Last Updated:
ಐಪಿಎಲ್ 2025ರ ಮೆಗಾ ಹರಾಜಿನಲ್ಲಿ ಅನ್‌ಸೋಲ್ಡ್ ಆಗಿದ್ದ ಶಾರ್ದೂಲ್ ಠಾಕೂರ್, ಲಖನೌ ಸೂಪರ್ ಜೈಂಟ್ಸ್ ತಂಡದಲ್ಲಿ ಗಾಯಗೊಂಡ ಮೋಹ್ಸಿನ್ ಖಾನ್ ಸ್ಥಾನದಲ್ಲಿ ಆಡಲು ಅವಕಾಶ ಪಡೆದಿದ್ದಾರೆ.
ಇಂಡಿಯನ್ ಪ್ರೀಮಿಯರ್ ಲೀಗ್ (IPL) 2025 ಸೀಸನ್ ಆರಂಭಕ್ಕೆ ದಿನಗಣನೆ ಶುರುವಾಗಿದ್ದು, ಈ ನಡುವೆ ಒಂದು ಅಚ್ಚರಿ ಬೆಳವಣಿಗೆ ಗಮನ ಸೆಳೆದಿದೆ. ಐಪಿಎಲ್ 2025ರ ಮೆಗಾ ಹರಾಜಿನಲ್ಲಿ ಯಾವ ತಂಡವೂ ಖರೀದಿಸದೇ ಅನ್‌ಸೋಲ್ಡ್ ಆಗಿ (Unsold) ಉಳಿದ ಭಾರತದ ಆಲ್‌ರೌಂಡರ್ ಶಾರ್ದೂಲ್ ಠಾಕೂರ್‌ಗೆ (Shardul Thakur) ಈಗ ಮತ್ತೆ ಆಡುವ ಅವಕಾಶ ಸಿಕ್ಕಿದೆ. ಲಖನೌ ಸೂಪರ್ ಜೈಂಟ್ಸ್ (LSH) ತಂಡದಲ್ಲಿ ಗಾಯಗೊಂಡ ಆಟಗಾರನ ಸ್ಥಾನದಲ್ಲಿ ರೀಪ್ಲೇಸ್‌ಮೆಂಟ್ ಆಗಿ ಅವರು ಕಣಕ್ಕಿಳಿಯಲಿದ್ದಾರೆ ಎಂದು ತಿಳಿದುಬಂದಿದೆ.
ಲಕ್ನೋ ತಂಡಕ್ಕೆ ಗಾಯದ ಸಮಸ್ಯೆ
ಶಾರ್ದೂಲ್ ಠಾಕೂರ್ ಅವರನ್ನು ಚೆನ್ನೈ ಸೂಪರ್ ಕಿಂಗ್ಸ್ ತಂಡವು 2024ರ ಸೀಸನ್ ನಂತರ ರಿಲೀಜ್ ಮಾಡಿತ್ತು. ಆದರೆ, ನವೆಂಬರ್ 2024ರಲ್ಲಿ ನಡೆದ ಮೆಗಾ ಹರಾಜಿನಲ್ಲಿ ಯಾವ ತಂಡವೂ ಅವರನ್ನು ಕೊಂಡುಕೊಳ್ಳಲು ಮುಂದಾಗಲಿಲ್ಲ. ಆದರೆ ಈಗ ಲಖನೌ ತಂಡದ ಪೇಸರ್ ಮೊಹ್ಸಿನ್ ಖಾನ್ ಗಾಯದ ಸಮಸ್ಯೆಯಿಂದ ಬಳಲುತ್ತಿದ್ದಾರೆ. ಮೊಹ್ಸಿನ್ ಖಾನ್ ಎಸಿಎಲ್ ಗಾಯದಿಂದ ಚೇತರಿಸಿಕೊಳ್ಳದ ಕಾರಣ, ಐಪಿಎಲ್ 2025ರ ಆರಂಭಿಕ ಪಂದ್ಯಗಳಿಗೆ ಅವರು ಲಭ್ಯವಿಲ್ಲ ಎಂದು ತಿಳಿದುಬಂದಿದೆ. ಇದೇ ರೀತಿ, ಮತ್ತೊಬ್ಬ ವೇಗಿ ಮಯಾಂಕ್ ಯಾದವ್ ಕೂಡ ಪೂರ್ತಿ ಫಿಟ್‌ನೆಸ್ ಪಡೆಯದ ಕಾರಣ ಕೆಲವು ಪಂದ್ಯಗಳಿಗೆ ದೂರವಾಗುವ ಸಾಧ್ಯತೆ ಇದೆ. ಈ ಪರಿಸ್ಥಿತಿಯಲ್ಲಿ ಎಲ್‌ಎಸ್‌ಜಿ ತಂಡದ ಆಡಳಿತ ಮಂಡಳಿ ಶಾರ್ದೂಲ್ ಠಾಕೂರ್‌ರನ್ನು ತಂಡಕ್ಕೆ ಸೇರಿಸಿಕೊಳ್ಳುವ ನಿರ್ಧಾರ ಕೈಗೊಂಡಿದೆ ಎನ್ನಲಾಗಿದೆ.
ಇದನ್ನೂ ಓದಿ: IPLನ ಯಶಸ್ವಿ ತಂಡ, ಗರಿಷ್ಠ ಸ್ಕೋರ್, ಬ್ಯಾಟಿಂಗ್-ಬೌಲಿಂಗ್ ದಾಖಲೆ! ಶ್ರೀಮಂತ ಲೀಗ್ನ A to Z ರೆಕಾಡ್ಸ್
ತಂಡದ ಮೆಂಟರ್ ಜಹೀರ್ ಖಾನ್ ಹೇಳಿಕೆ
“ನಮ್ಮ ಕೆಲವು ಆಟಗಾರರು ಗಾಯಗಳಿಂದ ಬಳಲುತ್ತಿದ್ದಾರೆ. ಕೆಲವರು ನ್ಯಾಷನಲ್ ಕ್ರಿಕೆಟ್ ಅಕಾಡೆಮಿಯಲ್ಲಿ (NCA) ಚಿಕಿತ್ಸೆ ಪಡೆಯುತ್ತಿದ್ದರೆ, ಇನ್ನು ಕೆಲವರು ಫಿಜಿಯೋಗಳ ಮೇಲ್ವಿಚಾರಣೆಯಲ್ಲಿದ್ದಾರೆ. ಅವರ ಸ್ಥಿತಿಯ ಬಗ್ಗೆ ಇಷ್ಟು ಬೇಗ ಯಾವುದೇ ತೀರ್ಮಾನಕ್ಕೆ ಬರಲು ಸಾಧ್ಯವಿಲ್ಲ,” ಎಂದು ಲಖನೌ ಸೂಪರ್ ಜೈಂಟ್ಸ್‌ನ ಮೆಂಟರ್ ಜಹೀರ್ ಖಾನ್ ಇತ್ತೀಚೆಗೆ ತಿಳಿಸಿದ್ದಾರೆ.
ಶಾರ್ದೂಲ್ ಠಾಕೂರ್‌ರ ಐಪಿಎಲ್ ದಾಖಲೆ
ಶಾರ್ದೂಲ್ ಠಾಕೂರ್ ಐಪಿಎಲ್‌ನಲ್ಲಿ ಈವರೆಗೆ 95 ಪಂದ್ಯಗಳನ್ನು ಆಡಿದ್ದು, 94 ವಿಕೆಟ್‌ಗಳನ್ನು ಪಡೆದಿದ್ದಾರೆ. ಅವರ ಸರಾಸರಿ 30.52 ಮತ್ತು ಎಕಾನಮಿ ರೇಟ್ 9.23 ಆಗಿದೆ. 2021ರಲ್ಲಿ ಸಿಎಸ್‌ಕೆ ಪರ 16 ಪಂದ್ಯಗಳಲ್ಲಿ 21 ವಿಕೆಟ್‌ಗಳನ್ನು ಕಿತ್ತು ತಂಡದ ಗೆಲುವಿನಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು. ಆದರೆ 2024ರ ಸೀಸನ್‌ನಲ್ಲಿ ಅವರು 9 ಪಂದ್ಯಗಳಲ್ಲಿ ಕೇವಲ 5 ವಿಕೆಟ್‌ಗಳನ್ನು ಪಡೆದು ನಿರಾಸೆ ಮೂಡಿಸಿದ್ದರು.
