವ ವೇಳೆ ದೇವಸ್ಥಾನಕ್ಕೆ ಬರುವ ಭಕ್ತರಿಗೆ ಅನ್ನಪ್ರಸಾದವನ್ನು ನೀಡುವ ಮೊದಲು ಪಲ್ಲ ಪೂಜೆಯನ್ನು ಮಾಡಲಾಗುತ್ತದೆ‌. ಪುರೋಹಿತರು ಧಾರ್ಮಿಕ ವಿಧಿ-ವಿಧಾನಗಳೊಂದಿಗೆ ಅನ್ನ ಬೇಯಿಸುವ ಸ್ಥಳದಲ್ಲಿ ಈ ಪೂಜೆಯನ್ನು ಮಾಡುತ್ತಾರೆ.

ಇದನ್ನೂ ಓದಿ: Belagavi: ಸಮಾಜಸೇವೆಗೆ ಮನಸ್ಸು ಮುಖ್ಯ ಎಂದು ತೋರಿಸಿಕೊಟ್ಟ ಬೈಲಹೊಂಗಲದ ಮಲ್ಲಿಕಾರ್ಜುನ ಗಾಣಿಗೇರ; ಜನರ ಮೆಚ್ಚುಗೆ

ಪಲ್ಲ ಪೂಜೆಯಿಂದ ಅನ್ನ ಅಕ್ಷಯದಂತೆ ವೃದ್ಧಿಸುತ್ತದೆ

ಪಲ್ಲ ಪೂಜೆ ಮಾಡುವುದರಿಂದ ಅನ್ನವು ಅಕ್ಷಯದಂತೆ ವೃದ್ಧಿಸುತ್ತದೆ. ಕ್ಷೇತ್ರಕ್ಕೆ ಬರುವ ಭಕ್ತರ್ಯಾರೂ ಹಸಿದು ಹೋಗದಂತೆ ಅನ್ನಪೂರ್ಣೆ ಹರಸುತ್ತಾಳೆ ಎನ್ನುವ ನಂಬಿಕೆ ಇದೆ. ಹೀಗಾಗಿಯೇ ತಲತಲಾಂತರದಿಂದ ಈ ಪೂಜೆಯನ್ನು ಮಾಡಿಕೊಂಡು ಬರಲಾಗುತ್ತಿದೆ.

ದೇವಸ್ಥಾನಗಳಲ್ಲಿ ಪಲ್ಲ ಪೂಜೆ ನೆರವೇರಿಸಿದ ಬಳಿಕವೇ ಅನ್ನಪ್ರಸಾದವನ್ನು ಭಕ್ತರಿಗೆ ನೀಡಲು ಆರಂಭಿಸಲಾಗುತ್ತದೆ. ಈ ಪೂಜೆ ನೆರವೇರಿಸಿದ ಬಳಿಕ ಅಡುಗೆಮನೆಯಲ್ಲಿ ನಿರಂತರವಾಗಿ ಅನ್ನ ಹಾಗೂ ಇತರ ಪದಾರ್ಥಗಳು ಬೇಯುತ್ತಲೂ, ಬಳಕೆಯಾಗುತ್ತಲೂ ಇರುತ್ತವೆ. ಇನ್ನು, ಈ ಪಲ್ಲ ಪೂಜೆಯ ದೃಶ್ಯ ಕಂಡುಬಂದಿದ್ದು ದಕ್ಷಿಣ ಕನ್ನಡ ಜಿಲ್ಲೆಯ ಸುಳ್ಯ ತಾಲೂಕಿನ ಕುಕ್ಕೆ ಸುಬ್ರಹ್ಮಣ್ಯದಲ್ಲಿ ಎಂಬುದು ವಿಶೇಷ.