Last Updated:
193 ರನ್ಗಳ ಸಾಧಾರಣ ಗುರಿ ಬೆನ್ನಟ್ಟಿರುವ ಟೀಮ್ ಇಂಡಿಯಾ 4ನೇ ದಿನದಾಟದ ಅಂತ್ಯಕ್ಕೆ 4 ವಿಕೆಟ್ ಕಳೆದುಕೊಂಡು ರನ್ಗಳಿಸಿದೆ. 5ನೇ ದಿನ ಶುಭ್ಮನ್ ಗಿಲ್ ಪಡೆ ಐತಿಹಾಸಿಕ ಪಂದ್ಯ ಗೆಲ್ಲಲು ಭಾರತಕ್ಕೆ ಇನ್ನೂ 135 ರನ್ಗಳ ಅಗತ್ಯವಿದೆ.
ಲಾರ್ಡ್ಸ್ನಲ್ಲಿ ನಡೆಯುತ್ತಿರುವ 3ನೇ ಟೆಸ್ಟ್ ಪಂದ್ಯದ ರೋಚಕ ಘಟ್ಟಕ್ಕೆ ತಲುಪಿದೆ. ನಾಲ್ಕನೇ ದಿನ ಒಟ್ಟು 13 ವಿಕೆಟ್ ಪತನವಾಗಿದ್ದು, ಕೊನೆಯ ದಿನ ಭಾರತ ತಂಡ ಪಂದ್ಯವನ್ನ ತನ್ನದಾಗಿಸಿಕೊಳ್ಳಲು 135 ರನ್ಗಳಿಸಬೇಕಿದೆ. 193 ರನ್ಗಳ ಸಾಧಾರಣ ಗುರಿ ಬೆನ್ನಟ್ಟಿರುವ ಟೀಮ್ ಇಂಡಿಯಾ 4ನೇ ದಿನದಾಟದ ಅಂತ್ಯಕ್ಕೆ 4 ವಿಕೆಟ್ ಕಳೆದುಕೊಂಡು 58 ರನ್ಗಳಿಸಿದೆ. 5ನೇ ದಿನ ಶುಭ್ಮನ್ ಗಿಲ್ ಪಡೆ ಐತಿಹಾಸಿಕ ಪಂದ್ಯ ಗೆಲ್ಲಲು ಇನ್ನೂ 135 ರನ್ಗಳ ಅಗತ್ಯವಿದೆ. ಕೈಯಲ್ಲಿ ಇನ್ನೂ6 ವಿಕೆಟ್ ಬಾಕಿ ಉಳಿದಿದ್ದು, 5ನೇ ದಿನ ಪಂದ್ಯ ಮತ್ತಷ್ಟು ರೋಚಕವಾಗಿರಲಿದೆ.
193 ರನ್ಗಳ ಸಾಧಾರಣ ಗುರಿ ಬೆನ್ನಟ್ಟಿದ ಟೀಮ್ ಇಂಡಿಯಾ ನಿರೀಕ್ಷಿತ ಆರಂಭ ಪಡೆಯುವಲ್ಲಿ ವಿಫಲವಾಯಿತು. ಆರಂಭಿಕ ಬ್ಯಾಟರ್ ಯಶಸ್ವಿ ಜೈಸ್ವಾಲ್ ಖಾತೆ ತೆರೆಯದೇ ಜೋಫ್ರಾ ಆರ್ಚರ್ ಬೌಲಿಂಗ್ನಲ್ಲಿ ಕೀಪರ್ ಜೇಮಿ ಸ್ಮಿತ್ಗೆ ಕ್ಯಾಚ್ ನೀಡಿ ಔಟ್ ಆದರು. ನಂತರ ಬಂದ ಕರುಣ್ ನಾಯರ್ ಹಾಗೂ ಕೆಎಲ್ ರಾಹುಲ್ 2ನೇ ವಿಕೆಟ್ ಜೊತೆಯಾಟದಲ್ಲಿ 36 ರನ್ ಸೇರಿಸಿದರು. ಕರುಣ್ ನಾಯರ್ ಕೇವಲ 14 ರನ್ಗಳಿಸಿ ಬೆನ್ ಕಾರ್ಸ್ ಬೌಲಿಂಗ್ನಲ್ಲಿ ಎಲ್ಬಿಡಬ್ಲ್ಯೂ ಬಲೆಗೆ ಬಿದ್ದರು. ಇದು ಅವರ ಸತತ 6ನೇ ಇನ್ನಿಂಗ್ಸ್ ವೈಫಲ್ಯವಾಗಿದೆ. ಇಡೀ ಸರಣಿಯಲ್ಲಿ ಎಲ್ಲಾ ಪಂದ್ಯಗಳನ್ನಾಡಿ ಭಾರತದ ಪರ ಅರ್ಧಶತಕ ಸಿಡಿಸದ ಏಕೈಕ ಟಾಪ್ ಆರ್ಡರ್ ಬ್ಯಾಟರ್ ಎಂಬ ಕಳಪೆ ದಾಖಲೆಗೆ ಪಾತ್ರರಾದರು.
