Fastest 5 Wickets: ಕೇವಲ 8 ಎಸೆತಗಳಲ್ಲಿ 5 ವಿಕೆಟ್ಸ್! ಟಿ20ಯಲ್ಲಿ ಹೊಸ ವಿಶ್ವ ದಾಖಲೆ ಮಹೇಶ್ ತಾಂಬೆ! | 39-year-old mahesh tambe etches his name in history with fastest t20i 5-wicket haul

ಈ ಪಂದ್ಯದಲ್ಲಿ ಫಿನ್ಲೆಂಡ್ ತಂಡವು ಎಸ್ಟೋನಿಯಾ ವಿರುದ್ಧ 5 ವಿಕೆಟ್‌ಗಳ ಗೆಲುವು ಸಾಧಿಸಿತು. ಈ ಗೆಲುವಿನೊಂದಿಗೆ ಮೂರು ಪಂದ್ಯಗಳ ಟಿ20 ಸರಣಿಯನ್ನು 2-1 ಅಂತರದಿಂದ ಗೆದ್ದುಕೊಂಡಿತು. ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ಎಸ್ಟೋನಿಯಾ ತಂಡವು 19.4 ಓವರ್‌ಗಳಲ್ಲಿ 141 ರನ್‌ಗಳಿಗೆ ಆಲೌಟ್ ಆಯಿತು. ಎಸ್ಟೋನಿಯಾದ ಆರಂಭಿಕ ಆಟಗಾರರಾದ ಸ್ಟೀಫನ್ ಗೂಚ್ (22 ರನ್) ಮತ್ತು ಹಬೀಬ್ ಖಾನ್ (23 ರನ್) ಮೊದಲ ವಿಕೆಟ್‌ಗೆ ಅರ್ಧಶತಕದ ಜೊತೆಯಾಟವನ್ನು ನೀಡಿದರು. ಆದರೆ, ಮಹೇಶ್ ತಾಂಬೆಯ ಬಿರುಸಿನ ಬೌಲಿಂಗ್‌ನಿಂದಾಗಿ ಎಸ್ಟೋನಿಯಾ ತಂಡವು ನಂತರದ ಹಂತದಲ್ಲಿ ತ್ವರಿತವಾಗಿ ವಿಕೆಟ್‌ಗಳನ್ನು ಕಳೆದುಕೊಂಡು ಸಾಧಾರಣ ಮೊತ್ತಕ್ಕೆ ಸೀಮಿತವಾಯಿತು.

ಮಹೇಶ್ ತಾಂಬೆ ತಮ್ಮ 2 ಓವರ್‌ಗಳ ಬೌಲಿಂಗ್‌ನಲ್ಲಿ ಕೇವಲ 8 ಎಸೆತಗಳಲ್ಲಿ ಎಸ್ಟೋನಿಯಾದ ಪ್ರಮುಖ ಬ್ಯಾಟ್ಸ್‌ಮನ್‌ಗಳಾದ ಸ್ಟೀಫನ್ ಗೂಚ್, ಸಾಹಿಲ್ ಚೌಹಾಣ್, ಮುಹಮ್ಮದ್ ಉಸ್ಮಾನ್, ರೂಪಮ್ ಬರುವಾ, ಮತ್ತು ಪ್ರಣಯ್ ಘೇವಾಲಾ ಅವರ ವಿಕೆಟ್‌ಗಳನ್ನು ಪಡೆದು ಎದುರಾಳಿ ತಂಡವನ್ನು ಕಟ್ಟಿಹಾಕಿದರು. ಈ ಸಾಧನೆಯೊಂದಿಗೆ, ಅವರು 2022ರಲ್ಲಿ ಬಹ್ರೇನ್‌ನ ಜುನೈದ್ ಅಜೀಜ್ ಸ್ಥಾಪಿಸಿದ್ದ 10 ಎಸೆತಗಳಲ್ಲಿ 5 ವಿಕೆಟ್‌ಗಳ ದಾಖಲೆಯನ್ನು ಮುರಿದರು.

ಅಂತರರಾಷ್ಟ್ರೀಯ ಟಿ20 ಪಂದ್ಯದಲ್ಲಿ ವೇಗವಾಗಿ 5 ವಿಕೆಟ್ ಪಡೆದ ಬೌಲರ್‌ಗಳ ಬಗ್ಗೆ ಹೇಳುವುದಾದರೆ, ಈ ಪಟ್ಟಿಯಲ್ಲಿರುವ ಟಾಪ್ 5 ಬೌಲರ್‌ಗಳಲ್ಲಿ 4 ಮಂದಿ ಅಸೋಸಿಯೇಟ್ ರಾಷ್ಟ್ರಗಳ ಸದಸ್ಯರಾಗಿದ್ದರೆ, ಐಸಿಸಿಯ ಪೂರ್ಣ ಸದಸ್ಯ ರಾಷ್ಟ್ರದಿಂದ ಬಂದಿರುವ ಏಕೈಕ ಬೌಲರ್ ಅಫ್ಘಾನಿಸ್ತಾನದ ರಶೀದ್ ಖಾನ್. ಅಫ್ಘಾನಿಸ್ತಾನದ ಲೆಗ್ ಸ್ಪಿನ್ನರ್ ರಶೀದ್ ಖಾನ್ ಐರ್ಲೆಂಡ್ ವಿರುದ್ಧ 11 ಎಸೆತಗಳಲ್ಲಿ 5 ವಿಕೆಟ್ ಪಡೆದಿದ್ದಾರೆ. ಅವರು ಈ ಪಟ್ಟಿಯಲ್ಲಿ ಮೂರನೇ ಸ್ಥಾನದಲ್ಲಿದ್ದಾರೆ.

142 ರನ್‌ಗಳ ಗುರಿಯನ್ನು ಬೆನ್ನಟ್ಟಿದ ಫಿನ್ಲೆಂಡ್ ತಂಡವು 18.1 ಓವರ್‌ಗಳಲ್ಲಿ ಕೇವಲ 5 ವಿಕೆಟ್‌ಗಳನ್ನು ಕಳೆದುಕೊಂಡು ಗುರಿಯನ್ನು ತಲುಪಿತು. ಫಿನ್ಲೆಂಡ್‌ನ ಆರಂಭಿಕ ಆಟಗಾರ ಅರವಿಂದ್ ಮೋಹನ್ 67 ರನ್‌ಗಳೊಂದಿಗೆ ತಂಡದ ಗರಿಷ್ಠ ಸ್ಕೋರರ್ ಎನಿಸಿಕೊಂಡರು. ಈ ಗೆಲುವಿನೊಂದಿಗೆ ಫಿನ್ಲೆಂಡ್ ತಂಡವು ಸರಣಿಯನ್ನು 2-1ರಿಂದ ಗೆದ್ದುಕೊಂಡಿತು, ಮತ್ತು ಮಹೇಶ್ ತಾಂಬೆಯ ಈ ಐತಿಹಾಸಿಕ ಬೌಲಿಂಗ್ ಪ್ರದರ್ಶನವು ಪಂದ್ಯದ ಮುಖ್ಯ ಆಕರ್ಷಣೆಯಾಯಿತು.