Pet Love: ಬೆಕ್ಕುಗಳಿಗಾಗಿ ಮನೆಯನ್ನೇ ಕಟ್ಟಿದ ಉಜಿರೆಯ ದಂಪತಿ- ಇವರ ಪ್ರಾಣಿ ಪ್ರೀತಿ ಅಪಾರ! | Pet Love: A couple from Ujira built a house for cats – their love for animals is immense!

ನೂರವೈತ್ತಕ್ಕಿಂತಲೂ ಅಧಿಕ ಬೆಕ್ಕುಗಳನ್ನು ಸಾಕುತ್ತಿರುವ ರಾಜೇಶ್ ಗೌಡ ದಂಪತಿ ಬೆಕ್ಕುಗಳಿಗಾಗಿ ಮನೆಯೆದುರು ನೂತನ ಗೂಡು ನಿರ್ಮಿಸಿದ್ದಾರೆ. ಬೆಕ್ಕಿಗಳಿಗೂ ವ್ಯವಸ್ಥಿತವಾದ ಜಾಗ ಬೇಕು ಎಂಬ ಆಸೆಯಿಂದ ರಾಜೇಶ್ ಗೌಡ ಅವರು ಈ ನೂತನ ಗೂಡು ನಿರ್ಮಾಣ ಮಾಡಿದ್ದಾರೆ. ಬಿಸಿಲು ಮತ್ತು ಮಳೆಯಿಂದ ರಕ್ಷಣೆ ಪಡೆದುಕೊಳ್ಳಲು, ಕಾಡು ಪ್ರಾಣಿಗಳಿಂದ ಬೆಕ್ಕಿನ ಮರಿಗಳನ್ನು ಕಾಪಾಡಲು ಈ ನೂತನ ಗೂಡು ನಿರ್ಮಾಣ ಮಾಡಿದ್ದಾರೆ. ಈ ಗೂಡಿನಲ್ಲಿ ನೀರು, ಮಲಗಲು ಅಚ್ಚುಕಟ್ಟಾದ ವ್ಯವಸ್ಥೆ, ಗೂಡು ತೊಳೆಯಲು ನೀರಿನ ವ್ಯವಸ್ಥೆ, ಬೆಳಕಿನ ಸೌಕರ್ಯ ಮಾಡಲಾಗಿದೆ.

ಇದನ್ನೂ ಓದಿ: Dakshina Kannada: ಪಶ್ಚಿಮ ಘಟ್ಟದಲ್ಲಿ ಉತ್ತಮ ಮಳೆ, ತುಂಬಿ ಹರಿಯುತ್ತಿರುವ ಹಳ್ಳ- ತೊರೆಗಳು!

ಕಳೆದ ಹನ್ನೊಂದು ವರ್ಷದಿಂದ ನಿರ್ಗತಿಕ ಬೆಕ್ಕುಗಳನ್ನು ಸಾಕುತ್ತಿರುವ ಈ ದಂಪತಿಗೆ ಮಕ್ಕಳಿಲ್ಲ.ಆದರೆ ಬೆಕ್ಕುಗಳಲ್ಲಿ ಮಕ್ಕಳನ್ನು ಕಂಡು, ರಸ್ತೆಯಲ್ಲಿ ಅನಾಥವಾಗಿರುವ ಬೆಕ್ಕಿನ ಮರಿಗಳನ್ನು ತಂದು ಅವುಗಳನ್ನು ಸಾಕುತ್ತಿದ್ದಾರೆ. ಆರ್ಥಿಕವಾಗಿ ಶಕ್ತರಲ್ಲವಾದರೂ ಬೆಕ್ಕುಗಳಿಗೆ ಈ ದಂಪತಿ ಕಡಿಮೆ ಮಾಡಿಲ್ಲ. ಈ ಮನೆಯಲ್ಲಿ ಹುಟ್ಟಿ ಬೆಳೆದ ಒಂದು ಬೆಕ್ಕಿನ ಮರಿಯನ್ನೂ ಈ ದಂಪತಿ ಮಾರಾಟ ಮಾಡಿಲ್ಲ. ನಮ್ಮ ಮನೆಯಲ್ಲಿ ಹುಟ್ಟಿದ ಮರಿಗಳು ತಮ್ಮಲ್ಲಿಯೇ ಆಡಿಕೊಂಡು ಇರಬೇಕು ಅನ್ನೋದು ಅವರ ಆಸೆ.

ಈ ಬೆಕ್ಕಿನ ಅರಮನೆ ಬೆಕ್ಕುಗಳಿಗೆ ಒಂದು ರೀತಿಯ ಆಶ್ರಮವಾಗಿದೆ. ನಿರ್ಗತಿಕ ಬೆಕ್ಕುಗಳಿಗೆ ಆಶ್ರಯವನ್ನು ಇಲ್ಲಿ ನೀಡುತ್ತಾರೆ‌. ಆದರೆ ಬೆಕ್ಕುಗಳ ಸಂಖ್ಯೆ ಜಾಸ್ತಿಯಾದಂತೆಯೇ ಅವುಗಳ ಖರ್ಚು-ವೆಚ್ಚವೂ ಜಾಸ್ತಿ. ಕೆಲವರು ಈ ಗೂಡಿಗೆ ತಮ್ಮ‌ ಮನೆಯ ಮರಿಗಳನ್ನು ಬಂದು ಬಿಡೋದು ಕೂಡಾ ಇದೆ. ಆದರೆ ಆರ್ಥಿಕ ಸ್ಥಿತಿವಂತರಲ್ಲದ ಈ ದಂಪತಿ, ಜನ ಸಹಾಯ ಮಾಡಿದರೆ ಅವುಗಳ ಲಾಲನೆ ಪಾಲನೆ ಮಾಡಬಹುದು ಅಂತಾ ಹೇಳುತ್ತಾರೆ.