IND vs AUS: ವರುಣ ಅಬ್ಬರಕ್ಕೆ ಆಹುತಿಯಾಯ್ತು ಮೊದಲ ಟಿ20 ಪಂದ್ಯ! ಆದ್ರೂ ಭಾರತದ ಅಭಿಮಾನಿಗಳಿಗೆ ಸಿಕ್ತು ಖುಷಿ ಸುದ್ದಿ | India vs Australia 1st T20I Abandoned: Suryakumar Yadav, Shubman Gill Shine Before Rain Takes Over | ಕ್ರೀಡೆ

ಪಂದ್ಯ ರದ್ದಾದರೂ ಭಾರತದ ಟಿ20 ತಂಡದ ನಾಯಕ ಸೂರ್ಯಕುಮಾರ್ ಯಾದವ್ ಮತ್ತು ಉಪನಾಯಕ ಶುಭ್​ಮನ್ ಗಿಲ್ ಇಬ್ಬರು ಫಾರ್ಮ್‌ಗೆ ಮರಳಿರುವುದು ಭಾರತೀಯ ಅಭಿಮಾನಿಗಳಿಗೆ ಸಮಾಧಾನ ತರಿಸಿದೆ. ಸೂರ್ಯಕುಮಾರ್ ಯಾದವ್ ಏಷ್ಯಾಕಪ್ ಸೇರಿ ಕಳೆದ ಕೆಲವು ಕೆಲವು ಸರಣಿಗಳಿಂದ ನಿರೀಕ್ಷಿತ ಪ್ರದರ್ಶನ ತೋರಿರಲಿಲ್ಲ. ಇನ್ನು ಗಿಲ್​ ಕೂಡ ಏಷ್ಯಾಕಪ್​ ಹಾಗೂ ಆಸ್ಟ್ರೇಲಿಯಾ ವಿರುದ್ಧದ ಏಕದಿನ ಸರಣಿಗಳಲ್ಲಿ ವಿಫಲರಾಗಿದ್ದರು. ಆದರೆ ಇಬ್ಬರು ಮೊದಲ ಟಿ20 ಪಂದ್ಯದಲ್ಲಿ ಉತ್ತಮ ಟಚ್​ನಲ್ಲಿರುವುದು ಭಾರತ ತಂಡಕ್ಕೆ ಖುಷಿ ತಂದಿದೆ.

ಟಾಸ್ ಸೋತು ಮೊದಲು ಬ್ಯಾಟಿಂಗ್ ಆರಂಭಿಸಿದ ಭಾರತ ತಂಡ 4ನೇ ಓವರ್​ನಲ್ಲಿ 19 ರನ್​ಗಳಿಸಿದ್ದ ಅಭಿಷೇಕ್ ಶರ್ಮಾ ವಿಕೆಟ್ ಕಳೆದುಕೊಂಡಿತು. ಆ ನಂತರ ಒಂದಾದ ಆರಂಭಿಕ ಶುಭ್​ಮನ್ ಗಿಲ್ ಮತ್ತು ನಾಯಕ ಸೂರ್ಯಕುಮಾರ್ ಯಾದವ್ (SKY) ಭರ್ಜರಿ ಪ್ರದರ್ಶನ ನೀಡಿದರು. ಮೊದಲ ಮಳೆ ವಿರಾಮದವರೆಗೆ ವಿಕೆಟ್ ಕಾಯ್ದುಕೊಳ್ಳುತ್ತಾ ಆಡುತ್ತಿದ್ದ ಸೂರ್ಯಕುಮಾರ್ ಯಾದವ್ ಮತ್ತು ಶುಭ್​ಮನ್ ಗಿಲ್ ವಿರಾಮದ ಬಳಿಕ ಗೇರ್ ಬದಲಾಯಿಸಿಕೊಂಡು ಆಕ್ರಮಣಕಾರಿಯಾಗಿ ಆಡಲು ಪ್ರಾರಂಭಿಸಿದರು. ಇವರಿಬ್ಬರು ಬೌಂಡರಿ ಮತ್ತು ಸಿಕ್ಸರ್‌ಗಳ ಮೂಲಕ ಆಸ್ಟ್ರೇಲಿಯಾ ಬೌಲರ್‌ಗಳನ್ನು ಬೆಚ್ಚಿ ಬೀಳಿಸಿ ಕೇವಲ 35 ಎಸೆತಗಳಲ್ಲಿ 62 ರನ್​ ಸೂರೆಗೈದಿದ್ದರು.

