Laksha Deepotsava: ಪುತ್ತೂರು ಮಹಾಲಿಂಗನ ಸಾನಿಧ್ಯದಲ್ಲಿ ಹೊತ್ತಿದ ಲಕ್ಷ ಹಣತೆಗಳು, ಝಗಮಗಿಸಿದ ದೇವಳ | Lakshadeepotsava dazzles devotees at Mahalingeshwara Devalaya in Puttur | ದಕ್ಷಿಣ ಕನ್ನಡ

ದೇವಳದಲ್ಲಿ ಬೆಳಿಗ್ಗೆ ಲಕ್ಷ ಬಿಲ್ವಾರ್ಚನೆ ಸೇವೆ ನಡೆಯಿತು. ಬೆಳಿಗ್ಗೆಯಿಂದ ಸಂಜೆ ವರೆಗೆ ವಿವಿಧ ಭಜನಾ ಸಂಘಗಳಿಂದ ಭಜನೆ ನಡೆಯಿತು. ಸಂಜೆ ರಾಮಕೃಷ್ಣ ಕಾಟುಕುಕ್ಕೆ ನೇತೃತ್ವದಲ್ಲಿ ಸಾಮೂಹಿಕ ಭಜನೆ ನಡೆಯಿತು. ಬಳಿಕ ಲಲಿತ ಸಹಸ್ರನಾಮ ಪಠಣದೊಂದಿಗೆ ಸಾಮೂಹಿಕ ಕುಂಕುಮಾರ್ಚನೆ ನಡೆಯಿತು.

ದೇವಳ ಎದುರಿನ ರಥಬೀದಿಯಲ್ಲಿ ಸಂಜೆ ಭಕ್ತರು ರಂಗೋಲಿ ಬಿಡಿಸಿ, ರಥಬೀದಿಯ ಎರಡೂ ಬದಿಗಳಲ್ಲಿ ಹಣತೆ ದೀಪಗಳ ಜೋಡಣೆ ಮಾಡಿದರು. ದೇವಳಕ್ಕೆ ಸೇರಿದ  ಪೂರ್ಣ ರಥಬೀದಿ, ಪುಷ್ಕರಣಿ ಸುತ್ತ, ಧ್ಯಾನರೂಢ ಶಿವಮೂರ್ತಿ, ಮೂಲನಾಗನ ಕಟ್ಟೆ ಮತ್ತು ಅಯ್ಯಪ್ಪ ಗುಡಿ ವಠಾರದಲ್ಲಿ, ಗೋಶಾಲೆ, ರಥಮಂದಿರದ ಒಳಗೆ ಮತ್ತು ಸುತ್ತಮುತ್ತ, ಮಹಾರುದ್ರಯಾಗ ಶಾಲೆ ಮೊದಲಾದ ಕಡೆಗಳಲ್ಲಿ ರಂಗೋಲಿ ಬಿಡಿಸಿ, ಹಣತೆ ದೀಪಗಳನ್ನು ಇಟ್ಟರು. ಮುಸ್ಸಂಜೆ ಹಣತೆಗಳನ್ನು ಬೆಳಗಲಾಯಿತು.

ರಾತ್ರಿ ಪೂಜೆಯ ಬಳಿಕ ದೇವರ ಬಲಿ ಹೊರಟು ಒಳಾಂಗಣ ಹಾಗೂ ಹೊರಾಂಗಣದಲ್ಲಿ ತಂತ್ರ ಸುತ್ತು, ರಾಜಾಂಗಣದಲ್ಲಿ ಉಡಿಕೆ, ಬೆಂಡೆ ಸುತ್ತುಗಳ ಬಲಿ ಉತ್ಸವ ನಡೆಯಿತು. ಖಂಡನಾಯಕನ ಕಟ್ಟೆಯಲ್ಲಿ ಕಟ್ಟಪೂಜೆ ನಡೆದ ಬಳಿಕ ವಾದ್ಯ, ಭಜನೆ, ಬ್ಯಾಂಡ್, ಸರ್ವ ವಾದ್ಯ ಸ್ತುತಿಗಳ ಬಳಿಕ ಚಂದ್ರಮಂಡಲ ಉತ್ಸವ ನಡೆಯಿತು. ಬಳಿಕ ತೆಪ್ಪೋತ್ಸವ ಆರಂಭಗೊಂಡಿತು. ಶ್ರೀಧರ ತಂತ್ರಿ, ದೇವಸ್ಥಾನದ ಪ್ರಧಾನ ಅರ್ಚಕ ವಿ.ಎಸ್.ಭಟ್ ಅವರು ವಿವಿಧ ಧಾರ್ಮಿಕ ವಿಧಿವಿಧಾನಗಳನ್ನು ನೆರವೇರಿಸಿದರು.