ಕರುಣ್ ನಾಯರ್ ನಂತರ ಬಂದ ನಾಯಕ ಶುಭ್ಮನ್ ಗಿಲ್ ಕೇವಲ 9 ಎಸೆತಗಳಲ್ಲಿ 6 ರನ್ ಸಿಡಿಸಿ ಕಾರ್ಸ್ ಬೌಲಿಂಗ್ನಲ್ಲಿ ಎಲ್ಬಿಡಬ್ಲ್ಯೂ ಬಲೆಗೆ ಬಿದ್ದರು. 3-4 ಓವರ್ಗಳಿದ್ದರೂ ಗಿಲ್ ಬ್ಯಾಟಿಂಗ್ ಮಾಡಲು ಬಂದಿದ್ದು ಅಚ್ಚರಿಗೆ ಕಾರಣವಾಯಿತು. ನೈಟ್ ವಾಚ್ಮನ್ ಆಗಿ ಬಂದ ಆಕಾಶ್ ದೀಪ್ ಕೂಡ ವಿಕೆಟ್ ಉಳಿಸಿಕೊಳ್ಳಲು ವಿಫಲರಾದರು. 11 ಎಸೆತಗಳಲ್ಲಿ ಕೇವಲ 1 ರನ್ ಸಿಡಿಸಿ ಬೆನ್ ಸ್ಟೋಕ್ಸ್ ಬೌಲಿಂಗ್ನಲ್ಲಿ ಬೌಲ್ಡ್ ಇದ್ದಾರೆ.
3ನೇ ದಿನ 2 ರನ್ಗಳಿಸಿದ್ದ ಇಂಗ್ಲೆಂಡ್ ತಂಡ 4ನೇ ದಿನ ಆಟ ಮುಂದುವರಿಸಿ 22 ರನ್ಗಳಾಗುಷ್ಟರಲ್ಲಿ ಬೆನ್ ಡಕೆಟ್ ವಿಕೆಟ್ ಕಳೆದುಕೊಂಡಿತು. ಮೊಹಮ್ಮದ್ ಸಿರಾಜ್ 12 ರನ್ಗಳಿಸಿದ್ದ ಬೆನ್ ಡಕೆಟ್ ಅವರನ್ನು ಔಟ್ ಮಾಡುವ ಮೂಲಕ ಇಂಗ್ಲೆಂಡ್‌ಗೆ ಮೊದಲ ಹೊಡೆತ ನೀಡಿದರು. 3ನೇ ಕ್ರಮಾಂಕದಲ್ಲಿ ಬಂದ ಒಲ್ಲಿ ಪೋಪ್ ಕೂಡ ಕೇವಲ 4 ರನ್ಗಳಿಸಿ ಸಿರಾಜ್ ಬೌಲಿಂಗ್ನಲ್ಲಿ ಎಲ್ಬಿಡಬ್ಲ್ಯೂ ಬಲೆಗೆ ಬಿದ್ದರು.
ನಿತೀಶ್ ರೆಡ್ಡಿ ಜ್ಯಾಕ್ ಕ್ರಾಲಿಯನ್ನು ಪೆವಿಲಿಯನ್‌ಗೆ ಕಳುಹಿಸಿದರು. ಕ್ರಾಲೆ 22 ರನ್ ಗಳಿಸಿದರು. ಹ್ಯಾರಿ ಬ್ರೂಕ್ ಅವರನ್ನು ಆಕಾಶ್‌ದೀಪ್ ಕ್ಲೀನ್ ಬೌಲ್ಡ್ ಮಾಡಿದರು. ನಂತರ ಬಂದ ಸ್ಫೋಟಕ ಬ್ಯಾಟರ್ ಬ್ರೂಕ್ 19 ಎಸೆತಗಳಲ್ಲಿ 23 ರನ್ ಗಳಿಸಿದರು. ಈ ಹಂತದಲ್ಲಿ ಒಂದಾದ ರೂಟ್-ಬೆನ್ ಸ್ಟೋಕ್ಸ್ 128 ಎಸೆತಗಳಲ್ಲಿ 67 ರನ್ ಸೇರಿಸಿದರು. ಇದು ಇಡೀ ಇನ್ನಿಂಗ್ಸ್ನಲ್ಲಿ ಗರಿಷ್ಠ ಜೊತೆಯಾಟವಾಯಿತು. ಈ ಹಂತದಲ್ಲಿ ಬೌಲಿಂಗ್ ಇಳಿದ ವಾಷಿಂಗ್ಟನ್ ಸುಂದರ್ ರೂಟ್ ವಿಕೆಟ್ ಪಡೆದು ಭಾರತಕ್ಕೆ ಭರ್ಜರಿ ಬ್ರೇಕ್ ನೀಡಿದರು. ರೂಟ್ 96 ಎಸೆತಗಳಲ್ಲಿ 1 ಸಿಕ್ಸರ್ ಸಹಿತ 40 ರನ್ಗಳಿಸಿದರು.