ಮುಂದಿನ ಬಂದ್ಯ ಮೆಲ್ಬೋರ್ನ್​ನಲ್ಲಿ ಶುಕ್ರವಾರ ನಡೆಯಲಿದೆ. 3ನೇ ಪಂದ್ಯ ನವೆಂಬರ್ 2 ರಂದು ಹೋಬರ್ಟ್​ನಲ್ಲಿ, 4ನೇ ಪಂದ್ಯ ನವೆಂಬರ್ 6ರಂದು ಗೋಲ್ಡ್ ಕಾಸ್ಟ್​​ನಲ್ಲಿ, 5ನೇ ಪಂದ್ಯ ಬ್ರಿಸ್ಬೇನ್​​ನಲ್ಲಿ ನವೆಂಬರ್ 8ರಂದು ನಡೆಯಲಿದೆ.

ಕ್ಯಾನ್‌ಬೆರಾದಲ್ಲಿ ನಡೆದ ಮೊದಲ ಟಿ20ಐನಲ್ಲಿ, ಆಸ್ಟ್ರೇಲಿಯಾದ ನಾಯಕ ಮಿಚೆಲ್ ಮಾರ್ಷ್ ಟಾಸ್ ಗೆದ್ದು ಮೊದಲು ಫೀಲ್ಡಿಂಗ್ ಆಯ್ಕೆ ಮಾಡಿಕೊಂಡರು. ಈ ನಿರ್ಧಾರವು ಅಂತರರಾಷ್ಟ್ರೀಯ ಟಿ20ಐನಲ್ಲಿ ಮಾರ್ಷ್ ಟಾಸ್ ಗೆದ್ದು ಫೀಲ್ಡಿಂಗ್ ಆಯ್ಕೆ ಮಾಡಿಕೊಂಡ 18ನೇ ಬಾರಿಯಾಗಿದೆ.

ಟಿ20 ಅಂತರರಾಷ್ಟ್ರೀಯ ಪಂದ್ಯಗಳಲ್ಲಿ ಭಾರತ ತಂಡ ಆಸ್ಟ್ರೇಲಿಯಾ ವಿರುದ್ಧ ಸ್ಪಷ್ಟ ಮೇಲುಗೈ ಸಾಧಿಸಿದೆ. ಉಭಯ ತಂಡಗಳ ನಡುವೆ ಇಲ್ಲಿಯವರೆಗೆ 32 ಟಿ20 ಪಂದ್ಯಗಳು ನಡೆದಿವೆ. ಈ ಪೈಕಿ ಭಾರತ 20 ಪಂದ್ಯಗಳಲ್ಲಿ ಗೆದ್ದಿದ್ದರೆ, ಆಸ್ಟ್ರೇಲಿಯಾ 11 ಪಂದ್ಯಗಳಲ್ಲಿ ಗೆದ್ದಿದೆ. ಒಂದು ಪಂದ್ಯ ಫಲಿತಾಂಶ ಬಂದಿಲ್ಲ. ಆಸ್ಟ್ರೇಲಿಯಾ ನೆಲದಲ್ಲಿ ಟಿ20ಯಲ್ಲೂ ಭಾರತ ಮೇಲುಗೈ ಸಾಧಿಸಿದೆ. ಆಸ್ಟ್ರೇಲಿಯಾದಲ್ಲಿ ಭಾರತ ತಂಡವು ಇಲ್ಲಿಯವರೆಗೆ ಆಸ್ಟ್ರೇಲಿಯಾ ವಿರುದ್ಧ 12 ಪಂದ್ಯಗಳನ್ನು ಆಡಿದ್ದು, ಏಳು ಪಂದ್ಯಗಳನ್ನು ಗೆದ್ದು ನಾಲ್ಕರಲ್ಲಿ ಸೋತಿದೆ.