ಭಾನುವಾರ ನಡೆದ ಫೈನಲ್ ಮಹಾಸಮರದಲ್ಲಿ, ಹಾಲಿ ಚಾಂಪಿಯನ್ ಕಾರ್ಲೋಸ್ ಅಲ್ಕರಾಜ್ ಅವರ ಅಬ್ಬರವನ್ನು ತಣ್ಣಗಾಗಿಸಿದ ಸಿನ್ನರ್, 4-6, 6-4, 6-4, 6-4 ಸೆಟ್‌ಗಳ ಭರ್ಜರಿ ಜಯದೊಂದಿಗೆ ತಮ್ಮ ಚೊಚ್ಚಲ ವಿಂಬಲ್ಡನ್ ಪ್ರಶಸ್ತಿಯನ್ನು ಎತ್ತಿ ಹಿಡಿದರು.
ಈ ಗೆಲುವು ಸಿನ್ನರ್ ಪಾಲಿಗೆ ‘ಡಬಲ್ ಧಮಾಕಾ’ ಇದ್ದಂತಿತ್ತು. ಕೆಲವೇ ತಿಂಗಳುಗಳ ಹಿಂದೆ ನಡೆದ ಫ್ರೆಂಚ್ ಓಪನ್ ಫೈನಲ್‌ನಲ್ಲಿ ಇದೇ ಅಲ್ಕರಾಜ್ ವಿರುದ್ಧ ಎರಡು ಸೆಟ್‌ಗಳ ಮುನ್ನಡೆ ಪಡೆದಿದ್ದರೂ, ಸಿನ್ನರ್ ಸೋಲು ಕಂಡಿದ್ದರು. ಆ ಸೋಲಿನ ನೋವು ಅವರಿಗೆ ದೊಡ್ಡ ಪಾಠವನ್ನೇ ಕಲಿಸಿತ್ತು. ಆದರೆ ವಿಂಬಲ್ಡನ್‌ನಲ್ಲಿ ಅವರು ಯಾವುದೇ ತಪ್ಪು ಮಾಡಲಿಲ್ಲ. ತಾಳ್ಮೆ ಮತ್ತು ಆಕ್ರಮಣಕಾರಿ ಆಟದ ಅದ್ಭುತ ಮಿಶ್ರಣದೊಂದಿಗೆ ಅಲ್ಕರಾಜ್‌ಗೆ ತಿರುಗೇಟು ನೀಡಿ, ತಾವು ನಿಜವಾದ ಚಾಂಪಿಯನ್ ಎಂಬುದನ್ನು ಜಗತ್ತಿಗೆ ಸಾರಿದರು.
ಪಂದ್ಯದ ಆರಂಭದಲ್ಲಿ ಅಲ್ಕರಾಜ್ ತಮ್ಮ ಎಂದಿನ ಆಟದಿಂದ ಮೊದಲ ಸೆಟ್‌ನ್ನು ಸುಲಭವಾಗಿ ಗೆದ್ದಾಗ, ಸಿನ್ನರ್ ಪಂದ್ಯವನ್ನು ಕೈಚೆಲ್ಲುತ್ತಾರೆ ಎಂದೇ ಅನೇಕರು ಭಾವಿಸಿದ್ದರು. ಆದರೆ ಸಿನ್ನರ್ ತಲೆಯನ್ನು ತಣ್ಣಗಿಟ್ಟುಕೊಂಡು ಆಡಿದರು. ಎರಡನೇ ಸೆಟ್‌ನಿಂದ ಅವರ ಆಟದ ವೈಖರಿಯೇ ಬದಲಾಯಿತು. ಗುಂಡಿನಂತೆ ಸಿಡಿಯುತ್ತಿದ್ದ ಫೋರ್‌ಹ್ಯಾಂಡ್‌ಗಳು ಮತ್ತು ನಿಖರವಾದ ಸರ್ವ್‌ಗಳಿಂದ ಅಲ್ಕರಾಜ್‌ರನ್ನು ಕಂಗೆಡಿಸಿದರು. ಸತತ ಮೂರು ಸೆಟ್‌ಗಳನ್ನು ಗೆದ್ದು, ಇತಿಹಾಸದ ಪುಟಗಳಲ್ಲಿ ತಮ್ಮ ಹೆಸರನ್ನು ಸುವರ್ಣಾಕ್ಷರಗಳಲ್ಲಿ ಬರೆದರು.
