Kukke Rathotsava: ಕುಕ್ಕೆ ಸುಬ್ರಹ್ಮಣ್ಯ ಸ್ವಾಮಿಯ ರಥೋತ್ಸವ ಸಂಭ್ರಮ, ಅಪಾರ ಭಕ್ತರ ಸಡಗರ! | Kukke Subramanya Rathotsava | ದಕ್ಷಿಣ ಕನ್ನಡ

ರಥೋತ್ಸವನ್ನು ಕಣ್ತುಂಬಿಕೊಳ್ಳಲು ರಾಜ್ಯ ಹಾಗೂ ಹೊರ ರಾಜ್ಯದಿಂದಲೂ ಭಕ್ತರ ದಂಡು ಕ್ಷೇತ್ರಕ್ಕೆ ಆಗಮಿಸಿ, ಬ್ರಹ್ಮರಥವನ್ನು ಕಂಡು ಪುನೀತರಾದರು. ಬ್ರಹ್ಮರಥದ ಹಿಂದಿನ ದಿನ ಅಂದರೆ ಪಂಚಮಿಯಂದು ರಾತ್ರಿ ಸುಬ್ರಹ್ಮಣ್ಯ ಸ್ವಾಮಿಯ ಪಂಚಮಿ ರಥೋತ್ಸವ ನಡೆಯುತ್ತದೆ. ಮಧ್ಯರಾತ್ರಿ ಸುಮಾರಿಗೆ ನೆರವೇರುವ ಈ ರಥೋತ್ಸವ ಸಂದರ್ಭದಲ್ಲೂ ಸಾವಿರಾರು ಸಂಖ್ಯೆಯಲ್ಲಿ ಭಕ್ತಾಧಿಗಳು ಸೇರುತ್ತಾರೆ. ಕ್ಷೇತ್ರದಲ್ಲಿ ಚಂಪಾಷಷ್ಠಿ ಪ್ರಯುಕ್ತ ಮೂರು ದಿನಗಳ ಕಾಲ ವಿಶೇಷ ಧಾರ್ಮಿಕ ವಿಧಿ-ವಿಧಾನಗಳು ನಡೆಯುತ್ತದೆ. ಚೌತಿಯಂದು ಸುಬ್ರಹ್ಮಣ್ಯ ಸ್ವಾಮಿಗೆ ಹೂವಿನ ರಥೋತ್ಸವ ನಡೆದರೆ, ಪಂಚಮಿಯಂದು ಪಂಚಮಿ ರಥೋತ್ಸವ ಹಾಗೂ ಷಷ್ಠಿಯಂದು ಬ್ರಹ್ಮರಥೋತ್ಸವ ನಡೆಯುತ್ತದೆ.

ಕುಕ್ಕೆ ಸುಬ್ರಹ್ಮಣ್ಯ ಬ್ರಹ್ಮರಥವೂ ಕೂಡ ತನ್ನದೇ ಆದ ವೈಶಿಷ್ಟ್ಯವನ್ನು ಹೊಂದಿದೆ. ಕ್ಷೇತ್ರದಲ್ಲಿ ವಾರ್ಷಿಕ ಜಾತ್ರೋತ್ಸವ ಆರಂಭವಾಗುವ ಒಂದು ತಿಂಗಳ ಮೊದಲು ಈ ಬ್ರಹ್ಮರಥಕ್ಕೆ ಗೂಟ ಹೊಡೆಯುವ ಸಂಪ್ರದಾಯವನ್ನು ಮಾಡಲಾಗುತ್ತದೆ. ಆ ಬಳಿಕ ಇಲ್ಲಿನ ಮೂಲನಿವಾಸಿಗಳಾದ ಮಲೆಕುಡಿಯರ ಒಂದು ತಂದ ಕ್ಷೇತ್ರದ ಪಕ್ಕದಲ್ಲೇ ಇರುವ ಕುಮಾರಪರ್ವತ ಕಾಡುಗೀಗೆ ತೆರಾಲಿ ಬಿದಿರು ಸಂಗ್ರಹಿಸುವ ಕಾರ್ಯದಲ್ಲಿ ತೊಡಗುತ್ತದೆ. ಬ್ರಹ್ಮರಥವನ್ನು ಬಿದಿರನ್ನೇ ಬಳಸಿ ಕಟ್ಟಲಾಗುತ್ತಿದ್ದು, ಇದಕ್ಕೆ ಹಗ್ಗ ಹಾಗು ಇತರ ವಸ್ತುಗಳನ್ನು ಉಪಯೋಗಿಸುವಂತಿಲ್ಲ. ಅದೇ ರೀತಿ ಬ್ರಹ್ಮರಥ ಎಳೆಯುವ ಸಂದರ್ಭದಲ್ಲೂ ಇದೇ ಬಿದಿರುಗಳನ್ನು ಬಳಸಿಯೇ ರಥವನ್ನು ಎಳೆಯೋದು ಕುಕ್ಕೆಯ ರಥೋತ್ಸವದ ವಿಶೇಷತೆಯೂ ಆಗಿದೆ.