Last Updated:
ಭಾರತ ತಂಡದ ಮಾಜಿ ಮುಖ್ಯ ಕೋಚ್ ರವಿಶಾಸ್ತ್ರಿ ಸಾಯಿ ಸುದರ್ಶನ್‌ಗೆ ಬೆಂಬಲ ವ್ಯಕ್ತಪಡಿಸಿದ್ದಾರೆ. “ಸಾಯಿ ಸುದರ್ಶನ್ ಎಲ್ಲಾ ಸ್ವರೂಪಗಳಲ್ಲಿ ಭಾರತಕ್ಕಾಗಿ ಆಡಬಲ್ಲ ಯುವ ಪ್ರತಿಭೆ. ಅವರ ತಾಂತ್ರಿಕ ಕೌಶಲ್ಯ, ಇಂಗ್ಲೆಂಡ್‌ನ ಪರಿಸ್ಥಿತಿಗಳ ಬಗ್ಗೆ ತಿಳುವಳಿಕೆ, ಮತ್ತು ಎಡಗೈ ಬ್ಯಾಟಿಂಗ್ ಶೈಲಿಯು ಟೆಸ್ಟ್ ತಂಡದಲ್ಲಿ ಅವಕಾಶಕ್ಕೆ ಅರ್ಹವಾಗಿದೆ ಎಂದು ತಿಳಿಸಿದ್ದಾರೆ.
ಐಪಿಎಲ್ 2025ರ (IPL 2025) ರೋಚಕ ಹಣಾಹಣಿ ನಡೆಯುತ್ತಿದೆ. ಆದರೆ ಈ ಮಧ್ಯೆ ಮುಂದಿನ ತಿಂಗಳು ಭಾರತ ಕ್ರಿಕೆಟ್ ತಂಡ ಇಂಗ್ಲೆಂಡ್ (India vs England) ವಿರುದ್ಧ ಐದು ಟೆಸ್ಟ್ ಪಂದ್ಯಗಳ ಸರಣಿಗಾಗಿ ಪ್ರವಾಸ ಕೈಗೊಳ್ಳಲಿದೆ. ಟೂರ್ನಿ ಮುಗಿಯುವ ಮುನ್ನ ಎಲ್ಲರ ಚಿತ್ತ ನಿಧಾನವಾಗಿ ಆ ಸರಣಿಯತ್ತಾ ತಿರುಗುತ್ತಿದೆ. ಈ ಸರಣಿಯು 2025-27ರ ಐಸಿಸಿ ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್‌ನ (WTC 2025) ಭಾಗವಾಗಿದ್ದು, ಜೂನ್ 20ರಿಂದ ಆಗಸ್ಟ್ 4ರವರೆಗೆ ಲೀಡ್ಸ್, ಬರ್ಮಿಂಗ್‌ಹ್ಯಾಮ್, ಲಾರ್ಡ್ಸ್, ಮ್ಯಾಂಚೆಸ್ಟರ್, ಮತ್ತು ದಿ ಓವಲ್‌ನಲ್ಲಿ ನಡೆಯಲಿದೆ. ಆದರೆ, ಈ ಪ್ರವಾಸಕ್ಕೆ ತಂಡದ ಆಯ್ಕೆಯ ಬಗ್ಗೆ ಕ್ರಿಕೆಟ್ ಅಭಿಮಾನಿಗಳು ಮತ್ತು ತಜ್ಞರ ನಡುವೆ ತೀವ್ರ ಚರ್ಚೆ ಆರಂಭವಾಗಿದೆ. ಈ ಸಂದರ್ಭದಲ್ಲಿ, ಐಪಿಎಲ್ 2025ರಲ್ಲಿ ಅತಿ ಹೆಚ್ಚು ರನ್ ಗಳಿಸಿದ ಗುಜರಾತ್ ಟೈಟಾನ್ಸ್‌ನ ಯುವ ಆಟಗಾರ ಸಾಯಿ ಸುದರ್ಶನ್‌ರನ್ನು ಬ್ಯಾಕಪ್ ಓಪನರ್ ಆಗಿ ಸೇರಿಸಿಕೊಳ್ಳಬೇಕೆಂಬ ಬೇಡಿಕೆ ಜೋರಾಗಿದೆ.
