IND vs OMN: ಹ್ಯಾಟ್ರಿಕ್ ಜಯದೊಂದಿಗೆ ಸೂಪರ್​ 4ಗೆ ಭಾರತ ಎಂಟ್ರಿ! ಟೀಮ್​ ಇಂಡಿಯಾವನ್ನು ಬೆದರಿಸಿ ರೋಚಕ ಸೋಲುಕಂಡ ಒಮಾನ್! | Oman Falls Short: Aamir Kaleem and Hammad Mirza’s Fifties Not Enough to Beat India | ಕ್ರೀಡೆ

189 ರನ್​ಗಳ ಗುರಿ ಬೆನ್ನಟ್ಟಿದ ಒಮಾನ್​ ತಂಡ ಭರ್ಜರಿ ಆರಂಭ ಪಡೆಯಿತು. ಮೊದಲ ವಿಕೆಟ್​ಗೆ 56 ರನ್​ಗಳ ಜೊತೆಯಾಟ ನೀಡಿತು. ನಾಯಕ ಜಿತೇಂದರ್ ಸಿಂಗ್ 33 ಎಸೆತಗಳಲ್ಲಿ 5 ಬೌಂಡರಿ ಸಹಿತ 32 ರನ್ಗಳಿಸಿ ಕುಲ್ದೀಪ್ ಯಾದವ್ ಬೌಲಿಂಗ್​​ನಲ್ಲಿ ಕ್ಲೀನ್ ಬೌಲ್ಡ್ ಆದರು. ಜಿತೇಂದರ್ ವಿಕೆಟ್ ಉಳಿಸಿಕೊಳ್ಳುವ ಯತ್ನದಲ್ಲಿ ಹೆಚ್ಚು ಎಸೆತಗಳನ್ನ ವ್ಯರ್ಥ ಮಾಡಿದರು. ಆದರೆ 2ನೇ ವಿಕೆಟ್​ಗೆ ಒಂದಾದ ಅಮೀರ್ ಕಲೀಮ್ ಹಾಗೂ ಹಮ್ಮದ್ ಮಿರ್ಜಾ ಆ ತಪ್ಪು ಮಾಡಲಿಲ್ಲ. ಇವರಿಬ್ಬರು 2ನೇ ವಿಕೆಟ್​ ಜೊತೆಯಾಟದಲ್ಲಿ 55 ಎಸೆತಗಳಲ್ಲಿ 3 ರನ್ಗಳ ಬೃಹತ್ ಜೊತೆಯಾಟ ನೀಡಿ ಭಾರತೀಯ ಬೌಲರ್​ಗಳನ್ನ ಕಾಡಿದರು.

ಈ ಜೋಡಿ ಬೇರ್ಪಡುತ್ತಿದ್ದಂತೆ ಒಮಾನ್​ ಗೆಲುವಿನ ಹೋರಾಟವೂ ಅಂತ್ಯವಾಯಿತು. ನಂತರದ ಓವರ್​​ನಲ್​ಲೇ ಮಿರ್ಜಾ ಕೂಡ ಹಾರ್ದಿಕ್ ಪಾಂಡ್ಯ ಬೌಲಿಂಗ್​​ನಲ್ಲಿ ಸತತ 2 ಬೌಂಡರಿ ಸಿಡಿಸಿ ನಂತರ ಅದೇ ಓವರ್​ನಲ್ಲಿ ಅರ್ಶದೀಪ್​ಗೆ ಕ್ಯಾಚ್ ನೀಡಿ ಔಟ್ ಆದರು. ಮಿರ್ಜಾ 33 ಎಸೆತಗಳಲ್ಲಿ 5 ಬೌಂಡರಿ, 2 ಸಿಕ್ಸರ್​ಗಳ ಸಹಿತ 51 ರನ್​ಗಳಿಸಿದರು. ವಿಕೆಟ್ ಕೀಪರ್ ವಿನಾಯಕ್ ಶುಕ್ಲಾ 1 ರನ್​ಗೆ ಔಟ್ ಆದರು. ಜಿತೆನ್ ರಾಮನಂದಿ 5 ಎಸೆತಗಳಲ್ಲಿ ಅಜೇಯ 12 ರನ್​ಗಳಿಸಿದರು. ಒಮಾನ್ 20 ಓವರ್​ಗಳಲ್ಲಿ 4 ವಿಕೆಟ್ ಕಳೆದುಕೊಂಡು 167 ರನ್​ಗಳಿಸಿ 21 ರನ್​ಗಳ ಸೋಲು ಕಂಡಿತು.

