Good News: ಹಸಿರು ನೆಟ್‌ ನಲ್ಲಿ ಕಂಗೊಳಿಸುತ್ತಿದೆ ಮಂಗಳೂರಿನ ಹೆದ್ದಾರಿ! ಅರಣ್ಯ ಇಲಾಖೆ ಮಾಡಿದ ಮಹತ್ವದ ನಿರ್ಧಾರವಿದು..! | Mangaluru Kadur highway Forest Department unveils plan to plant 4000 trees | ದಕ್ಷಿಣ ಕನ್ನಡ

ಅದೇ ಪ್ರಕಾರ ಇದೀಗ ಮಂಗಳೂರು-ಕಡೂರು ರಾಷ್ಟ್ರೀಯ ಹೆದ್ದಾರಿಯ ಅಗಲೀಕರಣ ಪ್ರಕ್ರಿಯೆ ನಡೆಯುತ್ತಿದ್ದು, ಈ ರಸ್ತೆಗಾಗಿ ಹಲವಾರು ಮರಗಳನ್ನು ಕಡಿಯಲಾಗಿದೆ. ರಸ್ತೆಯ ಪಕ್ಕದಲ್ಲಿದ್ದ ಮರಗಳನ್ನು ಕಡಿದ ಬಳಿಕ ಆ ಭಾಗದಲ್ಲಿ ಮತ್ತೆ ಗಿಡಗಳನ್ನು ನೆಡುವ ಪ್ರಕ್ರಿಯೆ ಆರಂಭಗೊಂಡಿದೆ. ಪೂಂಜಾಲುಕಟ್ಟೆಯಿಂದ ಗುರುವಾಯನಕೆರೆ ತನಕ ರಸ್ತೆಯ ಇಕ್ಕೆಲಗಳಲ್ಲಿ ನೆಟ್ಟಿರುವ ಗಿಡಗಳು ಎಲ್ಲರ ಆಕರ್ಷಣೆಯ ಕೇಂದ್ರಬಿಂದುವಾಗಿಯೂ ಗುರುತಿಸಲ್ಪಟ್ಟಿದೆ. ವೇಣೂರು ವಲಯ ಅರಣ್ಯ ಇಲಾಖೆ ವತಿಯಿಂದ ಈ ಗಿಡಗಳನ್ನು ನೆಡುವ ಕಾರ್ಯ ಆರಂಭವಾಗಿದ್ದು, ಈಗಾಗಲೇ ಸುಮಾರು 1200 ಗಿಡಗಳನ್ನು ಹೆದ್ದಾರಿಯ ಎರಡೂ ಪಕ್ಕದಲ್ಲಿ ನೆಡಲಾಗಿದೆ.

ಹೆದ್ದಾರಿಯ ಪಕ್ಕದಲ್ಲಿ ಎಲ್ಲೆಲ್ಲಿ ಖಾಲಿ ಜಾಗಗಳು ಸಿಗುತ್ತೋ ಅಲ್ಲೆಲ್ಲಾ ಈ ಗಿಡಗಳನ್ನು ನೆಡಲು ವೇಣೂರು ವಲಯ ಅರಣ್ಯ ಇಲಾಖೆ ನಿರ್ಧರಿಸಿದೆ. ಅತ್ಯಂತ ಶಿಸ್ತುಬದ್ಧವಾಗಿ ಗಿಡಗಳನ್ನು ನೆಡುವ ಜೊತೆಗೆ ಈ ಗಿಡಗಳಿಗೆ ಯಾವುದೇ ತೊಂದರೆಯಾಗದಿರಲಿ ಅನ್ನೋ ಕಾರಣಕ್ಕೆ ಗಿಡಗಳ ಸುತ್ತ ವೃತ್ತಾಕಾರದಲ್ಲಿ ಹಸಿರು ಬಣ್ಣದ ನೆಟ್ ಅನ್ನು ಸುತ್ತಿ ಸಂರಕ್ಷಿಸಲಾಗಿದೆ. ರಸ್ತೆಯುದ್ದಕ್ಕೂ ಹಸಿರಾಗಿ ಕಾಣುವ ಈ ಗಿಡಗಳು ಮತ್ತು ಭದ್ರತಾ ನೆಟ್ ಹೆದ್ದಾರಿ ಪ್ರಯಾಣಿಕರನ್ನೊಮ್ಮೆ ಅತ್ತ ಕಡೆ ತಿರುಗಿ ನೋಡುವಂತೆ ಆಕರ್ಷಿಸುತ್ತಿವೆ.

ಪೂಂಜಾಲುಕಟ್ಟೆಯಿಂದ ವೇಣೂರು, ನಾರಾವಿ, ಅಳದಂಗಡಿ, ಮೂಡಬಿದಿರೆ ತನಕದ ರಸ್ತೆ ಪಕ್ಕದಲ್ಲಿ ಈ ಗಿಡಗಳನ್ನು ನೆಡಲಾಗಿದ್ದು, ಒಟ್ಟು 4000 ಗಿಡಗಳನ್ನು ನೆಡುವ ಯೋಜನೆಯನ್ನು ಹಾಕಿಕೊಳ್ಳಲಾಗಿದೆ. ಕಳೆದ ನಾಲ್ಕು ತಿಂಗಳಿನಿಂದ ಗಿಡ ನೆಡುವ ಕಾರ್ಯ ಆರಂಭಗೊಂಡಿದ್ದು, ಇವುಗಳ ನಿರ್ವಹಣೆಯನ್ನೂ ಅರಣ್ಯ ಇಲಾಖೆಯೇ ನೋಡಿಕೊಳ್ಳಲಿದೆ.

ಹಲಸು, ಹೆಬ್ಬಲಸು, ಮಾವು, ಧೂಪ ಹೀಗೆ ಹಲವು ಜಾತಿಯ ಗಿಡಗಳನ್ನು ಹೆದ್ದಾರಿಯ ಎರಡೂ ಪಕ್ಕದಲ್ಲಿ ನೆಡಲಾಗಿದೆ. ರಸ್ತೆ ಪಕ್ಕದಲ್ಲಿ ಎಲ್ಲೆಲ್ಲಿ ಜಾಗ ಸಿಗುತ್ತೋ ಅಲ್ಲೆಲ್ಲಾ ಗಿಡಗಳನ್ನು ನೆಟ್ಟು ಬೆಳೆಸಲಾಗುತ್ತದೆ. ಹೆದ್ದಾರಿಯ ಅಗಲೀಕರಣ‌ ಕಾಮಗಾರಿಯ ಜೊತೆಗೇ ಗಿಡಗಳನ್ನು‌ ನೆಡುವ ಕೆಲಸವೂ ಒಟ್ಟಿಗೆ‌ ಸಾಗುತ್ತಿದ್ದು, ಮುಂದಿನ ದಿನಗಳಲ್ಲಿ ಈ‌ ಗಿಡಗಳು ಮರಗಳಾಗಿ ರಸ್ತೆ ಪ್ರಯಾಣಿಕರಿಗೆ ತಂಪಿನ‌ ಅನುಭವವನ್ನು‌ ನೀಡಲಿದೆ.