ಸಾಯಿ ಸುದರ್ಶನ್‌ರ ಐಪಿಎಲ್ ಪ್ರದರ್ಶನ
ಐಪಿಎಲ್ 2025ರಲ್ಲಿ ಸಾಯಿ ಸುದರ್ಶನ್ ಕೇವಲ 9 ಇನ್ನಿಂಗ್ಸ್‌ಗಳಲ್ಲಿ 456 ರನ್ ಗಳಿಸಿ ಗುಜರಾತ್ ಟೈಟಾನ್ಸ್‌ನ ಟಾಪ್ ರನ್ ಸ್ಕೋರರ್ ಆಗಿ ಮಿಂಚಿದ್ದಾರೆ. 5 ಅರ್ಧಶತಕಗಳೊಂದಿಗೆ ಅವರ ಬ್ಯಾಟಿಂಗ್ ಸ್ಥಿರತೆಯನ್ನು ತೋರಿಸಿದ್ದಾರೆ. ತಂಡದ ಇತರ ಆಟಗಾರರಾದ ಜೋಸ್ ಬಟ್ಲರ್ (406 ರನ್) ಮತ್ತು ಶುಭ್ಮನ್ ಗಿಲ್ (389 ರನ್) ಕೂಡ ಉತ್ತಮ ಪ್ರದರ್ಶನ ನೀಡಿದ್ದಾರಾದರೂ, ಸಾಯಿಯ ಫಾರ್ಮ್ ಎಲ್ಲರ ಗಮನ ಸೆಳೆದಿದೆ. ಇದರ ಜೊತೆಗೆ, ಸಾಯಿಯ ಇಂಗ್ಲಿಷ್ ಪಿಚ್‌ಗಳ ಅನುಭವವೂ ತಂಡದ ಆಯ್ಕೆಗೆ ಒಂದು ಕಾರಣವಾಗಿದೆ. 2023 ಮತ್ತು 2024ರ ಕೌಂಟಿ ಚಾಂಪಿಯನ್‌ಶಿಪ್‌ನಲ್ಲಿ ಸರ್ರೆಗಾಗಿ ಆಡಿದ ಅವರು 5 ಪಂದ್ಯಗಳಲ್ಲಿ 281 ರನ್ ಗಳಿಸಿದ್ದು, ಒಂದು ಶತಕ ಮತ್ತು ಅರ್ಧಶತಕವನ್ನು ಒಳಗೊಂಡಿದೆ. ಇದರಿಂದ ಇಂಗ್ಲೆಂಡ್‌ನ ಕಠಿಣ ಪಿಚ್‌ಗಳಲ್ಲಿ ಆಡುವ ಸಾಮರ್ಥ್ಯವನ್ನು ಅವರು ತೋರಿಸಿದ್ದಾರೆ.
ಸುದರ್ಶನ್ ಪರ ರವಿಶಾಸ್ತ್ರಿ ಬ್ಯಾಟಿಂಗ್
ಭಾರತ ತಂಡದ ಮಾಜಿ ಮುಖ್ಯ ಕೋಚ್ ರವಿಶಾಸ್ತ್ರಿ ಸಾಯಿ ಸುದರ್ಶನ್‌ಗೆ ಬೆಂಬಲ ವ್ಯಕ್ತಪಡಿಸಿದ್ದಾರೆ. “ಸಾಯಿ ಸುದರ್ಶನ್ ಎಲ್ಲಾ ಸ್ವರೂಪಗಳಲ್ಲಿ ಭಾರತಕ್ಕಾಗಿ ಆಡಬಲ್ಲ ಯುವ ಪ್ರತಿಭೆ. ಅವರ ತಾಂತ್ರಿಕ ಕೌಶಲ್ಯ, ಇಂಗ್ಲೆಂಡ್‌ನ ಪರಿಸ್ಥಿತಿಗಳ ಬಗ್ಗೆ ತಿಳುವಳಿಕೆ, ಮತ್ತು ಎಡಗೈ ಬ್ಯಾಟಿಂಗ್ ಶೈಲಿಯು ಟೆಸ್ಟ್ ತಂಡದಲ್ಲಿ ಅವಕಾಶಕ್ಕೆ ಅರ್ಹವಾಗಿದೆ. ಅವರು ಯಾವಾಗಲೂ ಆಯ್ಕೆಯ ಗಮನದಲ್ಲಿರುತ್ತಾರೆ,” ಎಂದು ಶಾಸ್ತ್ರಿ ಹೇಳಿದ್ದಾರೆ. ಸಾಯಿಯ ಪ್ರಥಮ ದರ್ಜೆ ಕ್ರಿಕೆಟ್‌ನಲ್ಲಿ 29 ಪಂದ್ಯಗಳಲ್ಲಿ 39.93 ಸರಾಸರಿಯಲ್ಲಿ 1957 ರನ್, ಇತ್ತೀಚಿನ ರಣಜಿ ಟ್ರೋಫಿಯಲ್ಲಿ ಮಿಂಚಿದ್ದ ಅವರು ದೆಹಲಿ ವಿರುದ್ಧ ದ್ವಿಶತಕ ಸೇರಿದಂತೆ 3 ಪಂದ್ಯಗಳನ್ನಾಡಿ 304 ರನ್ಗಳಿಸಿದ್ದಾರೆ.