ಇದನ್ನೂ ಓದಿ: IPL ಮೊದಲ ಪಂದ್ಯದಲ್ಲಿ RCB vs KKR ಮುಖಾಮುಖಿ! ಹೆಡ್ ಟು ಹೆಡ್, ಪ್ಲೇಯಿಂಗ್ 11 ಹೀಗಿರಲಿದೆ
ಡೆಲ್ಲಿ ವಿರುದ್ಧ ಕಣಕ್ಕೆ
ಲಖನೌ ಸೂಪರ್ ಜೈಂಟ್ಸ್ ತನ್ನ ಐಪಿಎಲ್ 2025ರ ಮೊದಲ ಪಂದ್ಯವನ್ನು ಮಾರ್ಚ್ 24ರಂದು ದಿಲ್ಲಿ ಕ್ಯಾಪಿಟಲ್ಸ್ ವಿರುದ್ಧ ಆಡಲಿದೆ. ವಿಶಾಖಪಟ್ಟಣಂನ ವೈಯಸ್ ರಾಜಶೇಖರ ರೆಡ್ಡಿ ಕ್ರಿಕೆಟ್ ಸ್ಟೇಡಿಯಂನಲ್ಲಿ ಈ ಪಂದ್ಯ ನಡೆಯಲಿದ್ದು, ಶಾರ್ದೂಲ್ ಠಾಕೂರ್ ಈ ಮ್ಯಾಚ್‌ಗೆ ಲಭ್ಯವಿರುತ್ತಾರೆ ಎಂದು ಮೂಲಗಳು ತಿಳಿಸಿವೆ. ಈ ಪಂದ್ಯದಲ್ಲಿ ರಿಷಭ್ ಪಂತ್ ನಾಯಕತ್ವದ ದಿಲ್ಲಿ ತಂಡವನ್ನು ಎದುರಿಸಲು ಎಲ್‌ಎಸ್‌ಜಿ ಸಜ್ಜಾಗುತ್ತಿದೆ.
ಗಾಯಾಳು ಆಟಗಾರರ ಸಮಸ್ಯೆಯಿಂದ ಕಂಗೆಟ್ಟಿರುವ ಲಖನೌ ತಂಡಕ್ಕೆ ಶಾರ್ದೂಲ್ ಠಾಕೂರ್ ಸೇರ್ಪಡೆ ಒಂದು ದೊಡ್ಡ ಬಲವಾಗಬಹುದು. ಅವರ ಅನುಭವ ಮತ್ತು ಆಲ್‌ರೌಂಡ್ ಸಾಮರ್ಥ್ಯ ತಂಡಕ್ಕೆ ಹೊಸ ಆಯಾಮವನ್ನು ನೀಡಲಿದೆ ಎಂಬ ನಿರೀಕ್ಷೆ ಇದೆ. ಐಪಿಎಲ್ 2025ರ ಈ ಆವೃತ್ತಿಯಲ್ಲಿ ಶಾರ್ದೂಲ್ ತಮ್ಮ ಪ್ರತಿಭೆಯನ್ನು ಮತ್ತೊಮ್ಮೆ ಸಾಬೀತುಪಡಿಸುವ ಅವಕಾಶವನ್ನು ಕಾಯ್ದಿರಿಸಿದ್ದಾರೆ.
March 21, 2025 6:38 PM IST
