Innovation: ಹಾಳಾಗಿ ಬಿದ್ದ ಟಯರ್‌ ಗಳಿಂದ ತಪ್ಪಿತು ಅಪಘಾತ! ಇವು ರಸ್ತೆ ಕಾಯೋ ಗಾಲಿಗಳು | Mangalore Kadur Highway Tire Barricade New Measure to Prevent Accidents | ದಕ್ಷಿಣ ಕನ್ನಡ

ಬಂಟ್ವಾಳ ಪೇಟೆ ಮತ್ತು ಹೆದ್ದಾರಿಯನ್ನು ಸಂಪರ್ಕಿಸುವ ಇಲ್ಲಿ ದಿನಂಪ್ರತಿ ಸಣ್ಣಪುಟ್ಟ ಅಪಘಾತಗಳು ಸಂಭವಿಸುತ್ತಿದ್ದವು. ಈ ಕಾರಣಕ್ಕಾಗಿ ಪೊಲೀಸ್ ಇಲಾಖೆ ಕಬ್ಬಿಣದ ಬ್ಯಾರಿಕೇಡ್ ಅನ್ನು ಅಳವಡಿಸಿತ್ತು. ಆದರೆ ಈ ಬ್ಯಾರಿಕೇಡ್‌ಗೆ ಡಿಕ್ಕಿಯಾಗಿ ಹಲವು ವಾಹನಗಳು ಜಖಂ ಆದ, ದ್ವಿಚಕ್ರವಾಹನ ಸವಾರರು ಗಾಯಗೊಂಡ ಪ್ರಕರಣಗಳೂ ನಡೆದಿವೆ. ಈ ಹಿನ್ನೆಲೆಯಲ್ಲಿ ಈ ಭಾಗದ ಸ್ಥಳೀಯರೊಬ್ಬರು ಕಬ್ಬಿಣದ ಬ್ಯಾರಿಕೇಡ್ ಬದಲು ಬಳಸಿ ಡಂಪ್ ಮಾಡಿದ ಟಯರ್‌ಗಳನ್ನು ಜೋಡಿಸಿ ಇಲ್ಲಿ ಬ್ಯಾರಿಕೇಡ್ ನಿರ್ಮಿಸಿದ್ದಾರೆ.

ಟಯರ್‌ಗಳನ್ನು ಆಕರ್ಷಕವಾಗಿ ಜೋಡಿಸಿ ಬ್ಯಾರಿಕೇಡ್ ಮಾದರಿಯಲ್ಲೇ ಮಾಡಲಾಗಿದೆ. ರಸ್ತೆಯ ನಾಲ್ಕು ಕಡೆಗಳಲ್ಲಿ ಇದನ್ನು ನಿರ್ಮಿಸಲಾಗಿದ್ದು, ರಾತ್ರಿ ವೇಳೆ ವಾಹನ ಸವಾರರಿಗೆ ಸ್ಪಷ್ಟವಾಗಿ ಇದು ಕಾಣುವಂತೆ ಇದಕ್ಕೆ ರಿಫ್ಲೆಕ್ಟರ್ ಸ್ಟಿಕ್ಕರ್, ರಾತ್ರಿ ವೇಳೆ ಮಾತ್ರ ಉರಿಯುವ ಸೋಲಾರ್ ಆಧಾರಿತ ಲೈಟ್‌ಗಳನ್ನು ಅಳವಡಿಸಲಾಗಿದೆ. ಈ ಟಯರ್‌ಗಳಿಂದ ನಿರ್ಮಾಣಗೊಂಡ ಬ್ಯಾರಿಕೇಡ್‌ಗೆ ನಿಯಂತ್ರಣ ತಪ್ಪಿದ ವಾಹನಗಳು ಡಿಕ್ಕಿ ಹೊಡೆದರೂ ವಾಹನಕ್ಕೆ ಮತ್ತು ಸವಾರರಿಗೆ ಹಾನಿಯಾಗದೆ ಬಚಾವ್ ಆದ ಹಲವು ಘಟನೆಗಳು ನಡೆದಿವೆ. ಈ ಕಾರಣಕ್ಕಾಗಿ ಬ್ಯಾರಿಕೇಡ್ ವಾಹನ ಸವಾರರ ಸುರಕ್ಷತೆಗೂ ಕಾರಣವಾಗಿದೆ.