ತಂಡದ ಆಯ್ಕೆಯ ಸವಾಲು
ಆದರೆ, ಇಂಗ್ಲೆಂಡ್ ಟೆಸ್ಟ್ ಸರಣಿಗೆ ಆರಂಭಿಕ ಸ್ಥಾನಕ್ಕೆ ರೋಹಿತ್ ಶರ್ಮಾ, ಯಶಸ್ವಿ ಜೈಸ್ವಾಲ್, ಮತ್ತು ಶುಭಮನ್ ಗಿಲ್ ಮೊದಲ ಆದ್ಯತೆಯಾಗಿದ್ದಾರೆ. ರೋಹಿತ್ ನಾಯಕತ್ವದ ಜೊತೆಗೆ ಜೈಸ್ವಾಲ್‌ರೊಂದಿಗೆ ಓಪನಿಂಗ್ ಮಾಡಿದರೆ, ಗಿಲ್ ಮೂರನೇ ಸ್ಥಾನದಲ್ಲಿ ಬ್ಯಾಟಿಂಗ್ ಮಾಡುವ ಸಾಧ್ಯತೆಯಿದೆ. ಇದರಿಂದ ಸಾಯಿ ಸುದರ್ಶನ್‌ಗೆ ಆಡುವ 11ರಲ್ಲಿ ಸ್ಥಾನ ಸಿಗುವುದು ಕಷ್ಟವಾಗಬಹುದು. ಆದಾಗ್ಯೂ, ಬ್ಯಾಕಪ್ ಓಪನರ್ ಆಗಿ ಅವರನ್ನು ತಂಡಕ್ಕೆ ಸೇರಿಸಿಕೊಳ್ಳುವ ಸಾಧ್ಯತೆ ಹೆಚ್ಚಿದೆ ಎಂದು ವರದಿಗಳು ತಿಳಿಸಿವೆ. ಕೆಲವು ವರದಿಗಳ ಪ್ರಕಾರ, 35 ಆಟಗಾರರನ್ನು ಭಾರತ ಮತ್ತು ಭಾರತ ಎ ತಂಡಗಳಿಗಾಗಿ ಶಾರ್ಟ್‌ಲಿಸ್ಟ್ ಮಾಡಲಾಗಿದ್ದು, ಮೇ ಎರಡನೇ ವಾರದಲ್ಲಿ ತಂಡವನ್ನು ಘೋಷಿಸಲಾಗುವುದು.
ಇತರ ಆಯ್ಕೆಗಳು ಮತ್ತು ಚರ್ಚೆ
ತಂಡದ ಆಯ್ಕೆಯಲ್ಲಿ ಕರಣ್ ನಾಯರ್ ಮತ್ತು ರಜತ್ ಪಾಟಿದಾರ್ ಅವರನ್ನು ಮಧ್ಯಮ ಕ್ರಮಾಂಕಕ್ಕೆ ಪರಿಗಣಿಸಲಾಗುತ್ತಿದೆ, ಆದರೆ ಶ್ರೇಯಸ್ ಅಯ್ಯರ್ ಮತ್ತು ಸರ್ಫರಾಜ್ ಖಾನ್‌ರ ಸೇರ್ಪಡೆ ಅನುಮಾನಾಸ್ಪದವಾಗಿದೆ. ಬೌಲಿಂಗ್‌ನಲ್ಲಿ ಕುಲದೀಪ್ ಯಾದವ್‌ ರವಿಚಂದ್ರನ್ ಅಶ್ವಿನ್‌ ಸ್ಥಾನ ತುಂಬುವ ಸಾಧ್ಯತೆ ಇದೆ. ಈ ಎಲ್ಲಾ ಊಹಾಪೋಹಗಳ ಮಧ್ಯೆ, ಸಾಯಿ ಸುದರ್ಶನ್‌ರ ಇಂಗ್ಲಿಷ್ ನೆಲದಲ್ಲಿನ ಅನುಭವ ಮತ್ತು ಐಪಿಎಲ್ ಫಾರ್ಮ್ ಅವರನ್ನು ತಂಡದಲ್ಲಿ ಸ್ಥಾನಕ್ಕೆ ಬಲವಾದ ಅಭ್ಯರ್ಥಿಯನ್ನಾಗಿಸಿದೆ.
