Last Updated:
ಟ್ರ್ಯಾಕ್ಸನ್ ವರದಿಯ ಪ್ರಕಾರ, 2025ರಲ್ಲಿ ಭಾರತೀಯ ಟೆಕ್ ಸ್ಟಾರ್ಟ್ಅಪ್ಗಳು ಒಟ್ಟು $10.5 ಬಿಲಿಯನ್ ನಿಧಿ ಸಂಗ್ರಹಿಸುವ ನಿರೀಕ್ಷೆಯಿದೆ. ಇದು ವರ್ಷದಿಂದ ವರ್ಷಕ್ಕೆ ಶೇ.17ರಷ್ಟು ಕುಸಿತವನ್ನೇ ತೋರಿಸಿದರೂ, ಜಾಗತಿಕ ಹೋಲಿಕೆಯಲ್ಲಿ ಭಾರತವು ಬಲಿಷ್ಠ ಸ್ಥಾನವನ್ನು ಕಾಯ್ದುಕೊಂಡಿದೆ. ಈ ಕುರಿತು ಸಂಪೂರ್ಣ ವಿವರ ಇಲ್ಲಿದೆ.
ದೆಹಲಿ: ಜಾಗತಿಕ ಆರ್ಥಿಕ (Economy) ಅನಿಶ್ಚಿತತೆ, ಬಡ್ಡಿದರ ಏರಿಕೆ ಮತ್ತು ಹೂಡಿಕೆದಾರರ (Investor) ಎಚ್ಚರಿಕೆಯ ನಡುವೆಯೂ ಭಾರತೀಯ ಟೆಕ್ ಸ್ಟಾರ್ಟ್ಅಪ್ಗಳು (Indian Tech Start Up) ಮತ್ತೊಮ್ಮೆ ತಮ್ಮ ಶಕ್ತಿ ಸಾಬೀತುಪಡಿಸಿವೆ. ನಿಧಿ ಸಂಗ್ರಹಣೆಯ ದೃಷ್ಟಿಯಿಂದ ಭಾರತವು ಚೀನಾ (China) ಮತ್ತು ಜರ್ಮನಿಯನ್ನು(ಜರ್ಮನಿ) ಮೀರಿಸಿ, ಜಾಗತಿಕವಾಗಿ ಮೂರನೇ ಸ್ಥಾನವನ್ನು ಪಡೆದುಕೊಂಡಿದೆ. ಮಾರುಕಟ್ಟೆ ಗುಪ್ತಚರ ವೇದಿಕೆ ಟ್ರ್ಯಾಕ್ಸನ್ ಬಿಡುಗಡೆ ಮಾಡಿದ ಇತ್ತೀಚಿನ ವರದಿ ಪ್ರಕಾರ, ಭಾರತೀಯ ಸ್ಟಾರ್ಟ್ಅಪ್ ಪರಿಸರ ವ್ಯವಸ್ಥೆಯು ಇನ್ನೂ ಹೂಡಿಕೆದಾರರ ವಿಶ್ವಾಸ ಉಳಿಸಿಕೊಂಡಿದೆ ಎಂಬುದನ್ನು ಸ್ಪಷ್ಟಪಡಿಸುತ್ತದೆ.
ಟ್ರ್ಯಾಕ್ಸನ್ ವರದಿಯ ಪ್ರಕಾರ, 2025ರಲ್ಲಿ ಭಾರತೀಯ ಟೆಕ್ ಸ್ಟಾರ್ಟ್ಅಪ್ಗಳು ಒಟ್ಟು $10.5 ಬಿಲಿಯನ್ ನಿಧಿ ಸಂಗ್ರಹಿಸುವ ನಿರೀಕ್ಷೆಯಿದೆ. ಇದು ವರ್ಷದಿಂದ ವರ್ಷಕ್ಕೆ ಶೇ.17ರಷ್ಟು ಕುಸಿತವನ್ನೇ ತೋರಿಸಿದರೂ, ಜಾಗತಿಕ ಹೋಲಿಕೆಯಲ್ಲಿ ಭಾರತವು ಬಲಿಷ್ಠ ಸ್ಥಾನವನ್ನು ಕಾಯ್ದುಕೊಂಡಿದೆ. ಅಮೆರಿಕ ಮತ್ತು ಯುನೈಟೆಡ್ ಕಿಂಗ್ಡಮ್ ಮಾತ್ರ ಭಾರತಕ್ಕಿಂತ ಮುಂದಿದ್ದು, ಚೀನಾ ಮತ್ತು ಜರ್ಮನಿಯಂತಹ ದೊಡ್ಡ ಆರ್ಥಿಕತೆಗಳನ್ನು ಹಿಂದಿಕ್ಕಿರುವುದು ಗಮನಾರ್ಹ ಸಾಧನೆಯಾಗಿದೆ.
