Dakshina Kannada: ಮಳೆಗಾಲದಲ್ಲಿ ನರಕವಾಗುತ್ತೆ ಅದ್ಯಪಾಡಿ- ಇಲ್ಲಿನ ಜನರ ಗೋಳು ಕೇಳೋರಿಲ್ಲ! | Dakshina Kannada: Adhyapadi becomes hell during the rainy season

ಸಂಪೂರ್ಣ ಅವೈಜ್ಞಾನಿಕವಾಗಿರುವ ಮರವೂರು ಕಿಂಡಿ ಅಣೆಕಟ್ಟಿನಲ್ಲಿ ಕಿಂಡಿ ಹೆಚ್ಚಾಗಿ ಮಳೆಗಾಲದಲ್ಲಿ ನೀರು ಸರಾಗವಾಗಿ ಹರಿದು ಹೋಗದೇ ಅದ್ಯಪಾಡಿಯ ಕುದ್ರು, ಮೊಗರು ಭಾಗಗಳಿಗೆ ನೀರು ನುಗ್ಗಿ ಈ ಗ್ರಾಮ ನಡುಗಡ್ಡೆಯಂತಾಗುತ್ತದೆ. ಕಿಂಡಿ ಅಣೆಕಟ್ಟಿನ ಕಿಂಡಿ ದೊಡ್ಡದಾಗಿ ಮಾಡಿ ಎರಡೂ ಕಡೆಗಳಲ್ಲಿ ಹೈಡ್ರಾಲಿಕ್ ಗೇಟ್ ಅಳವಡಿಸಿದ್ರೆ ಸಮಸ್ಯೆಗೆ ಮುಕ್ತಿ ಸಿಗುತ್ತದೆ. ಸತತ 13 ವರ್ಷಗಳಿಂದ ಸಮಸ್ಯೆ ಅನುಭವಿಸುತ್ತಿರುವ ಮೂವತ್ತಕ್ಕೂ ಹೆಚ್ಚು ಕುಟುಂಬಗಳು ಈ‌ ಸಮಸ್ಯೆಯಿಂದ ಮುಕ್ತಿಗಾಗಿ ಸುತ್ತದ ಕಚೇರಿಗಳಿಲ್ಲ. ಬರೆದ ಮನವಿ ಪತ್ರಗಳಿಗೆ ಲೆಕ್ಕವಿಲ್ಲ. ಆದರೆ ಸಮಸ್ಯೆ ನಿವಾರಣೆ ಮಾಡಲು ಅಧಿಕಾರಿಗಳಿಗೆ ಮನಸಿಲ್ಲ. ಇತ್ತ ಜೀವನವನ್ನೇ ಕಳೆದುಕೊಂಡಿರುವ ನಿವಾಸಿಗಳು ಈ ಬಾರಿ ಮತ್ತೆ ನೆರೆ ಪರಿಸ್ಥಿತಿಯಾದ್ರೆ ಸಾಮೂಹಿಕ ಆತ್ಮಹತ್ಯೆ ಮಾಡಿಕೊಳ್ಳುವ ಎಚ್ಚರಿಕೆ ನೀಡಿದ್ದಾರೆ.

ಪ್ರತೀ ಮಳೆಗಾಲದಲ್ಲಿ ಜೀವನಾಧಾರವಾದ ಕೃಷಿ ನಾಶವಾಗುತ್ತಿದೆ. ಮಕ್ಕಳು ಶಿಕ್ಷಣ ವಂಚಿತರಾಗುತ್ತಿದ್ದಾರೆ. ಬೇರೆ ಕಡೆ ಹೋಗಿ‌ ಜೀವನ ಮಾಡೋಕೆ ಸಾಧ್ಯ ಇಲ್ಲ. 13 ವರ್ಷಗಳಿಂದ ಕಚೇರಿಗಳಿಗೆ ಸುತ್ತಿ ಸುತ್ತಿ ಸಾಕಾಯ್ತು. ಇನ್ನು ಕಚೇರಿ ಸುತ್ತಲ್ಲ. ನಾವು ಸತ್ರೆ ಸಮಸ್ಯೆ ಪರಿಹಾರ ಆಗೋದಾದ್ರೆ ಪ್ರಾಣ ತ್ಯಾಗ ಮಾಡೋಕೆ ಸಿದ್ಧ ಅಂತಾ ಎಚ್ಚರಿಕೆ ನೀಡಿದ್ದಾರೆ. ಕಳೆದ ಮಳೆಗಾಲದ ಸಂಧರ್ಭದಲ್ಲಿ ನೆರೆ ಬಾಧಿತ ಅದ್ಯಪಾಡಿ ಭಾಗಕ್ಕೆ ದಕ್ಷಿಣ ಕನ್ನಡ ಜಿಲ್ಲಾ ಉಸ್ತುವಾರಿ ಸಚಿವ ದಿನೇಶ್ ಗುಂಡೂರಾವ್ ಭೇಟಿ ನೀಡಿದ್ದರು.

ಅಧಿಕಾರಿಗಳಿಗೆ ಸ್ಥಳದಲ್ಲೇ ನಿರ್ದೇಶನ ನೀಡಿದ ಗುಂಡೂರಾವ್ ಮುಂದಿನ ಬಾರಿ ಈ ಸಮಸ್ಯೆ ಇರಕೂಡದು ಅಂತಾ ಅಧಿಕಾರಿಗಳಿಗೆ ತಾಕೀತು ಮಾಡಿದ್ದರು. ಆದರೆ ಸಚಿವ ಸೂಚನೆ ‌ನೀಡಿ ವರ್ಷ ಉರುಳಿದರೂ ಎಳ್ಳಷ್ಟೂ ಕಾರ್ಯ ನಡೆದಿಲ್ಲ. ಅಧಿಕಾರಿಗಳೂ ಜಾಣ ಮೌನವನ್ನು ವಹಿಸಿದ್ದಾರೆ. ಒಟ್ಟಿನಲ್ಲಿ ಸರ್ಕಾರ ನೆರೆ ಬಂದಾಗ ಪರಿಹಾರ ಕೊಡೋ ಬದಲು ನೆರೆ ಬಾರದ ರೀತಿ ಶಾಶ್ವತ ಕಾರ್ಯ ಮಾಡಬೇಕಿದೆ. ಅದ್ಯಪಾಡಿ ಜನರ ಸಂಕಷ್ಟವನ್ನು ಸರ್ಕಾರ ಕಣ್ಣುಬಿಟ್ಟು ನೋಡಬೇಕಿದೆ..