Last Updated:
ಲಕ್ನೋ ಸೂಪರ್ ಜೈಂಟ್ಸ್ ಕೋಲ್ಕತ್ತಾ ನೈಟ್ ರೈಡರ್ಸ್ ವಿರುದ್ಧ 4 ರನ್ಗಳ ರೋಚಕ ಜಯ ಸಾಧಿಸಿದೆ. ಕೆಕೆಆರ್ 234 ರನ್ಗಳಿಸಿ ಸೋಲನುಭವಿಸಿತು. ರಹಾನೆ, ವೆಂಕಟೇಶ್ ಅಯ್ಯರ್, ರಿಂಕು ಸಿಂಗ್ ಹೋರಾಟ ವ್ಯರ್ಥವಾಯಿತು.
ಕೋಲ್ಕತ್ತಾದ ಈಡನ್ ಗಾರ್ಡನ್ಸ್‌ನಲ್ಲಿ ನಡೆಯುತ್ತಿರುವ ಪ್ರಸಕ್ತ ಋತುವಿನ 21ನೇ ಪಂದ್ಯದಲ್ಲಿ ಕೋಲ್ಕತ್ತಾ ನೈಟ್ ರೈಡರ್ಸ್ ವಿರುದ್ಧ ಲಕ್ನೋ ಸೂಪರ್ ಜೈಂಟ್ಸ್ 4 ರನ್ಗಳ ರೋಚಕ ಜಯ ಸಾಧಿಸಿದೆ. ಲಕ್ನೋ ನೀಡಿದ್ದ 239ರನ್ಗಳ ಗುರಿಯನ್ನ ಬೆನ್ನಟ್ಟಿದ ಕೆಕೆಆರ್ 20 ಓವರ್ಗಳಲ್ಲಿ 7 ವಿಕೆಟ್ ಕಳೆದುಕೊಂಡು 234ರನ್ಗಳಿಸಿ, ಕೇವಲ 4 ರನ್ಗಳ ಸೋಲು ಕಂಡಿತು. ನಾಯಕ ರಹಾನೆ (61), ವೆಂಕಟೇಶ್ ಅಯ್ಯರ್ (45) ಹಾಗೂ ರಿಂಕು ಸಿಂಗ್ (ಅಜೇಯ 38) ಗೆಲುವಿಗಾಗಿ ನಡೆಸಿದ ಹೋರಾಟ ವ್ಯರ್ಥವಾಯಿತು.
ಟಾಸ್ ಗೆದ್ದ ಕೆಕೆಆರ್ ಲಕ್ನೋಗೆ ಬ್ಯಾಟಿಂಗ್ ನೀಡಿತು. ಇನ್ನಿಂಗ್ಸ್ ಆರಂಭಿಸಿದ ಮಾರ್ಷ್-ಮಾರ್ಕ್ರಮ್ ಜೋಡಿ, ಮೊದಲ ವಿಕೆಟ್ ಜೊತೆಯಾಟದಲ್ಲೇ 10.2 ಓವರ್ಗಳ ಆಟವಾಡಿ 99 ರನ್ ಸೇರಿಸಿದರು. ಕಳೆದ ಪಂದ್ಯದಲ್ಲಿ ಅರ್ಧಶತಕ ಸಿಡಿಸಿ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದ್ದ ಮಾರ್ಕ್ರಮ್ ಇಂದು 28 ಎಸೆತಗಳಲ್ಲಿ ಬೌಂಡರಿ, 2 ಸಿಕ್ಸರ್ ಸಹಿತ 47 ರನ್ಗಳಿಸಿ ಹರ್ಷಿತ್ ರಾಣಾ ಬೌಲಿಂಗ್ನಲ್ಲಿ ಬೌಲ್ಡ್ ಆದರು.
ವಿಕೆಟ್ ಕಳೆದುಕೊಂಡರೂ ಲಕ್ನೋ ಬ್ಯಾಟರ್ಗಳ ಅಬ್ಬರ ನಿಲ್ಲಲಿಲ್ಲ. ಮಿಚೆಲ್ ಮಾರ್ಷ್ ಹಾಗೂ ಪೂರನ್ 2ನೇ ವಿಕೆಟ್ ಜೊತೆಯಾಟದಲ್ಲಿ ಕೇವಲ 30 ಎಸೆತಗಳಲ್ಲಿ 71 ರನ್ ಸೇರಿಸಿದರು. ಆ್ಯಂಡ್ರೆ ರಸೆಲ್ ಈ ಸ್ಫೋಟಕ ಜೋಡಿಯನ್ನ ಬೇರ್ಪಡಿಸಿದರು. ಮಾರ್ಷ್ 48 ಎಸೆತಗಳಲ್ಲಿ 6 ಬೌಂಡರಿ, 5 ಸಿಕ್ಸರ್ಗಳ ನೆರವಿನಿಂದ 81 ರನ್ಗಳಿಸಿ ಔಟ್ ಆದರು.
ನಂತರ ಕೆಕೆಆರ್ ಬೌಲರ್ಗಳನ್ನ ಬೆವರಿಳಿಸುವ ಕೆಲಸ ಪೂರನ್ ತೆಗೆದುಕೊಂಡರು. ಕೊನೆಯವರೆಗೂ ಅಬ್ಬರಿಸಿದ ಪೂರನ್ 36 ಎಸೆತಗಳಲ್ಲಿ 7 ಬೌಂಡರಿ, 8 ಸಿಕ್ಸರ್ಗಳ ಸಹಿತ ಅಜೇಯ 86 ರನ್ಗಳಿಸಿದರು.
ಕೆಕೆಆರ್ ಬೌಲರ್ಗಳ ಪೈಕಿ ಹರ್ಷಿತ್ ರಾಣಾ 2 ವಿಕೆಟ್ ಪಡೆದರಾದರೂ 51ರನ್ ಬಿಟ್ಟುಕೊಟ್ಟು ದುಬಾರಿಯಾದರು. ಆ್ಯಂಡ್ರೆ ರಸೆಲ್ 32ಕ್ಕೆ1 ವಿಕೆಟ್ ಪಡೆದರು.
April 08, 2025 7:34 PM IST