ಹಿಂದಿನ ವರ್ಷಗಳ ಅಂಕಿಅಂಶಗಳನ್ನು ಗಮನಿಸಿದರೆ, 2023ರಲ್ಲಿ ಭಾರತೀಯ ಸ್ಟಾರ್ಟ್ಅಪ್ಗಳು ಸುಮಾರು $11 ಬಿಲಿಯನ್ ನಿಧಿಯನ್ನು ಸಂಗ್ರಹಿಸಿದ್ದವು. 2024ರಲ್ಲಿ ಈ ಮೊತ್ತವು $12.7 ಬಿಲಿಯನ್ಗೆ ಏರಿಕೆಯಾಗಿತ್ತು. 2025ರಲ್ಲಿ ಸ್ವಲ್ಪ ಇಳಿಕೆ ಕಂಡರೂ, ನಿರಂತರವಾಗಿ ಜಾಗತಿಕ ಟಾಪ್-3 ಸ್ಥಾನದಲ್ಲಿರುವುದು ಭಾರತದ ಸ್ಟಾರ್ಟ್ಅಪ್ ಪರಿಸರ ವ್ಯವಸ್ಥೆಯ ಸ್ಥೈರ್ಯವನ್ನು ತೋರಿಸುತ್ತದೆ.
ಹೂಡಿಕೆದಾರರ ನಂಬಿಕೆ ವಿಶೇಷವಾಗಿ ಆರಂಭಿಕ ಹಂತದ (Early-stage) ಸ್ಟಾರ್ಟ್ಅಪ್ಗಳ ಮೇಲೆ ಕೇಂದ್ರೀಕೃತವಾಗಿದೆ. 2025ರಲ್ಲಿ ಆರಂಭಿಕ ಹಂತದ ಸ್ಟಾರ್ಟ್ಅಪ್ಗಳು $3.9 ಬಿಲಿಯನ್ ನಿಧಿ ಸಂಗ್ರಹಿಸಿದ್ದು, ಇದು 2024ಕ್ಕೆ ಹೋಲಿಸಿದರೆ ಶೇ.7ರಷ್ಟು ಹೆಚ್ಚಳವಾಗಿದೆ. ವೇಗವಾಗಿ ಬೆಳೆಯುವ ಸಾಮರ್ಥ್ಯ, ತಂತ್ರಜ್ಞಾನ ಆಧಾರಿತ ಪರಿಹಾರಗಳು ಮತ್ತು ಮಾರುಕಟ್ಟೆ ವಿಸ್ತರಣೆಯ ಸಾಧ್ಯತೆಗಳು ಹೂಡಿಕೆದಾರರನ್ನು ಆಕರ್ಷಿಸುತ್ತಿವೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.
ಇತ್ತ, ಪ್ರಾಥಮಿಕ ಹಂತದ (Seed-stage) ನಿಧಿಯಲ್ಲಿ ಸ್ಪಷ್ಟ ಇಳಿಕೆ ಕಂಡುಬಂದಿದ್ದು, ಅದು ಶೇ.30ರಷ್ಟು ಕುಸಿದು $1.1 ಬಿಲಿಯನ್ಗೆ ತಲುಪಿದೆ. ಹೂಡಿಕೆದಾರರು ಹೆಚ್ಚು ಎಚ್ಚರಿಕೆಯಿಂದ ಆಯ್ಕೆ ಮಾಡುತ್ತಿರುವುದು ಇದಕ್ಕೆ ಪ್ರಮುಖ ಕಾರಣವಾಗಿದೆ. ಅದೇ ರೀತಿ, ಕೊನೆಯ ಹಂತದ (Late-stage) ಸ್ಟಾರ್ಟ್ಅಪ್ಗಳ ನಿಧಿ ಸಂಗ್ರಹಣೆ $5.5 ಬಿಲಿಯನ್ಗೆ ಇಳಿಕೆಯಾಗಿದ್ದು, ಇದು 2024ಕ್ಕೆ ಹೋಲಿಸಿದರೆ ಶೇ.26ರಷ್ಟು ಕುಸಿತವಾಗಿದೆ.
ಗ್ರೀನ್ ಎಕಾನಮಿ ವಿಶ್ವಾಸದ ಪ್ರತಿಬಿಂಬ!