ಇಂಗ್ಲೆಂಡ್ ಪತನಕ್ಕೆ ಕಾರಣರಾದ ಸುಂದರ್-ಬುಮ್ರಾ
ರೂಟ್ ವಿಕೆಟ್ ಬೀಳುತ್ತಿದ್ದಂತೆ ಇಂಗ್ಲೆಂಡ್ ಪತನ ಆರಂಭವಾಯಿತು. 154ಕ್ಕೆ 4 ವಿಕೆಟ್ ಕಳೆದುಕೊಂಡಿದ್ದ ಇಂಗ್ಲೆಂಡ್ ದಿಢೀರ್ ಕುಸಿತ ಕಂಡು 192ಕ್ಕೆ ಆಲೌಟ್ ಆಯಿತು. ಕೇವಲ 38 ರನ್ಗಳಾಷ್ಟರಲ್ಲಿ 6 ವಿಕೆಟ್ ಕಳೆದುಕೊಂಡಿತು. ಇದರಲ್ಲಿ 4 ವಿಕೆಟ್ ವಾಷಿಂಗ್ಟನ್ ಸುಂದರ್ ಪಾಲಾದರೆ, ಬುಮ್ರಾ 2 ವಿಕೆಟ್ ಪಡೆದರು.
ರೂಟ್ ಔಟ್ ಆದ ನಂತರ ಬಂದ ಜೇಮೀ ಸ್ಮಿತ್ ಕೂಡ ಸುಂದರ್ ಎಸೆತದಲ್ಲಿ ಕ್ಲೀನ್ ಬೌಲ್ಡ್ ಆದರು. ಸ್ಮಿತ್ 14 ಎಸೆತಗಳಲ್ಲಿ 8 ರನ್ ಗಳಿಸಿದರು. ಬೆನ್ ಸ್ಟೋಕ್ಸ್ 96 ಎಸೆತಗಳಲ್ಲಿ 33 ರನ್ ಗಳಿಸಿ ಸುಂದರ್ ಬೌಲಿಂಗ್ನಲ್ಲಿ ಬೌಲ್ಡ್ ಆದರು. ಬ್ರೈಡನ್ ಕಾರ್ಸ್ ಕೇವಲ ಒಂದು ರನ್ ಹಾಗೂ 10 ರನ್ಗಳಿಸಿದ್ದ ಕ್ರಿಸ್ ವೋಕ್ಸ್ರನ್ನ ಬುಮ್ರಾ ಬೌಲ್ಡ್ ಮಾಡಿ ಪೆವಿಲಿಯನ್ ಸೇರಿಸಿದರು. ವಾಷಿಂಗ್ಟನ್ ಸುಂದರ್ ಕೊನೆಯ 11ನೇ ಬ್ಯಾಟರ್ ಶೋಯಿಬ್ ಬಶೀರ್ (2) ಅವರನ್ನು ಕ್ಲೀನ್ ಬೌಲ್ಡ್ ಮಾಡುವ ಮೂಲಕ ಇಂಗ್ಲೆಂಡ್‌ನ ಇನ್ನಿಂಗ್ಸ್ ಅನ್ನು ಕೊನೆಗೊಳಿಸಿದರು. ಜೋಫ್ರಾ 5 ರನ್ ಗಳಿಸಿ ಅಜೇಯರಾಗಿ ಮರಳಿದರು.
ಭಾರತದ ಪರ ವಾಸಿಂಗ್ಟನ್ ಸುಂದರ್ 22 ರನ್ ನೀಡಿ 4 ವಿಕೆಟ್ ಪಡೆದು ಟಾಪ್ ಬೌಲರ್ ಆದರೆ, ಸಿರಾಜ್ 31ಕ್ಕೆ2, ಬುಮ್ರಾ 38ಕ್ಕೆ1, ನಿತೀಶ್ ಕುಮಾರ್ ರೆಡ್ಡಿ 20ಕ್ಕೆ1, ಆಕಾಶ್ ದೀಪ್ 30ಕ್ಕೆ1 ವಿಕೆಟ್ ಪಡೆದು ಇಂಗ್ಲೆಂಡ್ ತಂಡವನ್ನ 62 ಓವರ್ಗಳಲ್ಲಿ ಆಲೌಟ್ ಮಾಡಲು ನೆರವಾದರು.
July 13, 2025 11:14 PM IST
IND vs ENG: 193 ರನ್ಗಳ ಗುರಿ ಬೆನ್ನಟ್ಟಿದ ಭಾರತಕ್ಕೆ ಆರಂಭಿಕ ಆಘಾತ; ಲಾರ್ಡ್ಸ್ ಟೆಸ್ಟ್ ಗೆಲ್ಲಿಸುವ ಭಾರ ರಾಹುಲ್ ಹೆಗಲಿಗೆ! ಕೊನೆಯ ದಿನ ಮತ್ತಷ್ಟು ರೋಚಕ