ಮೂರನೇ ಸೆಟ್‌ನ ಒಂಬತ್ತನೇ ಗೇಮ್ ಮತ್ತು ನಾಲ್ಕನೇ ಸೆಟ್‌ನಲ್ಲಿ ಪಡೆದ ಬ್ರೇಕ್ ಪಾಯಿಂಟ್‌ಗಳು ಪಂದ್ಯದ ದಿಕ್ಕನ್ನೇ ಬದಲಿಸಿದವು. ಅಲ್ಕರಾಜ್ ಕೊನೆಯ ಕ್ಷಣದವರೆಗೂ ಹೋರಾಡಿದರೂ, ಸಿನ್ನರ್‌ನ ಉಕ್ಕಿನಂತಹ ರಕ್ಷಣಾ ಕೋಟೆಯನ್ನು ಭೇದಿಸಲು ಸಾಧ್ಯವಾಗಲಿಲ್ಲ.
ಟೆನಿಸ್ ಜಗತ್ತನ್ನು ದಶಕಗಳ ಕಾಲ ಆಳಿದ ರೋಜರ್ ಫೆಡರರ್, ರಾಫೆಲ್ ನಡಾಲ್ ಮತ್ತು ನೊವಾಕ್ ಜೊಕೊವಿಚ್ ಅವರ “ಬಿಗ್ ತ್ರೀ” ಯುಗ ಮುಗಿಯುತ್ತಿದ್ದಂತೆ, ಹೊಸ ರಾಜರ ಪಟ್ಟಾಭಿಷೇಕಕ್ಕೆ ವೇದಿಕೆ ಸಿದ್ಧವಾಗಿದೆ. ಜಾನಿಕ್ ಸಿನ್ನರ್ ಮತ್ತು ಕಾರ್ಲೋಸ್ ಅಲ್ಕರಾಜ್ ಈ ಹೊಸ ಯುಗದ ಪ್ರಮುಖರೆಂಬುದರಲ್ಲಿ ಯಾವುದೇ ಅನುಮಾನವಿಲ್ಲ.
ಕಳೆದ ಏಳು ಗ್ರ್ಯಾನ್‌ಸ್ಲಾಮ್‌ಗಳಲ್ಲಿ ಇವರಿಬ್ಬರೇ ಪ್ರಶಸ್ತಿಗಳನ್ನು ಹಂಚಿಕೊಂಡಿದ್ದು, ಅದರಲ್ಲಿ ನಾಲ್ಕು ಸಿನ್ನರ್ ಪಾಲಾಗಿದೆ. ಸೆಮಿಫೈನಲ್‌ನಲ್ಲಿ ಏಳು ಬಾರಿಯ ಚಾಂಪಿಯನ್ ನೊವಾಕ್ ಜೊಕೊವಿಚ್‌ರನ್ನು ಮಣಿಸಿದ್ದೇ ಸಿನ್ನರ್ ಸಾಮರ್ಥ್ಯಕ್ಕೆ ಹಿಡಿದ ಕೈಗನ್ನಡಿಯಾಗಿತ್ತು.
ಈ ಐತಿಹಾಸಿಕ ಪಂದ್ಯವನ್ನು ವೇಲ್ಸ್‌ನ ರಾಜಕುಮಾರ ವಿಲಿಯಂ ಮತ್ತು ರಾಜಕುಮಾರಿ ಕ್ಯಾಥರೀನ್ ಸೇರಿದಂತೆ ಅನೇಕ ಗಣ್ಯರು ಸಾಕ್ಷಿಯಾದರು. ಸಿನ್ನರ್ ಅವರ ಈ ಗೆಲುವು ಇಟಲಿಯಲ್ಲಿ ಸಂಭ್ರಮದ ಅಲೆಯನ್ನು ಎಬ್ಬಿಸಿದ್ದು, ಟೆನಿಸ್ ಲೋಕದಲ್ಲಿ ತಮ್ಮ ದೇಶದ ಕೀರ್ತಿಯನ್ನು ಎತ್ತಿ ಹಿಡಿದಿದ್ದಾರೆ.
July 14, 2025 9:51 AM IST