ವಲಯವಾರು ನೋಡಿದರೆ, ಸಾರಿಗೆ ಮತ್ತು ಲಾಜಿಸ್ಟಿಕ್ಸ್ ಟೆಕ್, ಪರಿಸರ ತಂತ್ರಜ್ಞಾನ (ಗ್ರೀನ್ ಟೆಕ್) ಮತ್ತು ಆಟೋ ಟೆಕ್ ಕ್ಷೇತ್ರಗಳಲ್ಲಿ ಅತಿದೊಡ್ಡ ಒಪ್ಪಂದಗಳು ನಡೆದಿವೆ. ಅರಿಷಾ ಇ-ಮೊಬಿಲಿಟಿ ಒಬ್ಬಂಟಿಯಾಗಿ $1 ಬಿಲಿಯನ್ ನಿಧಿ ಸಂಗ್ರಹಿಸಿ ಸುದ್ದಿಯಲ್ಲಿತ್ತು. ಕ್ವಿಕ್ ಕಾಮರ್ಸ್ ಕ್ಷೇತ್ರದ ಜೆಪ್ಟೊ $300 ಮಿಲಿಯನ್, ಗ್ರೀನ್ಲೈನ್ $275 ಮಿಲಿಯನ್ ಹಣವನ್ನು ಪಡೆದುಕೊಂಡಿವೆ. ಇದು ತಂತ್ರಜ್ಞಾನ ಆಧಾರಿತ ಮೂಲಸೌಕರ್ಯ ಮತ್ತು ಹಸಿರು ಆರ್ಥಿಕತೆಯ ಮೇಲಿನ ವಿಶ್ವಾಸವನ್ನು ಪ್ರತಿಬಿಂಬಿಸುತ್ತದೆ.
ಇನ್ನೊಂದು ಮಹತ್ವದ ಅಂಶವೆಂದರೆ ಮಹಿಳಾ ನೇತೃತ್ವದ ಸ್ಟಾರ್ಟ್ಅಪ್ಗಳ ಏರಿಕೆ. ವರದಿಯ ಪ್ರಕಾರ, ಮಹಿಳಾ ಉದ್ಯಮಿಗಳು ನೇತೃತ್ವ ವಹಿಸಿರುವ ಟೆಕ್ ಸ್ಟಾರ್ಟ್ಅಪ್ಗಳು ಒಟ್ಟಾರೆಯಾಗಿ $1 ಬಿಲಿಯನ್ ನಿಧಿ ಸಂಗ್ರಹಿಸಿವೆ. ಜಿವಾ $62 ಮಿಲಿಯನ್, ಅಮ್ನೆಕ್ಸ್ $52 ಮಿಲಿಯನ್ ಹಣವನ್ನು ಪಡೆದಿವೆ. ಇದು ಭಾರತೀಯ ಸ್ಟಾರ್ಟ್ಅಪ್ ಪರಿಸರ ವ್ಯವಸ್ಥೆಯಲ್ಲಿ ಮಹಿಳಾ ಉದ್ಯಮಿಗಳ ಪಾತ್ರವು ಸ್ಥಿರವಾಗಿ ಬಲಗೊಳ್ಳುತ್ತಿದೆ ಎಂಬುದಕ್ಕೆ ಸ್ಪಷ್ಟ ಸಾಕ್ಷಿಯಾಗಿದೆ.
Click here to add News18 as your preferred news source on Google. ನ್ಯೂಸ್ 18 ಕನ್ನಡ ಟೆಕ್ನಾಲಜಿ ವಿಭಾಗದಲ್ಲಿ ಸ್ಮಾರ್ಟ್ಫೋನ್ ಬಿಡುಗಡೆ ಮಾಹಿತಿ, ಮೊಬೈಲ್ ವಿಮರ್ಶೆಗಳು, ಗ್ಯಾಜೆಟ್ಗಳು, ತಂತ್ರಜ್ಞಾನ ಸಲಹೆಗಳು, ಇ-ಕಾಮರ್ಸ್ ಮಾರಾಟ, ಆನ್ಲೈನ್ ಶಾಪಿಂಗ್, ಅಪ್ಲಿಕೇಶನ್ಗಳು, ವಾಟ್ಸಾಪ್ ಅಪ್ಡೇಟ್ಸ್, ಎಲೆಕ್ಟ್ರಿಕ್ ವಾಹನಗಳಿಗೆ ಸಂಬಂಧಿಸಿದ ಸುದ್ದಿಗಳನ್ನು ಪಡೆಯಬಹುದಾಗಿದೆ. ಹೆಚ್ಚಿನ ಸುದ್ದಿಗಳಿಗಾಗಿ ನ್ಯೂಸ್ 18 ಕನ್ನಡ ಫಾಲೋ ಮಾಡಿ
Delhi,Delhi,Delhi
Jan 21, 2026 11:25 AM IST