Interesting Story: ಕಾಳಿಕಾಂಬೆಗಾಗಿ ಗೀತೆ ಬರೆದು ಹಾಡಿದ ಮುಸ್ಲಿಂ ಯುವಕ! ಇದು ರಮ್ಲಾನ್‌ ಎಂಬ ದೇವಿಭಕ್ತ ಗಾಯಕನ ಕಥೆ | Beltangadi Ramlan music breaks religious barriers devotional songs viral | ದಕ್ಷಿಣ ಕನ್ನಡ

ಸಂಗೀತಕ್ಕೆ ಜಾತಿ ಧರ್ಮದ ಅಂತರವಿಲ್ಲ. ಸಿರಿ ಸಂಪತ್ತಿನ ಬೇಲಿ ಇಲ್ಲ ಅನ್ನೋದನ್ನ ದಕ್ಷಿಣ ಕನ್ನಡ ಜಿಲ್ಲೆಯ ಬೆಳ್ತಂಗಡಿ ತಾಲೂಕಿನ ಮುಸ್ಲಿಂ ಯುವಕನೋರ್ವ ನಿರೂಪಿಸಿದ್ದಾನೆ. ಮನೆಯ ಹತ್ತಿರದ ಬೆಟ್ಟದ ಮೇಲಿರುವ ದೇವಸ್ಥಾನದಲ್ಲಿ ಹಾಕುತ್ತಿದ್ದ ಭಕ್ತಿಗೀತೆಗಳನ್ನೇ ಕೇಳಿ ಬೆಳೆದ ರಮ್ಲಾನ್ ಎಂಬ ಮುಸ್ಲಿಂ ಯುವಕ, ಹಿಂದೂ ದೇವರ ಭಕ್ತಿಗೀತೆಗಳನ್ನು ಹಾಡಿ ಸಂಗೀತಕ್ಕೆ ಧರ್ಮದ ಅಂತರವಿಲ್ಲ ಎಂಬುದನ್ನು ಸಾಧಿಸಿದ್ದಾರೆ.

ಬೆಳ್ತಂಗಡಿ ತಾಲೂಕಿನ ಸವಣಾಲು ಗ್ರಾಮದ ಶ್ರೀ ದುರ್ಗಾಕಾಳಿಕಾಂಬ ದೇವಸ್ಥಾನ ಕಾಳಿಕಾಬೆಟ್ಟದಲ್ಲಿದ್ದು, ಬೆಟ್ಟದ ಕೆಳಗೆ ರಮ್ಲಾನ್ ಅವರ ಮನೆಯಿದೆ. ಎಳವೆಯಿಂದಲೇ ದೇವಸ್ಥಾನದ ಎಲ್ಲಾ‌ ಪ್ರಕ್ರಿಯೆಯಲ್ಲಿ ಭಾಗವಹಿಸುತ್ತಿದ್ದ ರಮ್ಲಾನ್ ಅವರಿಗೆ ವಿದ್ಯಾಭೂಷಣ್ ಅವರು ಹಾಡುವ ಭಕ್ತಿಗೀತೆಗಳು ಅಂದ್ರೆ ಅಚ್ಚುಮೆಚ್ಚು. ಮನೆಯವರೆಗೆ ಕೇಳುತ್ತಿದ್ದ ಹಾಡುಗಳನ್ನು ಇಷ್ಟಪಟ್ಟು ಆಲಿಸುತ್ತಿದ್ದ ರಮ್ಲಾನ್, ಹಾಡನ್ನು ಕೇಳಿಯೇ ಅಭ್ಯಾಸ ಮಾಡಿಕೊಂಡಿದ್ದಾರೆ.

ಭಕ್ತಿಗೀತೆಗಳನ್ನು ಕೇಳಿ ಕೇಳಿಯೇ ಹಾಡುತ್ತಾ ಬೆಳೆದ ರಮ್ಲಾನ್ ಇಂದು ಸುಶ್ರಾವ್ಯವಾಗಿ ಹಾಡುತ್ತಾರೆ. ಕಡು ಬಡತನದ ನಡುವೆಯೇ ದ್ವಿತೀಯ ಪಿಯುಸಿ ವರೆಗೆ ವಿದ್ಯಾಭ್ಯಾಸ ಮಾಡಿ ಸದ್ಯ ಟೆಕ್ನೀಷಿಯನ್ ಆಗಿ ಕೆಲಸ ಮಾಡುತ್ತಿದ್ದಾರೆ. ದುರ್ಗಾಕಾಳಿಕಾಂಬ ದೇವಸ್ಥಾನ ಮತ್ತು ಪರಿಸರ ಹಿಂದೂ ಬಾಂಧವರ ಜೊತೆ ಉತ್ತಮ ಬಾಂಧವ್ಯ ಹೊಂದಿರುವ ರಮ್ಲಾನ್ ಮೂರು ವರ್ಷಗಳ‌ ಹಿಂದೆ ದುರ್ಗಾ ಕಾಳಿಕಾಂಬೆಯನ್ನು ಸ್ತುತಿಸುವ ಹಾಡನ್ನು ಬರೆದು, ತಮ್ಮದೇ ಕಂಠದಲ್ಲಿ ಹಾಡಿ, ದೇವಿಗೆ ಅರ್ಪಣೆ ಮಾಡಿದ್ದರು.