ಭಾರತದ ಪರ ಹಾರ್ದಿಕ್ ಪಾಂಡ್ಯ 26ಕ್ಕೆ1,  ಹರ್ಷಿತ್ ರಾಣಾ 3 ಓವರ್​ಗಳಲ್ಲಿ 25 ರನ್​ ನೀಡಿ 1 ವಿಕೆಟ್, ಅರ್ಶದೀಪ್ ಸಿಂಗ್ 37 ರನ್​ ನೀಡಿ 1 ವಿಕೆಟ್, ಕುಲ್ದೀಪ್ ಯಾದವ್ 23ಕ್ಕೆ1 ವಿಕೆಟ್ ಪಡೆದರು. ಬುಮ್ರಾ ಬದಲು ಕಣಕ್ಕಿಳಿದಿದ್ದ ಅರ್ಶದೀಪ್ ಸಿಂಗ್ ದುಬಾರಿಯಾದದ್ದು ಸೂಪರ್ 4ಗೂ ಮುಂಚೆ ಭಾರತಕ್ಕೆ ಬೌಲಿಂಗ್ ವಿಭಾಗದಲ್ಲಿ ಚಿಂತಿಸುವಂತೆ ಮಾಡಿದೆ. ದುಬೆ ಕೂಡ 3 ಓವರ್ಗಳಲ್ಲಿ 31 ರನ್​ ಬಿಟ್ಟುಕೊಟ್ಟರು.

ಇದಕ್ಕೂ ಮುನ್ನ ಟಾಸ್​ ಗೆದ್ದು ಏಷ್ಯಾಕಪ್​ನಲ್ಲಿ ಮೊದಲ ಬಾರಿಗೆ ಮೊದಲು ಬ್ಯಾಟಿಂಗ್ ಮಾಡಿದ ಟೀಮ್ ಇಂಡಿಯಾ ನಿರೀಕ್ಷಿತ ಪ್ರದರ್ಶನ ತೋರಲಿಲ್ಲ. ಈ ಪಂದ್ಯದಲ್ಲಿ 200ಕ್ಕೂ ಹೆಚ್ಚು ರನ್ ಬರಬಹುದು ಎಂದು ನಿರೀಕ್ಷಿಸಲಾಗಿತ್ತು. ಆದರೆ ಒಮಾನ್ ಬೌಲರ್ಗಳು ಭಾರತೀಯ ಬ್ಯಾಟರ್​ಗಳ ಅಹಂ ಅಡಗಿಸಿದರು. ಸಂಜು ಸ್ಯಾಮ್ಸನ್​ 56 ರನ್​ಗಳಿಸಿದರೆ, ಅಭಿಷೇಕ್ ಶರ್ಮಾ 38 ರನ್​ಗಳಿಸಿ ಗರಿಷ್ಠ ಸ್ಕೋರರ್​ ಎನಿಸಿಕೊಂಡರು. ಅಕ್ಷರ್ ಪಟೇಲ್ 26,  ತಿಲಕ್ ವರ್ಮಾ 29 ರನ್​ಗಳಿಸಿದರು. ಹಾರ್ದಿಕ್ ಪಾಂಡ್ಯ 1, ಶುಭ್​ಮನ್ ಗಿಲ್ 5, ಶಿವಂ ದುಬೆ 5 ರನ್​ಗಳಿಗೆ ವಿಕೆಟ್ ಒಪ್ಪಿಸಿ ನಿರಾಶೆ ಮೂಡಿಸಿದರು. ಸೂರ್ಯಕುಮಾರ್ ಯಾದವ್ ಬ್ಯಾಟಿಂಗ್​ಗೆ ಇಳಿಯದೇ ಅಚ್ಚರಿ ಮೂಡಿಸಿದರು. ಒಂದು ವೇಳೆ ಅವರು ದುಬೆ ಔಟ್ ಆದ ಬಳಿಕ ಬ್ಯಾಟಿಂಗ್​ಗೆ ಆಗಮಿಸಿದ್ದರೆ ತಂಡ 200 ರ ಗಡಿ ದಾಟುವ ಅವಕಾಶ ಸಿಗುತ್ತಿತ್ತು.